MATEO 27

₁Ge go esa baperisita ba bagolo ka moka le ba bagolo ba sethšaba ba lakana Jesu, gore ba mo iše polaong. ₂Ba mo tlema ba mo iša go mmuši Pontio Pilato, ba mo gafela yena.

₃Judase e a mo ekilego, ge a bona Jesu a tšwilwe, a itshola a bušetša mašeleng ala a masome a mararo go baperisita ba bagolo le go ba bagolo. ₄A re: Ke sentše. Ke ekile madi a se nago molato.

Bona ba re: Re tlo di reng? Go tlo bona wena.

₅Judase a lahlela mašeleng ao Ntlongkgethwa, a ya a ikgama ka lerala.

₆Baperisita ba bagolo ba tšea mašeleng ao, ba re: Ga a swanela go ba sedimo, ka gobane ke theko ya madi. ₇Ba kwana, mme ba reka tšhemo ya mmopi wa dipitša ka ona, ya ba felo ga mabitla a baeng. ₈Ke gona le lehono ba rego ke yona tšhemo ya madi.

₉Moo go phethegile se se boletšwego ke moporofeta, ge a re: Ba tšere mašeleng a masome a mararo a theko ya morekwa, yo ba mo rekilego go Baisiraele. ₁₀Ba reka tšhemo ya mmopi wa dipitša, ka mo Morena a ntaetšego ka gona.

₁₁Jesu a ema pele ga mmuši. Mmuši a mmotšiša a re: A ke wena Kgoši ya Bajuda?

Jesu a re: O boletše gona. ₁₂Gomme ge a begwa ke baperisita ba bagolo le ba bagolo, ga a ka a fetola selo.

₁₃Pilato a ba a re: A ga o kwe ge ba go bega ka tše kaakaa?

₁₄Jesu a se fetole le ka lentšu le tee; le mmuši a ba a kgotsa ka kudu.

₁₅Bjale mmuši o be a na le motlwae wa gagwe wa go gololela setšhaba mogolegwa ka monyanya; o be a golola yo ba mo ratago. ₁₆Gomme mehleng yeo ba be ba na le mogolegwa wa selalogi e a bitšwago Baraba. ₁₇Bjale ge ba phuthegile, Pilato a ba botšiša a re: Le rata ge nka le gololela ofe? A le rata Baraba? Goba le rata Jesu yo ba rego ke Kriste? ₁₈A realo ka gobane a tseba gore ge ba mo gafetše Jesu, ba be ba dirwa ke mona.

₁₉Ya re a dutše moo sedulong sa kahlolo, mogatšagwe a mo romela lentšu a re: O se ke wa ba le taba le moloki yoo, gobane bošego bjo ke kwele bohloko bjo bogolo ke mo lora.

₂₀Ke ge baperisita ba bagolo le bamangwalo ba hlohloleditše setšhaba, ba re ba kgopele Baraba, Jesu ba mmolaye. ₂₁Mmuši ge a ba botšiša a re: Le rata ge ke le lokollela mang go ba babedi bao? Ba re: Baraba!

₂₂Pilato a re: Gomme Jesu yo ba rego ke Kriste ke tlo mo dirang?

Bohle ba re: A a bapolwe sefapanong!

₂₃Mmuši a re: Gomme bokgopo bjo a bo dirilego ke bofe?

Bona ba fo tšholla legoa le legolo ba re: A a bapolwe sefapanong!

₂₄Pilato ge a bona a sa fenye selo lešata le fela le gola, a tšea meetse a hlapa diatla lešaba ka moka le mmona, a re: Nna ga ke ne molato ka madi a motho yo wa moloki; taba ye ke ya lena.

₂₅Gwa fetola setšhaba ka moka sa re: Madi a gagwe a a tle godimo ga rena le godimo ga bana ba rena!

₂₆Mmuši a ba gololela Baraba, a gafa Jesu, a re a otliwe mme a bapolwe sefapanong.

₂₇Bahlabani ba mmuši ba tšea Jesu, ba tsena nae ngwakong wa kahlolo, ba mmokela ba le sephohla ka moka, ₂₈Ba mo hlobodiša ba mo apeša kobo ya matsaka, ₂₉Ba loga mphapahlogo wa meetlwa, ba mo rweša hlogong; ba mo swariša lehlaka ka le letona; ba tla ba mo lotšha ba mo kwera, ba re: Re a lotšha, Kgoši ya Bajuda! ₃₀Ba mo tshwela ka mare, ba tšea lehlaka leo, ba mo itia hlogong. ₃₁Gomme ge ba mo kwerile, ba mo apola kobo yeo ya matsaka, ba mo apeša diaparo tša gagwe; ba tšwa nae gore ba yo mmapola sefapanong.

₃₂Ge ba sa tšwa, ba hlakana le monna e mongwe wa Kirene, yo leina la gagwe e lego Simone; ba mo gapeletša a rwalela Jesu sefapano. ₃₃Ge ba fihlile felo mo go bitšwago Gologotha, ke go re: Magateng a dihlogo, ₃₄ba mo nea mokgope wa morara o tswakilwego ka bohloko, ba re a nwe; yena a o leka, a gana go o nwa.

₃₅Ge ba feditše go mmapola, ba abelana diaparo tša gagwe ka go dira matengwa; ya ba gona go phethega se se boletšwego ke moporofeta ge a re: Ba abelane diaparo tša ka; mme kobo ya ka yona ba e direla matengwa. ₃₆Mme ba dula ba mo hlapetša ba le fao. ₃₇Godimo ga hlogo ya Jesu ba bea lengwalo la molato wa gagwe, la re: Yo ke Jesu Kgoši ya Bajuda. ₃₈Le bahlakodi ba babedi ba be ba bapotšwe mohla woo; e mongwe a ba ka letsogong le letona, e mongwe ka go le letshadi.

₃₉Ba ba fetago ka felo fao ba mo roga, ba šišinya dihlogo tša bona ba re: ₄₀Wena mophušola-Ntlokgethwa, wa re ke e aga ka matšatši a mararo, iphološe! Ge o le Morwamodimo, fologa fao sefapanong.

₄₁Le baperisita ba bagolo ba mo kwera ba na le bamangwalo le ba bagolo, ba re: ₄₂Ba bangwe o ba phološitše; bjale o šitwa go iphološa. Ge e le yena kgoši ya Isiraele, a a fologe bjale moo sefapanong, re kgone re mo dumela. ₄₃Ba re: O be a botile Modimo; a a mo phološe gee ge a mo rata; ka gobane o itše: Ke Morwa wa Modimo.

₄₄Le bahlakodi bala ba ba bapotšwego le yena, ba mo goboša ka mokgwa woo.

₄₅Ka nako ya go selela gwa ba le leswiswi nageng ka moka, gwa ba gwa tla nako ya senyane. ₄₆Ka yona nako ya senyane, Jesu a goeletša ka lentšu le legolo a re: Eli! Eli! Lama sabagthani? Ke go re: Modimo wa ka! Modimo wa ka! O ntlogeletšeng?

₄₇Ba bangwe ba go ema fao, ba kwa ge a realo, ba re: Motho yo o bitša Eliya. ₄₈E mongwe wa bona a kganyela a tšea motšitla, a o ina mokgopeng wa morara, a o hlomela lehlakeng, a mo noša.

₄₉Ba bangwe ba re: Lesang re bone ge Eliya a ka tla a mo phološa.

₅₀Gomme Jesu a buša a goeletša ka lentšu le legolo, ya ba gona a neelago moya.

₅₁Gomme ba bona sešireletšo sa Ngwakong wa Modimo se gagoga go tloga godimo go iša fase sa tšwa diripa tše pedi; lefase la šišinyega, le mantswe a pharoga. ₅₂Le mabitla a bulega, mme mebele e mentši ya bakgethwa ba ba robetšego ya tsoga. ₅₃Ba tšwa mabitleng, ba tla motseng o mokgethwa, ba bonwa ke ba bantši mehleng ya ge Jesu a šetše a tsogile.

₅₄Bala ba go hlapetša Jesu ba na le tona ya bona, ge ba bona tšhišinyego ya lefase le tše di diregilego, ba tšhoga gagolo, ba re: Ka kgonthe, yena yo e be e le Morwa wa Modimo.

₅₅Le basadi ba bantši ba be ba le gona moo, ba lebeletše ba le kgole, ke bala ba go latela Jesu ba etšwa Galilea, ba ba bego ba mo direla. ₅₆Go bona go be go le Maria Magdalena, le Maria mmago Jakobo le Jose, le mmago barwa ba Tsebedeo.

₅₇E šetše e le mantšiboa, gwa tla monna wa mohumi wa Arimathea; leina la gagwe e be e le Josefa; le yena e be e le morutiwa wa Jesu. ₅₈A ya go Pilato a mo kgopela mmele wa Jesu. Pilato a laela a re a newe. ₅₉Josefa a tšea mmele wa Jesu, a o phuthela ka mašela a mašweu. ₆₀A o bea lebitleng la gagwe le lefsa, le le bego le kgorilwe leswikeng; a kgokološetša leswika le legolo mojako wa lebitla a tloga. ₆₁Gona moo go be go na le Maria Magdalena, le Maria yola e mongwe, ba dutše ba lebane le lebitla.

₆₂Ka la ka moswana le le hlatlamago la tokišo, baperisita ba bagolo le bafarisei le bamangwalo ba phuthegela go Pilato, ₆₃Ba re: Morena, re gopotše tše moaroši yoo a di boletšego a sa phela, a re: Ke tlo tsoga ge go fetile matšatši a mararo. ₆₄Ke gona laela gore lebitla le hlapetšwe go be go fihle letšatši la boraro; e se re mohlomongwe barutiwa ba gagwe ba tla ba mo utswa, mme ba botša setšhaba ba re: O tsogile bahung. Ke mo maaka ao a tlogo fetiša a pele.

₆₅Pilato a fetola a re: Bahlapetši šebao! Yang, le hlapetše lebitla ka mo le tsebago.

₆₆Ba ya ba dišiša lebitla ka bahlapetši; mme leswika ba le beeletša ka leswao la bona.