2 KWEBEKORINTE 2

₁Ngaqeda nomkhumbulwami bona ngingasanithekela ngobuhlungu ₂ngombana nakube nginizwisa ubuhlungu, akekho ongangithokozisa ngaphandle kwaloyo engimzwise ubuhlungu. ₃Yeke ngatlola njengombana ngenzile ukuze kuthi nasele ngifikile, ngingazwiswa ubuhlungu ngilabo ebekumele ngathana bayangithokozisa ngombana nginethemba ngani noke kobana ukuthaba kwami kuzakuba kuthaba kwenu noke. ₄Nganitlolela ngokukhathazeka okukhulu nangobuhlungu behliziyo kanye nangeenyembezi, ingasi ukunidabukisa kodwana ukunazisa ukuzika kwethando enginalo ngani.

₅Nakube kukhona obange ubuhlungu, akakabubangi kimi kodwana ngandlelathize ububange kini noke, nokho angingezeleli nangitjho njalo. ₆Isibetho abethwe ngaso linengi labantu simanele umuntu onjalo. ₇Nje-ke esikhundleni salokho kumele nimlibalele benimduduze ukuze angabhudungelwa lisizi elidluleleko. ₈Ngalokho ngiyanincenga bonyana nibonakalise ithando lenu kuye. ₉Kungebangelo ngitlolile kobana nginizizinye bengazi bona nizithobile kikho koke.

₁₀Enimlibalelako nami ngiyamlibalela. Engikulibaleleko, nakube kukhona, kube ngebanga lenu phambi kwakaKrestu ₁₁ukuze uSathana angasibindi ngombana asikalalisi amehlo ngamaqhingakhe.

₁₂Kuthe lokha nangifika eTrowasi kobana ngitjhumayele ivangeli lakaKrestu, ngavulelwa umnyango eKosini. ₁₃Kodwana azange ngibe nokuthula ngombana azange ngifunyane umzalwana uTitosi lapho. Yeke ngabalayelisa, ngabuyela eMasedoniya.

₁₄Akathokozwe uZimu ohlala asirhola njalo ngedwendwe lokuhlula kuKrestu nophutjheza ngathi iphunga elimnandi lelwazi lakhe yoke indawo. ₁₅KuZimu siliphunga elimnandi lakaKrestu hlangana nalabo abasindiswako nalabo ababhubhako. ₁₆Komunye sisivunda sokufa, komunye siliphunga lokuphila. Ngubani ongangomthwalo lo na? ₁₇Thina asisinjengabo abanengi, asikhambi sikhangisa ngelizwi lakaZimu ukuzenzela inzuzo. Kodwana kuKrestu sikhuluma phambi koZimu ngobuqotho njengabantu abathunywe nguye.