2 KWEBEKORINTE 3

₁Kghani sele sithome ukuzibuka godu na? Nakanye, abe asidingi iincwadi zokusethula kini namkha ezivela kini njengombana abanye basenza. ₂Nina ngokwenu niyincwadi yethu etlolwe eenhliziyweni zethu bona yaziwe beyifundwe babantu boke. ₃Niyabonakala bona niyincwadi kaKrestu, umphumela womsebenzethu. Iye, incwadi engakatlolwa ngomsobo kodwana ngoMoya kaZimu ophilako, engakatlolelwa emqebethwini kodwana eenhliziyweni zabantu.

₄Ithemba elinjalo ngelethu ngoKrestu phambi koZimu. ₅Akutjho bona siyakghona thina ngokwethu ukuzizuzela ilitho, kodwana nguZimu osikghonisako. ₆Iye, nguye osenze sakghona njengeenceku zesivumelwano esitjha, ingasi zomthetho kodwana zakaMoya ngombana umthetho uyabulala kodwana uMoya uyaphilisa.

₇Yeke, nakube ikonzo yokufa egobhodlhwe ngamagama emqebethwini yeza ngephazimulo kangangobana ama-Israyeli ahlulwa kuqala uMosi ebusweni ngebanga layo iphazimulo esebusweni bakhe, iphazimulo leyo esele iphelelwe mamandla, ₈kuzokuba kangangani-ke ukuza kwekonzo kaMoya ngephazimulo na? ₉Nakube bekunephazimulo ekonzweni yokulahlwa, iphazimula kangangani-ke ikonzo eletha ukulungisiswa na? ₁₀Ngambala lokho ebekuseze kunephazimulo, sele kulahlekelwe yiphazimulo leyo ngebanga lokufika kwephazimulo ekulu ₁₁ngombana nakube lokho okuphelako kweza ngephazimulo, yikulu kangangani-ke iphazimulo yalokho okungapheliko na?

₁₂Yeke, njengombana sinethemba elinjalo nje, sinesibindi tle. ₁₃Thina asisinjengoMosi obekazigubuzesa ngesiyaya ukuze ama-Israyeli angamgqolozeli lokha iphazimulo leyo nayinyamalalako. ₁₄Kodwana imikhumbulwabo yathundubazwa ngombana bekube kunamhlanjesi isiyayeso sisese njengombana besinjalo lokha nakufundwa isivumelwano esidala. Azange sisuswe ngombana sisuka kwaphela lokha umuntu nakuKrestu. ₁₅Iye, bekube kunamhlanjesi njalo lokha nakufundwa uMosi, isiyaya sembesa imikhumbulwabo, ₁₆kodwana lokha umuntu natjhugulukela eKosini, isiyaya siyasuswa. ₁₇Nje-ke iKosi inguMoya, lapha kunoMoya kaSomnini khona kunekululeko. ₁₈Yeke soke thina esinobuso obungakathweswa isiyaya, thina esibona iphazimulo kaSomnini inga ibonakaliswe esibonibonini, siyatjhugululwa bona sibe nobujamo obufanako ukusuka kelinye izinga lephazimulo ukuya kelinye ngombana lokhu kuvela eKosini, enguMoya.