MATEO 26

₁Eitše ge Jesu a feditše go ba anegela ditaba tšeo ka moka, a bolela le barutiwa ba gagwe a re: ₂Le a tseba, go sa šetše matšatši a mabedi, ke mo go tlago monyanya wa Paseka; gomme Morwamotho o tlo gafelwa go bapolwa sefapanong.

₃Ka tšatši leo baperisita ba bagolo le bamangwalo le bagolo ba setšhaba ba phuthegela lapeng la moperisita e mogolo, e a bitšwago Kayafa, ₄ba lakana go swara Jesu ka maano gore ba mmolaye, ₅ba re: Fela, re se ke ra di dira bjale monyanyeng, gore go se ke gwa tsoga moferefere setšhabeng.

₆Mohla woo, Jesu a le motsaneng wa Bethania, ga Simone walephera, ₇Gwa batamela mosadi e mongwe a swere setlolo sa theko e kgolo ka sebjana, a se tšhollela hlogong ya Jesu, ba dutše dijong. ₈Barutiwa ge ba di bona ba hlonama ba re: Ke gona go tšitlanya; mme go direlwang? ₉Setlolo seo se ka be se rekišitšwe, gwa tšwa tša go nea badiitšana.

₁₀Jesu ka go tseba ge ba realo a re: Mosadi yo le mo nyamišetšang? Tše a ntirilego tšona ke modiro o botse. ₁₁Badiitšana le na nabo ka mehla; ge e le nna, le ka se be le nna ka mehla. ₁₂Gobane ge a tšhetše setlolo se mmeleng wa ka, o diretše go fihlwa ga ka lebitleng. ₁₃Ruri, ke a le botša, mo gohle mo Ebangedi ye e tlo go bolelwa mafaseng ka moka, go tlo bolelwa le se mosadi yo a se drilego, gore a se lebalwe.

₁₄Ka lebaka leo e mongwe wa ba lesome le metšo e mebedi, e a bitšwago Judase Isikariote, o ile go baperisita ba bagolo le go bamangwalo. ₁₅A re: Le tlo mphang ge ke mo gafela diatleng tša lena? Ba mmeela mašeleng a masome a mararo. ₁₆Go tloga moo a hlwa a lebeletše lebaka la go mo eka.

₁₇Ka tšatši la go thoma monyanya wa dinkgwa tše di se nago komelo, barutiwa ba tla go Jesu ba re: O rata ge re go lokišetša kae dijo tša Paseka?

₁₈Jesu a re: Yang motseng go mokete, le mmotše le re: Moruti o re: Lebaka la ka le kgauswi; Paseka ke tla e ja ga gago ke na le barutiwa ba ka.

₁₉Barutiwa ba ya ba dira tše Jesu a ba laetšego tšona, ba lokiša Paseka.

₂₀E šetše e le mantšiboa, Jesu a dula dijong le ba lesome le metšo e mebedi. ₂₁Ge ba eja, a bolela a re: Ruri, ke a le botša, e mongwe wa lena o tlo nkeka.

₂₂Barutiwa ba nyama pelo ka gogolo, ba thoma go mmotšiša ka o tee ka o tee; ba re: Morena, a ke nna?

₂₃A fetola a re: E a inago seatla moruswing gotee le yena, ke a tlogo nkeka. ₂₄Ge e le Morwamotho, yena sa gagwe ke go tloga ka mo mangwalo a mmolelago; fela, wa madimabe ke motho yoo Morwamotho a ekwago ke yena. Go ka be go le kaone ge motho yoo a ka be a sa tswalwa.

₂₅Gwa bolela le Judase, yena wa go mo eka, a re: Moruti, a ke nna?

Jesu a re: O boletše.

₂₆Ge ba eja, Jesu a tšea senkgwa, a leboga, a se ngwathaganya, a se neela barutiwa, a re: Tšeang le je, ke mmele wa ka.

₂₇A tšea senwelo, a leboga, a ba neela sona, a re: Nwang sona bohle. ₂₈Ke madi a ka a kgwerano e mpsha, a tšhollwago ka baka la ba bantši, e be go lebalelwa dibe. ₂₉Gomme ke a le botša, go tloga bjale nka se hlwe ke enwa seenywa se sa morara, go fihla mehleng yeo ke tlogo buša ke se nwa le lena mmušong wa Tate.

₃₀Ge ba feditše go opela kopelo, ba tloga ba ya thabeng ya mehlware.

₃₁Ya re ge ba sa ya. Jesu a bolela a re: Lena ka moka bošego bjo le tlo gakanega ka tše ke tlo go di dirwa; gobane go ngwadilwe gwa thwe: Ke tlo otla modiši, mme dinku tša mohlape di tlo gašanywa. ₃₂Fela, e tlo re ge ke tsogile, ke tlo le eta pele ra ya Galilea.

₃₃Gwa fetola Petro a re: Le ge bohle ba ka gakanega ka tše o tlogo di dirwa, nna nka se ke ka ba ka gakanega.

₃₄Jesu a re: Ruri, ke a go botša, ka bjona bošego bjo, mogogonope o sešo wa lla, o tlo ba o latotše gararo wa re ga o ntsebe.

₃₅Petro a re: Le ge nka thwe ke hwe nago, nka se latole ka realo.

Le barutiwa ba bangwe bohle ba realo.

₃₆Ya ba gona ba fihlago felo go bitšwago Getsemane; Jesu a bolela le barutiwa a re: Dulang mo, ge ke sa ya mola go rapela. ₃₇A tloga le Petro le barwa bala ba babedi ba Tsebedeo, a ya le bona, mme a thoma go nyama le go tlalelwa. ₃₈A bolela le bona a re: Moya wa ka o nyamile ka gogolo wa go iša lehung; dulang fa le itiše le nna.

₃₉A fetela pejana, a wela fase ka sefahlogo, a rapela a re: Tata, ge go kgonega, a senwelo se se fete se ntloge. Fela, e se be ka mo go ratago nna, e be ka mo go ratago wena.

₄₀A tla go barutiwa ba gagwe, a ba hwetša ba robetše; a bolela le Petro a re: Ea, ga la ka la kgona go itiša le nna nako e tee fela? ₄₁Phakgamang le rapele, gore le se tsene melekong; gobane moya o mafolofolo, mme nama e a fokola.

₄₂A buša a ya la bobedi, a rapela a re: Tata, ge go sa kgonege ge senwelo se se feta sa ntloga ke sa ka ka se nwa, gona a go dirwe thato ya gago. ₄₃Ya re ge a boa, a ba hwetša gape ba robetše, gobane mahlo a bona a be a imela ka boroko.

₄₄A ba tlogela gape, a ya a rapela la boraro, a boeletša mantšu ala. ₄₅A boela go barutiwa ba gagwe, a bolela nabo a re: A le robetše la khutša? Bonang, le kgauswi lebaka la gore Morwamotho a gafelwe matsogong a badiradibe. ₄₆Tsogang! Eriyeng! E a nkekago šo o fihlile.

₄₇A sa realo ke ge go etla Judase, e le e mongwe wa ba lesome le metšo e mebedi a tla a na le lešaba le lentši la ba ba swerego marumo le melamo, ba etšwa go baperisita ba bagolo le go ba bagolo ba setšhaba. ₄₈Gomme yena moeki o be a lakane le bona a re: Yo ke tlogo mo atla, ke yena! Le sware yena yoo!

₄₉A napa a batamela Jesu, a re: Dumela, Moruti, mme a mo atla.

₅₀Jesu a mmotšiša a re: Mogweraka! O tletšeng fa?

Ke mo ba batametšego ba iša matsogo, ba swara Jesu. ₅₁Ba bona e mongwe wa bao ba nago le Jesu, a khwamola tšhoša, a rema mohlanka wa moperisita e mogolo, a mo kgaola tsebe. ₅₂Jesu a mo sola a re: Bušetša tšhoša ya gago bodulong bja yona; gobane e a swarago tšhoša, o tlo bolawa ka yona. ₅₃A o re nka se kgone go kgopela Tate, a nthomela barongwa ba ba fetišago madira a lesome le metšo e mebedi? ₅₄Fela, ge nka realo mangwalo a a rego go swanetše go direga tšona tše a ka phethega bjang?

₅₅Ke yona nako ye Jesu a boletšego le lešaba leo a re: Le tšwile wa go tšwela mohlakodi ka marumo le melamo, e le go swara nna ke bego ke dutše le lena ka mehla ke ruta Ntlongkgethwa; fela, moo la se ntshware. ₅₆Fela, tše ka moka di direga gore go phethege mangwalo.

Ya ba gona barutiwa bohle ba mo tlogelago ba tšhaba.

₅₇Ba ba swerego Jesu ba mo iša ga Kayafa moperisita e mogolo, mo go bego go phuthegetše bamangwalo le ba bagolo. ₅₈Petro a latela a le kgole, a fihla lapeng la moperisita e mogolo, a tsena a dula le bahlanka gore a bone pheletšo. ₅₉Baperisita ba bagolo, le ba lekgotla ka moka ba nyaka bohlatse bja maaka bja go bega Jesu gore ba mmolaye. ₆₀Fela, ba bo hloka, le ge go tsoga dihlatse tše ntši tša maaka. Gwa ba gwa tsoga dihlatse tše pedi tša maaka, ₆₁tša re: Motho e o itše: Nka phušola Ngwako wa Modimo, ka o tsoša ka matšatši a mararo.

₆₂Moperisita e mogolo a ba a ema a mmotšiša a re: A ga o fetole ge batho ba ba go bea molato woo? Jesu a homola. ₆₃Ke mo moperisita e mogolo a mmotšišitšego a re: Ke go eniša ka Modimo a phelago, gore o re botše ge o le Kriste Morwa wa Modimo.

₆₄Jesu a fetola a re: O boletše gona; fela, ke a le botša go tloga bjale Morwamotho le tlo mmona a dutše ka letsogong le letona la Yomaatla, a etla ka maru a legodimo.

₆₅Ya ba gona moperisita e mogolo a gagolago diaparo tša gagwe, a re: O rogile Modimo. Re sa nyaka dihlatse tšang? Šedi, le mo kwele ge a roga Modimo. ₆₆Lena le reng?

Ba fetola ba re: O swanetšwe ke go ahlolelwa polao.

₆₇Bjale ba mo tshwela ka mare sefahlogong ba mo setla ka matswele; ba bangwe ba mo phasola dithama, ₆₈Ba re: Kriste, porofeta re go kwe; ke mang e a go setlilego?

₆₉Petro yena o be a dutše ka ntle lapeng. Gwa tla mosetsana a re: Le wena o be o na le Jesu wa Galilea.

₇₀Petro a latola, ba mo kwa bohle ge a re: Tše o di bolelago, nna ga ke di tsebe. ₇₁Ya re ge a re ke tšwela kgorong, e mongwe a mmona, a botša ba ba bego ba eme moo, a re: Motho yo o be a na le Jesu wa Natsaretha.

₇₂Petro a buša a latola, a ba a ena a re: Nna motho yoo ga ke mo tsebe.

₇₃Ka moragwanyana ba ba emego fao ba batamela, ba bolela le Petro ba re: Ka kgonthe le wena o wa bona, o ekwa ke mmolelo wa gago.

₇₄Bjale Petro a thoma go ithoga le go ena, a re: Motho yoo ga ke mo tsebe.

Gwa napa gwa lla mogogonope. ₇₅Ke mo Petro a eletšwego tše Jesu a di boletšego mola a re: Mogogonope o tlo ba o sešo wa lla, wena o latotše gararo wa re ga o ntsebe. A tšwela ntle a lla o bohloko.