JEREMIA 44

₁Šele lentšu le le tletšego Jeremia le era Bajuda bohle ba ba agilego Egipita, ba ba agilego Migidolo le Thagapenese le Nofe, le nageng ya Patarose. ₂Morena wa mašaba Modimo wa Isiraele o re: Mabošula ka moka a ke a tlišitšego godimo ga Jerusalema, le godimo ga metse ka moka ya Juda, le a bone. Seala marope a a sa dulego motho. ₃Molato ke bobe bja bona bjo ba bo dirilego ba nthumola, ge ba thuntšhetša medimo e šele diorelo, ba hlankela medimo ye e bego e sa tsebje ke bona, le lena, le botataweno. ₄Nna ke be ke fela ke ba romela bahlanka ba ka ba baporofeta, ka fela ke ba roma ke re: Hle lesang go dira dilo tšeo tša makgapha ao ke a hloilego. ₅Bona ba gana go kwa le go theeletša, le go lahla bobe bja bona, ba se lese go thuntšhetša medimo e šele diorelo. ₆Pefelo ya ka ya ba ya tšhologa, bogale bja ka bja tuka metseng ya Juda, le mo mekgobeng ya Jerusalema, ya ba marope le mašegerepe ao a mehla yeno.

₇Bjale Morena Modimo wa mašaba, Modimo wa Isiraele o re: Le reng le itshenya ka dibe tše kaakaa, la bolaiša banna le basadi le bana ba masea, la ba ntšha nageng ya Juda, la lesa le go itšhiela mašalela? ₈Le reng le nthumola ka mediro ya diatla tša lena ka go thuntšhetša medimo e šele diorelo fa nageng ya Egipita? Mo le falaletšego gona, ya ba go itshenya, la ba ba go kwerwa le go gobošwa ke ditšhaba tšohle tša lefase. ₉A le lebetše masenyi a botataweno, le masenyi a dikgoši tša Juda, le masenyi a basadi ba bona, le masenyi a lena, le masenyi a basadi ba lena, a ba bego ba a dira kua nageng ya Juda mo mekgobeng ya Jerusalema? ₁₀Le lehono ga ba ešo ba itshola, ga ba boife, ga ba sware tsela ya molao wa ka le ya ditaelo tša ka, tše ke di beilego pele ga bona le pele ga botatabo.

₁₁Bjale Morena wa mašaba Modimo wa Isiraele o re: Tsebang gore ke dutše ke le lebeletše, gore ke le dire bošula, ke fediše Juda ka moka. ₁₂Mašalela ka moka a Juda a lebišeditšego difahlogo fa Egipita go tlo diilela mo, ke tlo a tloša, ka moka a tlo felela fa Egipita; a tlo tekolwa ke lerumo le tlala, ba banyane le bagolo. Ba tlo bolawa ka lerumo le ka tlala; e tlo ba ba leroga, le ba setšhogo, ba sekwero le ba leepo. ₁₃Ba ba dutšego fa Egipita, ke tlo ba otla ka lerumo, le ka tlala, le ka dinkhu, bjalo ka ge ke otlile Jerusalema. ₁₄Mo go mašalela a Juda a go tla a diilela mono Egipita, go ka se be le e a tlogo phonyokga, le e a tlogo boela nageng ya Juda, ye a hlologetšwego go boela le go yo dula go yona. Ba ka se ke ba boela gona kua, ge e se matopana a tlogo phonyokga.

₁₅Gwa napa gwa fetola banna ba ba bego ba tseba gobane basadi ba bona ba thuntšhetša medimo e šele diorelo, le basadi ba ba bego ba eme moo, e le lešaba le legolo la batho ka moka ba ba bego ba agile nageng ya Egipita le Patarose, ba fetolo Jeremia ba re: ₁₆Taba yeo o e bolelago le rena leineng la Morena, mo go rena ga go na e a e kwago. ₁₇Rena re tlo dira tšohle tše re di boletšego ka melomo ya rena. Rena re tlo thuntšhetša mohumagadi wa legodimo diorelo, re tlo o tšhelela dino; re tlo dira tše di dirilwego ke rena le botatawešo, le dikgoši tša rena, le bakgoma ba rena, metseng ya Juda le mo mekgobeng ya Jerusalema, ra khora bogobe, ra phela gabotse, re se bone bošula. ₁₈Bjona bošula re bo bone mola re lesitše go thuntšhetša mohumagadi wa legodimo diorelo, re lesitše go o tšhelela dino; ya ba gona re hlokago tšohle, ra fela ka lerumo le ka tlala.

₁₉Basadi bona ba re: Ge re thuntšhetša mohumagadi wa legodimo diorelo, re o tšhelela dino, ge re o bopela dinkgwana tša go o swantšha, a re dira re se ne banna ba rena?

₂₀Ke mo Jeremia a boletšego le lešaba leo ka moka la banna le basadi, le batho ka moka ba na fetotšego ka mokgwa woo, a re: ₂₁Diorelo tšeo tša lena, ge le thuntšhetša medimo e šele metseng ya Juda le mo mekgobeng ya Jerusalema, lena le botataweno, le dikgoši tša lena, le setšhaba sa naga, ke re ke tšona tše Morena a di latilego a gopola tšona? ₂₂A ba a fela pelo ka bobe bja mediro ya lena, le ka makgapha a le a dirilego; ya ba gona naga ya lena e bago ya marope, ya setšhošo le maroga, ya hloka e a dulago mo go yona. Ke tšona tše le di bonago mehla yeno. ₂₃Molato ke ge le thuntšhitše diorelo tšeo, le befetše Morena ka go se kwe se a se boletšego, le gana go ya ka taelo tša gagwe le ka melao ya gagwe le ka mabohlatse a gagwe; ke tšona di le hloletšego mabošula a lehono.

₂₄Jeremia a bolela le setšhaba ka moka, le basadi ka moka, a re: Kwang lentšu la Morena, lena Bajuda bohle ba le lego mo nageng ya Egipita. ₂₅Morena wa mašaba Modimo wa Isiraele o re: Lena le basadi ba lena, tše le di boletšego ka melomo ya lena, ke tšona tše le di dirago ka diatla tša lena. Le boletše la re: Re tlo phetha tše re di enetšego mohumagadi wa legodimo ra re re tlo o thuntšhetša diorelo, re tlo o tšhelela dino. Napang gee, le tiiše dikeno tša lena. Napang gee, le phethe tše le di ennego. ₂₆Fela, le kwe se Morena a se bolelago, lena Bajuda ka moka le dutšego fa nageng ya Egipita. Tsebang, ke ena ka leina la ka le legolo. O realo Morena, o re: Lona leina la ka le, mo nageng ya Egipita go ka se be le Mojuda le o tee e a tlogo le bola a re: Ka bophelo bja Morena Mong wa bohle! ₂₇Le tsebe gore ke tla dula ke lebeletše gore ba tlelwe ke bošula, e sego botse; gomme banna ka moka ba Juda, ba ba lego fa Egipita, ba fele ka lerumo le ka tlala, ba be ba felele sa ruri. ₂₈Ba ba tlogo phonyokga lerumo, ba boa ba etšwa Egipita, ba ya nageng ya Juda, e tlo ba matopana fela. Ke mo mašalela ka moka a a falaletšego mono Egipita a tlogo lemoga lentšu le le phethegago e le la mang, ge e le la ka, goba ge e le la bona. ₂₉Seka se le tlogo bona ka sona sese, o realo Morena, le tlo bona ka sona gobane ke tlo ba ka le otla le le mono mo. Le tlo bona ka sona gore go tiile lentšu la ka la mabošula a a tlogo le wela. ₃₀Morena o re: Ke nna ke tlogo gafela Farao Hofura kgoši ya Egipita diatleng tša manaba a gagwe, diatleng tša ba ba ratago go mmolaya, bjalo ka ge ke gafetše Tsedekia kgoši ya Juda diatleng tša Nebukadinetsara kgoši ya Babele lenaba la gagwe le le bego le rata go mmolaya.