Jeremia o botša magoši a Juda se se tlo a tlela
1Morena o re: Theogela kwa ngwakong wa kgoši ya Juda, o yo bolela lentšu le: 2O re: Wene kgoši ya Juda e o dutšego sedulong sa Dafida, wene le bahlanka ba gago le setšhaba sa gago se tsenago ka dikgoro tše, kwang lentšu la Morena. 3Morena o re: Ahlolang ka molao le ka toko; le namolele mohlaki ge a pateletšwa. Lesang go hlakiša wa lethoko le sešuana le basadi ba bahlologadi. Le se ke la ba dira ka thata: gomme felo fa le se ke la tšholla madi a a se nago molato. 4Ge le ka dira ka mokgwa wo, ke mo ka kgoro tše tša motse wo go tlogo fela go tsena dikgoši tša go tlo dula sedulong sa Dafida; di tlo sepela ka dikoloi le ka dipitsi, di na le bahlanka le setšhaba sa tšona. 5Fela, ge le sa kwe mantšu a, gona Morena o re: Ke enne ka nna ka re: Ngwako wo e tlo ba lešope.
6Ka gobane ngwako wo wa kgoši ya Juda, Morena o o boletše a re: O thaba ya ka ya Gileada; o ntlha ya Libanoni! Fela, le ge go le bjalo, ke tlo go dira lehanata la metse ya marope. 7Ke tlo go laolela bathosanyi ba ba nago le dilepe, ba go tlo remakanya botšhephi bjo bja merokwana, ba bo lahlela mo mollong.
8Mme motseng wo go tlo feta ba ditšhaba tše dintši, mme ba tlo botšišana ba re: Molato ke ofe, ge Morena a dirile motse o mogolo wo ka mokgwa o bjalo? 9Mme ba tlo re: Ke ka gobane ba tlogetše kgwerano ya Morena Modimo wa bona, ba yo khunamela medimo e šele ba hlankela yona. 10Se lleleng e a hwilego; se mo hlokofaleleng! Wa go llelwa kudukudu e be mofaladi; a ka se hlwe a boa a bona naga ye a tswaletšwego mo go yona.
11Gobane Morena o boletše a era Salume morwa wa Josia kgoši ya Juda, e a bušago legatong la Josia tatagwe, e a tlogilego fa, a re: A ka se hlwe a boa, 12Gobane o tlo hwela gona kua ba mo išitšego gona e le lethopša; a ka se hlwe a bona naga ye. 13Kotsi e tlo wela mothealapa ka go se loke, a aga nywako a ila molao; a direlwa ke wa gabo a se mo leboge, a se mo fe moputso wa mediro yagwe. 14A re: Ke tlo ikagela ngwako o motona, wa diphapoši tše kgolo, wa mathudi a a ahlamego, ke manege ka mamati a morokwana, ke take ka phepakhwibidu. 15A o re bogoši ke go kgantšha mamati a morokwana? A ga ke re tatago o be a eja a enwa, a ya ka molao le ka toko, a nape a atlega? 16A atlega ka go ahlolela babotlana le badiidi. A ga se gona go tseba nna? O realo Morena. 17Ge e le a gago mahlo le pelo ya gago, ke tša go tsoma khumo fela, le go tšholla madi a a se nago molato, le go kateletša le go dira ka sehlogo.
18Ke ka baka la tše bjalo ge Morena a bolela le Joyakima morwa wa Josia kgoši ya Juda a re: A ka se llelwe a thwe: Joo ngwanešo joo! A ka se llelwe a thwe: Joo kgaetšedi joo! Ba ka se mo llele ba re: Joo kgoši joo! Joo bogoši bjola joo! 19O tlo epelwa boka pokolo, a gogwa a yo lahlelwa kgole le dikgoro tša Jerusalema. 20Namela Libanoni o yo goelela! O yo hlaboša lentšu kua Basani! O yo goelela Abarima! Gobane bohle ba o bego o ba rata ba robagantšwe. 21Ke boletše nago mola o sa letlega; wena wa re: Ga ke rate go kwa! Ya ba wona mokgwa wa gago go kwa lentšu la ka. 22Badiši ba gago ka moka ba tlo tšewa ke ledimo; ba o bego o ba rata ba tlo išwa kgolegong. O tlo šala le dihlong, o nyatšegile ka bobe bja gago bjohle. 23Wene Modula-Libanoni, o ikagetšego sehlaga sa morokwana, a o ka se tsetle ge o tletšwe ke mahloko, o šokwa wa mmelegi!
24Morena o re: Ka bophelo bja ka, ge Konya morwa wa Joyakima kgoši ya Juda e ka be e le palamonwana ya segatiši seatleng sa ka sa le letona, nka be ke mo tshwamola. 25Ke tlo go gafela matsogong a ba ba ratago go go bolaya, matsogong a bao o ba boifago, matsogong a Nebukadinetsara kgoši ya Babele, matsogong a Bakaladea. 26Ke tlo go lahlela kua nageng e šele, o na le mmago e a go belegego, kua nageng ye le sa tswalelwago go yona; mme le yo hwela gona kua. 27Ba ka se ke ba boela nageng yeno, ye ba tlogo hlologelwa go boela go yona.
28A monna eo Konya ke pitša e lahlwago, e phumegilego? A ke moeta o sa thabišego? O reng a rakwa le bana, ba lahlelwa kua nageng ye ba sa e tsebego? 29Hee naga! Naga! Naga! Kwaa lentšu la Morena! 30Morena o re: Monna eo mo ngwaleng, le re ga a ne bana, ke monna mosekgoneselo bophelong bja gagwe; gobane mo go bana bagwe ga go na moatlegi wa go tlo dula sedulong sa boDafida mme a buša Juda.
