Kotlo ya Babele
1Ke mo go tlilego e mongwe wa barongwa bao ba šupago ba ba bego ba swere meruswi e šupago, a bolela le nna a re: Tlaa ke go bontšhe go lahlwa ga seotswa seo se segolo se se dutšego godimo ga meetse a mantši. 2Ke sona se magoši a lefase a dirilego bootswa le sona, mme ba ba agilego lefaseng ba tagwa ke sebela sa bootswa bja sona.
3A nkiša lešokeng ke ile le Moya, ka bona mosadi a nametše sebata se sehubedu, se se tletšego maina a maroga, se se nago le dihlogo tše šupago le dinaka tša lesome. 4Mosadi eo o be a apere moretele, le mmala o mohubedu, a itšhephile ka gauta le ka ditalama le ka dipheta; ka seatla a swere senwelo sa gauta se se tletšego makgapha a ditshila tša bootswa bja gagwe. 5Phatleng ya gagwe go ngwadilwe leina le e lego sephiri, le Babele o mogolo, mmago diotswa le makgapha a lefase. 6Ka bona mosadi eo a tagilwe ke madi a bakgethwa le a dihlatse tša Jesu; ka tlabega gagolo ge ke mmona. 7Morongwa a bolela le nna a re: O tlabja ke eng? Nna ke tlo go botša sephiri sa mosadi eo, le sa sebata seo sa dihlogo tše šupago le dinaka tše lesome. 8Sebata seo o se bonego se be se le gona kgale; bjale ga se sa le gona; gomme se tlo rotoga sekoting, sa tsebo ya tahlegong. Mme ba ba agilego lefaseng, bao maina a bona a sa kago a ngwalwa pukung ya bophelo go tloga go theweng ga lefase, ba tlo tlabega ge ba bona sebata seo ka gore se be se le gona kgale, sa se be gona, mme sa boela sa ba gona.
9Moo go nyaka tlhaologanyo e nago le bohlale. Dihlogo tše šupago ke dithaba tše šupago, tše mosadi eo a dutšego godimo ga tšona, le gona ke dikgoši tše šupago. 10Tše tlhamo tša tšona di šetše di wile; e nngwe e gona; e nngwe ga e ešo ya tla. E tlo re ge e tlile ya tlo ba ya go dula lebakanyana fela. 11Ge e le sebata seo se bego se le gona kgale, mme se se be gona, sona ke kgoši e nngwe ya seswai ye e tšwago go tšela tše šupago; gomme e ya thalegong.
12Dinaka tšeo tše lesome tše o di bonego, ke dikgoši tše lesome tše di sešogo tša fiwa bogoši. Maatla a etšago a dikgoši di tlo a fiwa ka nako e tee gotee le sebata. 13Di na le kgopolo e tee; mme maatla a tšona di a gafela sebata. 14Di tlo hlabana le Kwana; fela, Kwana e tlo di fenya, gobane ke yona Morena wa marena, le Kgoši ya magoši; mme e na le babidiwa ba yona le bakgethwa le babotegi.
15Morongwa a bolela le nna a re: Meetse ao o a bonego a seotswa seo se dutšego godimo ga ona, ke merafo le mašaba a batho, le ditšhaba le maleme. 16Ge e le dinaka tše o di bonego, le sona sebata, di tlo hloya seotswa seo, di tlo se dira lešope, tša se hlobodiša, tša ja dinama tša sona, tša se tšhuma ka mollo. 17Gobane di tlo romeletšwa ke Modimo, tša dira se yena a se naganago, tša išwa ke monagano o tee ge di dira, ge di gafela sebata bogoši bja tšona, go be go phethege se Modimo a se boletšego.
18Ge e le mosadi yo o mmonego ke motse o mogolo woo o nago le bogoši bja go buša dikgoši tša lefase.
