Mophološi e tlo ba Morwa wa Dafida. Baporofeta ba maaka
1Kotsi e tlo wela badiši ba ba senyago dinku tša mafulo a ka, ba di tšitlanya! O realo Morena. 2Ke tšona tše Morena Modimo wa Isiraele a di bolelago a era badiši ba go diša setšhaba sa gešo; o re le gašantše dinku tša ka, le di rakile; ga la ka la di hlola. Bjalo tsebang gore le tlo hlolwa ke nna ka molato wa bobe bja mediro ya lena, o realo Morena. 3Gomme nna ka noši ke tlo phutha mašalela a dinku dinageng ka moka tše ke di raketšego go tšona, ka di bušetša merakeng ya tšona, di tle di tswale di ate. 4Ke tlo di beela badiši, mme bona ba tlo di diša, di se hlwe di boifa di tšhoga gwa se be le e hlokwago. O realo Morena.
5Morena o re le tsebe gore go tlo tla matšatši, a ke tlogo tsošetša Dafida lehlogedi la makgonthe; e tlo ba kgoši e bušago e tlogo tšweletša molao le toko nageng. 6Mehleng yeo Juda o tlo phološwa, Isiraele o tlo dula a iketlile; mme leina le ba tlogo mmitša ka lona šele Morena toko ya rena.
7Ke gona le tsebe gore go tlo tla matšatši ao go ka se kego gwa thwe: Ka bophelo bja Morena e a ntšhitšego Isiraele nageng ya Egipita! 8Ge e se go re: Ka bophelo bja Morena, e a bothilego bana ba moloko wa Isiraele ba a ba ntšhitšego nageng ya leboa, le dinageng ka moka tše a bego a ba leleketše go tšona; o tlo ba agiša nageng ya gabo. 9Baporofeta, ge ke ba bona, ke setlega pelo, ke kwa ke nolega moko, ke etša e a builwego, monna wa go fenywa ke sebela. Go bjalo ke lebana le Morena le mantšu a makgethwa a gagwe. 10Gobane naga e tletše diotswa, mme naga e lla e bona mahloladikotsi. Mafulo a nageng a omeletše, gobane ba tšea ka tsela ya bobe; maatla a bona ga a iše go lokeng.
11Ke ka gobane bohle, moporofeta le moperisita ba gobogile, ešita le Ngwakong wa ka ke hwetša bobe bja bona. O realo Morena. 12Bjale tsela ya bona e tlo ba fetogela matheledi, leswiswi e le le legolo; ba tlo kgorometšwa ba wa moo; ka gobane ke tlo ba tlišetša mabošula ka ngwaga wa go ba lefetša. O realo Morena. 13Go baporofeta ba Samaria ke bone bošilo bja ge ba porofeta ka Baali, ba aroša tšhaba sa ka sa Isiraele. 14Go baporofeta ba Jerusalema ke bona mabohlola, ba dira bootswa, ba ya le maaka, ba ema le disenyi gore motho a se lahle tsela ya bobe bja gagwe. Nna ke hwetša bohle ba swana le ba Sodoma le batho bala ba Gomora.
15Bjale Morena o ra baporofeta bao ge a re: Tsebang, ke tlo le noša tše di galakago, ke tlo le leša bohlwele; gobane bootswa ge bo aparetše naga yohle, bo tšwele go baporofeta.
16Morena wa mašaba o re: Le se ke la theetša mantšu a baporofeta bao le porofetelwago ke bona, ba le dira tša maphalo, ba le botša pono tša maithatelo; ga ba botšwa ke Morena. 17Ba fela ba botša bao ba nnyatšago, ba re: Morena o re le tlo ba le molao! Mme bohle ba ba yago le bonganga bja dipelo tša bona, ba ba botša ba re: Le ka se ke la tlelwa ke bošula!
18Ka kgonthe, ga go a nago thopa le Morena, a bona, a kwa ntšu la gagwe: ga go a kwago se Morena a se boletšego mme a di lemoga. 19Tsebang, ledimo la Morena la kgalefo le tlo tsoga, e le sesesedi sa go dikologa, se se tlogo tšubutla dihlogo tša ba babe. 20Bogale bja Morena bo ka se ke bja phohla a sešo a di dira, a phetha mogopolo wa pelo ya gagwe. Le tlo di lemoga ka mehla e tlago.
21Bona baporofeta bao ba kganyela ba sa rongwa ke nna; mme ba porofeta ke sa ka ka bolela nabo. 22Ge ba ka be ba le thopa le nna, ba ka be ba botša tšhaba sa ka tše nna ke di boletšego, ba se lahliša tsela tše mpe tša sona, le mediro e mebe ya sona.
23A le re ke fo ba Modimo wa kgauswi fela? O realo Morena. A ga ke Modimo le wa kgole? 24A motho a ka yo utama mo go sa tsebjego, ka se ke ka mmona? A ga se nna ke tletšego magodimo le lefase? O realo Morena. 25Tše baporofeta bao ba di porofetago ka ina la ka ke di kwele, ge ba porofeta maaka ba re: Ke lorile! Ke lorile! 26Di yo feletša kae tšona tšeo di lego pelong tša baporofeta bao? Ke baporofeta ba maaka; ba porofeta bofora bja pelo tša bona. 27A fa ba rata go lebatša tšhaba sa ka ina la ka ka diloro tša bona, ge ba botšana tšona; tša tlo ba tša etša mehla yela ge borrabo ba lebetše ina la ka ka Baali? 28Moporofeta wa diloro a a laodiše tšona. E a nago le lentšu la ka a a bolele lona a rereše. Moko o nyakang mabeleng? O realo Morena. 29A Lentšu la ka ga le bjalo ka mollo? O realo Morena. A ga le bjalo ka noto e pšhatlago maswika? 30Bjale tsebang ge; ke lwa le baporofeta bao ba go utswetšana mantšu a ka. O realo Morena. 31Le tsebe gore bona baporofeta bao ke lwa nabo, o realo Morena, bona bao ba ba hautšago tša maleme a bona, ba re: Go boletše yena! 32Le tsebe gore ke lwa le baporofeta ba diloro tša maaka. O realo Morena, ba di anegela batho, ba aroša tšhaba sa ka ka maaka a bona, le ka magafane a bona, ba bolela ba sa rongwa ke nna, ba sa laelwa ke nna. O realo Morena.
33Ge tšhaba se se ka go botšiša, le ge e le moporofeta, le ge e le moperisita, ba tla ba re: Morwalo o tlogo tšwa go Morena ke ofe? Gona o ba botše o re: Le ra morwalo? Ke lena ba ke tlogo ba lahla fase! O realo Morena. 34Yena moporofeta yo, le ge e le moperisita, le ge e ka ba motho wa setšhaba, e a rego: Morwalo wa Morena. Yena ke tlo mo otla le ba lapa la gagwe. 35Se le swanetšego go botšana seng sa lena sese; le re: Morena o fetotše a re eng? Morena o boletše a re eng? 36Le se hlwe le bua le re: Morwalo wo o tšwago go Morena! Gore motho a se tlo tšhoga lentšu leo le mo fetogetše wona morwalo wa Morena: gobane mehleng yeno le retola mantšu a Modimo, a yena Morena wa mašaba Modimo wa lena. 37Botšiša baporofeta o re: Morena o go fetotše ka lefe? Morena o boletše a re eng? 38Ge le fela le re: Morwalo wa Morena! Gona Morena o re: Ke tlo lefetša molato woo, ka gobane ke le ileditše go re: Morwalo wo o tšwago go Morena! 39Ka molato woo ke tlo ba ka le ngala moka, ka le raka pele ga ka, lena le motse wo ke bego ke o neetše bolena le botataweno. 40Ke tlo le iša kgobogong e sa felego, le dihlonyeng di sa felego, tše di ka se kego tša lebalwa.
