Go tšhollwa merufsi ya dikotlo
1Ka kwa lentšu le legolo le etšwa Ntlongkgethwa, le laya barongwa bao ba šupago le re: Sepelang le yo tšholla meruswi yeo e šupago ya bogale bja Modimo kua lefaseng.
2Morongwa wa pele a ya a swere moruswi wa gagwe a o tšhollela lefaseng. Mme batho ba ba bego ba na le leswao la sebata, ba go khunamela seswantšho sa sona, ba tšwa dišo tše mpe tše šoro.
3Morongwa wa bobedi a ya a swere moruswi wa gagwe a o tšhollela lewatleng; la napa la fetoga madi e kego ke a mohu, mme mo lewatleng gwa hwa tše di phelago mo go lona.
4Morongwa wa boraro a tšholla moruswi wa gagwe dinokeng le didibeng tša meetse; meetse a fetoga madi. 5Ka kwa morongwa eo wa meetse ge a re: O ahlotše ka toko, wena Mobagona, Mohwetšwaalegona, wena Mokgethwa, ge o ahlotše ka mokgwa woo; 6Gobane ba tšholotše madi a bakgethwa ba gago; bjale o ba file madi gore ba nwe ona; ke sona se ba swanetšego. 7Ka kwa aletare e re: Go bjalo Morena Modimo Ramaatlaohle; kahlolo tša gago ke tša therešo le toko.
8Morongwa wa bone a tšhollela moruswi wa gagwe letšatšing, a gafelwa modiro wa go fiša batho ka mollo. 9Batho ba fišwa ka phišo e kgolo, ba ba ba roga leina la Modimo e a nago le maatla a go laola dikotlo tše; fela, ga ba ka ba sokologa ba mo reta.
10Morongwa wa bohlano a tshollela moruswi wa gagwe sedulong sa bogoši sa sebata, mmušo wa sona wa welwa ke leswiswi ba itomakanya maleme ka bohloko; 11Ba roga Modimo wa legodimo ka baka la mahloko a bona; fela ba se sokologe ba lahla mediro ya bona.
12Morongwa wa go selela a tšhollela moruswi wa gagwe nokeng ya Eforate, meetse a yona a gopa, ya ba go bulela dikgoši tša Bohlabela tsela. 13Ka bona molomong wa noga, le molomong wa sebata, le molomong wa moporofeta wa maaka, go etšwa meoya e meraro ya ditšhila boka digwegwe. 14Ke yona meoya ya masathane e dirago mehlolo, ye e yago go dikgoši tša lefase ka moka, ya di rapa go ya ntweng ya mohlamogolo wa Modimo Ramaatlaohle.
15Tsebang, ke etla bjalo ka lehodu. Wa lehlogonolo ke eo a phakgamago, a lotola diaparo tša gagwe, a se tlo sepela a hlobotše, ba mmona dihlong tša gagwe.
16Gomme o ba bokantšhitše felo mo go bitšwago Haramagedone.
17Morongwa wa go šupa a tšhollela moruswi wa gagwe sebakeng sa godimo. Kua Ntlongkgethwa sedulong sa bogoši sa Modimo gwa tšwa lentšu le legolo la re: Go phethegile! 18Gwa hlolega magadima le mekgoši le medumo, gwa ba le tšhišinyego e kgolo ya lefase ye go sešogo gwa ba le e kaakao e sa le mola batho ba eba gona lefaseng. 19Motse o mogolo wola wa kgaogana wa tšwa karolo tše tharo; metse ya ditšhaba ya phušoga; Babele motse o mogolo wa gopolwa pele ga Modimo, gore o newe senwelo sa sebela se bogale sa ge go befetšwe yena. 20Dihlakehlake ka moka tša tšhaba; le dithaba tša se ke tša hwetšwa di sa le gona. 21Batho ba welwa godimo ke sefako se segolo sa kelo tše lekgolo tša boima; batho ba roga Modimo ka baka la kotlo yeo ya sefako, ka gobane kotlo ya sona e be e godile o šoro.
