PSALME ya 96

₁Hlabelang Morena sefela se sefsa, lena mafase ohle! Hlabang sefela sa Morena.

₂Hlabang sefela sa Morena, le rete leina la gagwe, le bege phološo ya gagwe ka mehla le mehla.

₃Le anegele baditšhaba borena bja gagwe; le mehlolo ya gagwe le e anegele ba dilete tšohle.

₄Gobane Morena ke yo mogolo, Moretwa wa paala, ke yena mmoifegi mo go medimo yohle.

₅Gobane medimo ka moka ya ditšhaba ke diswantšho fela; ge e le Morena, ke yena a dirilego legodimo.

₆Borena le letago di pele ga gagwe; sekgethweng sa gagwe go tletše maatla le bothakga.

₇Hee lena meloko ya batho, lobang Morena ka direto le ka go re: Maatla ke a gagwe.

₈Lobang ka go reta leina la Morena; rwalang dibego le tle malapeng a gagwe.

₉Lotšhang Morena ka botšhephi bjo bokgethwa, le mmoife, lena mafase ka moka.

₁₀Le botše baditšhaba le re: Kgoši ke yena Morena! Legohle le theilwe, mme le ka se šuthe; o tlo ahlola ditšhaba ka toko.

₁₁Magodimo a a thabe, le lefase le hlalale, le lewatle a le dume, le tše tletšego mo go lona.

₁₂A naga e gobe mogobo, le tšohle tše di lego mo go yona; ke mo dihlare tša dithokgwa di tlogo hlalala

₁₃pele ga Morena gobane o a tla, gobane o tla go ahlola lefase. O tlo ahlola legohle ka toko; o tlo ahlola ditšhaba ka therešo yagwe.