Kotlo ya Egipita
1Tše di tletšego Jeremia e le lentšu la Morena le ela ditšhaba, šedi. 2Le ela Egipita le era dira tša Farao Neko kgoši ya Egipita, tše di bego di nokeng ya Forate kua Karakemisi, tšela tša go fenywa ke Nebukadinetsara kgoši ya Babele ka ngwaga wa bone wa pušo ya Joyakima morwa wa Josia kgoši ya Juda. 3Lokišang diphemo le dikotse, le tšwe dira. 4Bofang dipitsi le di nameleng, lena banamedi; le eme le rwele dikefa; kgwarihlang marumo le itlhame ka ditshipi. 5Ke reng ke bona ba nolega moko ka boela nthago? Dioka tša bona di fentšwe, di tšhaba di se sa peka, di dikilwe ke poifo. O realo Morena. 6Wa tšhii o šitwa go tšhaba; yo maatla ga a sa phologa. Ba kgopilwe mme ba wile gona kua leboa, lešing la noka ya Forate. 7Ke mang yena eo e a bego a tšhologa a etša noka ya Nile? A etša dinokana ge di tlala tša kgotlana? 8Ke Egipita ge a tšhologa boka noka ya Nile, a etša dinokana ge di tlala tša kgotlana; a re ke a tšhologa, ke yo gogola naga, ke yo tšea metse le baagi ba yona. 9Hee dipitsi, phalalang! Dikoloi, belolang! Hee bagale, šwahlelang! Lena Bakushe le Bapute ba go swara kotse, lena Baludi ba go swara bora ba bo nganga. 10La lehono le ke tšatši la Yena Mong wa bohle Morena wa mašaba; ke tšatši la tefetšo, la go lefeletša ba ba mo hloyago. Lerumo le tlo ja la hora, le tlo ba la tagwa ke madi a bona. Gobane go hlaba Yena Mong wa bohle Morena wa mašaba gona kua leboa nokeng ya Forate. 11Wene ngwanenyana wa Egipita, rotogela Gileada o yo epa mere; go thoba ke lefela; ga go se se kago go alafa. 12Ditšhaba di boditšwe tša ge o gobogile; naga e gala ka dillo tša gago; gobane mogale o theotšwe ke mogale, ba wa ka babedi.
13Šele lentšu le Morena a le boditšego Jeremia, la go re Nebukadinetsara o tlo tla a thuba naga ya Egipita. 14Goelelang Egipita, lentšu le kwale kua Migidolo le kua Nofe le kua Thagapanese, le re: Nanoga o eme, gobane rumo le ja batho bago thoko tšohle! 15Dinatla tša gago naa di kanamišwa ke eng? Motho ge a ušwa ke Morena, ga a tsoge. 16O ušitše ba bantši, ba wa wa go welana, ba ba ba re: Eriyeng re boele ga gešo, nageng ye re tswaletšwego mo go yona, re tšhabe rumo le le re fetšago. 17Farao kgoši ya Egipita le mo reeleng leina la Lešata Lefetalemakoto. 18Ka bophelo bjaka, o realo yena Kgoši Mong a ina la Morena wa mašaba, o re: O ela boka thaba ya Thabora dithabeng, boka Karamele lewatleng. 19Tlema merwalo, o a thopša, wene ngwanenyana wa go dula Egipita. Mme Nofe e tlo ba lešope, go tlo tšhungwa, gwa se šale wa go dula moo. 20Hee Egipita! O sethole se se botsebotse; mpobe o a tla o etšwa leboa, o a tla. 21Le bathwalwa bagwe, ba go etša dipoana tše nonnego, le bona ba a goma, bohle ba a tšhaba, ba se eme, ba tletšwe ke tšatši la bona, lebaka la go otlwa. 22Go kwala eke go tla noga, kgwašakgwaša, gobane ba tla ka bontši. Ba mo tlela ka dilepe, ba etša ba go tlo rema dihlare. 23Ba rema sekgwa sagwe, o realo Morena, le ge se teteane se sa tsenwe, gobane ba fetiša tšie ka go ata, ke ba ba sa balwego. 24Ngwanenyana wa Egipita o lewa ke dihlong, o gafetšwe diatleng tša tšhaba sa leboa.
25Morena wa mašaba Modimo wa Isiraele o re: Tsebang! Ke otla Amoni wa Noo, le Farao le Egipita, le medimo ya bona, Farao le bohle ba ba mmotilego. 26Ke ba gafela diatleng tša ba ba ratago go ba bolaya, matsogong a Nebukadinetsara kgoši ya Babele, matsogong a bahlanka ba gagwe. E tlo re ge tšeo di fetile, Egipita go tlo boela go agiwa bjalo ka mohlamonene. O realo Morena. 27Mme wene Jakobo mohlanka wa ka, se boife; wene Isiraele, o se tšhoge. Ke nna e, ke tlo go phološa le ge o le kgole; bana ba gago ke tlo ba phološa mo nageng ye ba thopetšwego go yona; Jakobo o tlo boa; o tlo itulela a iketla go se e a mo tšhošago. 28Mme wena o se boife, Jakobo mohlanka wa ka ka gobane e a nago le wene ke nna! O realo Morena. Tšhaba tšohle tše ke go raketšego go tšona, ke tlo di fediša. Ge e le wena, nka se go fediše. Ke tlo go otla ka mo go go swanetšego; nka se go lese o sa otlwa.
