PSALME ya 97

₁Morena o a buša! A lefase le hlalale, go thabe le dihlakehlake ka boati bja tšona.

₂O dikologwa ke maru le leswiswi; sedulo sagwe sa bogoši se theilwe ka toko le molao.

₃Mollo o mo eta pele, o tšhuma manaba a gagwe thoko tšhole.

₄Dikgadima tša gagwe di ediša thetebudi; lefase, ge le di bona, le a roromela.

₅Dithaba di tologa boka moti wa dinose pele ga sefahlego sa Morena, sa yena Mong wa lona lefase lohle.

₆Magodimo a tumiša go loka ga gagwe, mme ditšhaba tšohle di bona borena bja gagwe.

₇Bohle ba ba hlankelago diswantšho, ba kgantšha medimo, ba tlo lewa ke dihlong; medimo ka moka e lotšha yena.

₈Motse wa Tsione o di kwile, gomme o thabile barwedi ba Juda ba hlalalela dikahlolo tšago, Morena.

₉Gobane Yogodimodimo, Moukamafaselohle, ke wena Morena. O phagamile kudu godimo ga medimo yohle.

₁₀Hee lena barata Modimo, hloyang bobe. Ke yena molotodi wa meoya ya baratwa ba gagwe; o ba namolela diatleng tša bakgopo.

₁₁Seedi se bjaletšwe ba ba lokilego; ba dipelo tša go loka ba bjaletšwe thabo.

₁₂Lena baloki, thabelang Morena, le lebogeng le leina lekgethwa la gagwe.