JEREMIA 20

₁Pashuri morwa wa Imere, yo e bego e le moperisita le molaki wa baleti ba Ngwako wa Morena, ge a ekwa Jeremia a goelela taba tšeo, ₂A itia Jeremia moporofeta, a mo iša kgolegong ya ka tletlolo ga kgoro ya Benyamini hleng ga Ngwako wa Morena. ₃Ka la ka moswana ge a mo ntšha kgolegong, Jeremia a bolela nae a re: Morena ga a sa tlo go bitša ka la Pashuri; bjale leina la gago ke Tšhogothokotšohle. ₄Gobane Morena o re: Ge e le nna ke go beile wa go tšhoga le go tšhoša bohle ba ba go ratago; ka gobane ba tlo fela ka lerumo la manaba a bona wena o di bona ka mahlo a gago. Bajuda ka moka Ke tlo ba gafela diatleng tša kgoši ya Babele, e ba thope e ba iše kua Babele, e ba bolaye ka lerumo. ₅Mme mahumo ka moka a motse wo le menono ka moka ya wona, le matsaka ohle a wona, le thoto yohle ya magoši a Juda, Ke tlo di gafela diatleng tša manaba a bona; a tlo di thopa a di iša kua Babele. ₆Mme wena Pashuri, le bohle ba lapeng la gago, le tlo ya bothopša. O tlo fihla kua Babele, wa tlo hwela gona, wa bolokwa gona, wena le bohle ba ba go ratago, ba o ba porofetelago ka maaka.

₇Morena, o mphegeletše ka fenyega; wa ntshwara ka maatla wa nkgona, ka ba mohlwakesegwa, ka moka ba nkwera. ₈Ge nka re ke a bua, e ba mokgoši wa khulo le mašegerepe. Nna lentšu la Morena le ntlholela dithogo le dikwero tša ka mehla. ₉Ge nka re ke mo lebale, ke lese go bola leina la gagwe, ke kwa mo pelong go mphiša boka mollo o tukago, o ntsene mašapong. Ka ipolaiša kgotlelelo ka palelwa. ₁₀Ka kwa ge ba ntsota ba re: Tšhogothokotšohle mmege, le rena re tle re mmege; ka moka e le baagišani ba ka, mme ba nthea ba re: Mohlomongwe a ka šaetša, ra mo swara ra itefeletša. ₁₁Morena o na le nna. Yena mogale yo maatla. Ke tšona di tlogo uša bantlhoi; ba ka se kgone selo; ba tlo lewa ke dihlong tše kgolo ba paletšwe; e tlo ba dihlong tše kgolo ba paletšwe; e tlo ba dihlong tša neng le neng di sa lebalwego. ₁₂Morena wa mašaba, Molekababolo. Mohlathapelo le matswalo! A nke ke bone ge o lefetša. Nna taba ya ka ke gafetše wene. ₁₃Hlabang sefela sa Morena le mo rete, monamolela phelo bja mmotlana diatleng tša mašaedi. ₁₄Ke roga tšatši lela la go tswalwa ga ka, tšatši le mme a mpelegego ka lona; a le se hlwe le šegofatšwa. ₁₅Ke roga motho yola wa go botša tate a re: O belegetšwe ngwana wa mošimanyana! A re o a mo thabiša. ₁₆Motho eo a a etše metse yela ye Morena a e phekgotšego, a se e gaugele; motho eo a kwe dillo e sa le bošego, a kwe mekgoši e le mosegare. ₁₇Ke ge a sa ka a mpolaya ke sešo ka belegwa, mme a ba lebitla la ka, a dula a imile go ya go ile. ₁₈Ke tšwetše eng mola ke belegwa? Ke belegetšwe go tlo bona tapišego le majapelo, go yo feletša phelo bjaka dihlonyeng.