JEREMIA 19

₁Morena o boletše a re: Yaa o ithekele moeta wa letsopa; o ye le ba bangwe ba bagolo le setšhaba le baperisita. ₂O tšwele moeding wa Bene Hinomi ka kgorong ya dithobolo; o le moo o goelele mantšu a ke tlogo go botša ona. ₃O re: Kwang se Morena a se bolelago, lena dikgoši tša Juda le lena baagi ba Jerusalema. Morena wa mašaba Modimo wa Isiraele o re: Tsebang gobane ke tlo tliša kotsi felo fa, kotsi ye mang le mang e a e kwago a tlogo tsirinyega tsebe. ₄Ka gobane ba ntahlile; le felo fa ba go sentše; ba ipega go medimo e šele, ye bona le botatabo le dikgoši tša Juda, ba bego ba sa e tsebe. Mme felo fa ba go tladitše madi a se nago molato. ₅Ba agetše Baali meboto, ba fiša bana ba bona ba ba dira didimo tša Baali. Ba dirile tše ba sa kago ba di botšwa ke nna, tše di sa kago tša ba tša rotoga pelong ya ka. ₆Molato ke wona woo, Morena ge a re: Go tlo tla matšatši a go sa tlogo bolelwa tša Thofethe le tša moedi wa Bene Hinomi; go tlo bolelwa Moedi wa Polao. ₇Ke mo felo fa ke tlo go pšheša maano a Juda le a Jerusalema, ge ke tlo ba tekola ka marumo, ge go fihla manaba a bona, ba fela ka diatla tša bao ba ratago go ba bolaya. Mme ditoto tša bona ke tlo di gafa, ya ba dijo tša manong a sebakeng, le tša dibata tša naga. ₈Motse wo ke tlo o dira setšhošetši le sekwero; ba ba tlogo feta felo fa, ba tlo tšhoga, ba tlo kwera ka baka la dikotlo tše kaakaa. ₉Ke tlo ba leša nama ya barwa ba bona, le nama ya barwedi ba bona; motho o tlo ja nama ya wa gabo mohla ba rakeletšwe ke manaba, ba gakanegile ka go pitlaganywa ke ba ba ratago go ba bolaya.

₁₀O realo; e be gona o pšhatlago moeta woo, banna bao ba ilego nago ba di bona. ₁₁O tsebo re: Morena wa mašaba o re: Setšhaba se le motse wo ke tlo di pšhatla bjalo ka ge pitša ya mmopi e pšhatlwa, ya se hlwe e kgomaranywa. Gona mo Thofethe go tlo fihlwa bahu ka go hloka mo go kago fihlwa bahu. ₁₂Ke tšona tše di tlogo dirwa felo fa le bohle ba ba agilego mo. O realo Morena. Motse wo ke tlo o dira wa swana le Thofethe. ₁₃Ke mo nywako ya Jerusalema le nywako ya dikgoši tša Jerusalema di tlogo ka Thofethe, felo fa ga ditšhila, le nywako ka moka ye hlakeng ya tšona ba bego ba thuntšhetša makoko a legodimo diorelo, ba tlišetša medimo e šele dibego.

₁₄Ya re ge Jeremia a tšo boa Thofethe, mo a bego a rometšwe ke Morena go yo porofeta gona, a ya a ema lapeng la Ngwako wa Morena, a bolela le setšhaba ka moka a re: ₁₅Morena wa mašaba Modimo wa Isiraeli o re: Tsebang gore motse wo le metse yohle ke tlo e tlišetša bošula ka moka bjo ke bo boletšego, gobane ba a nganga, mme ba gana go kwa.