Kgopelo ya go re Morena a ntlhable
Ya Dafida.
1Pelo ya ka e dula e lebeletše wena Morena.
2Ke botile wena Modimo wa ka; a nke ke se lewe ke dihlong, ka nyefolwa ke manaba a ka.
3Hleng bohle ba go letetšego ba sa ke ba nyama; ba ba nyamišwago ke ba ba hlanogago ka lefela.
4Morena, ntsebiše ditsela tša gago, o nthute mebila ya gago.
5O nketetše ka therešo ya gago, mme o nthute, gobane Modimo wa go mphološa ke wena; ke dula ke go hlologetšwe mehla yohle.
6Morena, elelwa mabobo a gago le botho bja gago, gobane ke tšona tša mehleng e se nago mathomo.
7Dibe tša ka tša mola ke sa le e mofsa, le di karaogo tša ka, o se di gopole; sa gago e be go nkgopola ka botho bja gago, ka lebaka la botse bja gago, Morena.
8Morena ke yo mobotse, ke wa go loka; ke ka lebaka leo a rutago badiradibe tsela.
9O hlahla babotlana go lokeng; bona babotlana o ba ruta tsela yagwe.
10Ditsela tšohle tša Morena ke tša botho le therešo mo go ba ba tiišago kgwerano le yena le mabohlatse agwe.
11Morena, ka baka la leina la gago, nthole melato, gobane ke e megolo.
12Ke mang motho wa go boifa Morena? -- Ke yo, wa go rutwa tsela a e swara.
13Yena mong o tlo dula ka tše botse; bana ba gagwe e tlo ba beng ba lefase.
14Morena o kwana le ba ba mmoifago; kgwerano ya gagwe ke ya go tsebišwa bona bao.
15Mahlo a ka a dula a lebeletše Morena, gobane o tlo ntšha dinao tša ka segoleng.
16Nke o ntebelele o ntšhokelwe ke le wa bodutu le bošuana.
17Ditlalelo di goletše pelo ya ka; nnamolele dipitlaganong.
18O mpone bobotlana le bohlaki, o ntebalele dibe tša ka tšohle.
19Bona go ata ga manaba a ka, ge a ntlhoile ka lehloyo le lebe.
20Diša moya wa ka o mphološe, gore ke se lewe ke dihlong, gobane ke botile wena.
21A nke ke phemelwe ke bothakga le go loka, gobane ke dula ke go lebeletše.
22Modimo, lopolola Isiraele ditlalelong tša gagwe tšohle.
