JESAYA 66

₁Morena o re: Magodimo ke sedulo sa ka sa bogoši; lefase ke bogato bja dinao tša ka; bjale ngwako wo le kago nkagela wona o ka ba kae? Le bodulo bjo nkago khutša gona bo ka ba kae? ₂Etšwe dilo tšohle tše di lego gona di dirilwe ke diatla tša ka, tša kgona go ba gona! O realo Morena. Se nna ke se šetšago ke mohlaki, ke wa pelo e setlegilego, e a boifago se ke se boletšego.

₃E a hlabago pholo o ka mmolayabatho; e a hlabago nku o ka thobampšamolala; motlalesedimo eke o tliša madi a kolobe; e a fišago diorelo eke o lotšha modimo o šele. Ge ba inyaketše tša bona ditsela, dipelo tša bona tša kgahlwa ke makgapha a bona, ₄Nna ke tlo ba nyakela tša go tlo ba šišimiša, ka ba tlišetša tše ba di šiago; ka gobane ke biditše gwa se arabe motho; ke boletše gwa hlokwa e a kwago. Ba dirile tše di mpefetšego; ba inyaketše tše nna di sa nkgahlego.

₅Kwang lentšu la Morena, lena le boifago se a se boletšego. Ba geno ba ba le hloilego, ba le raka ka baka la leina la ka, ba re Morena a a bonatše letago lagwe re tle re bone se le se thabelago, bona bao ba tlo lewa ke dihlong. ₆Go kwala mokgoši motseng, o kwala Ngwakong o mokgethwa. Theetšang! Morena o lefetša manaba a gagwe mediro ya ona.

₇Motse o belege, o sešo wa šonopega; o be o sešo wa swarwa ke lešoko, wa ba o šetše o swere ngwana wa lesoganyana. ₈Tše bjalo di kile tša kwewa ke mang? Tše bjalo di kile tša bonwa ke mang? A naga e ka tswalwa ka tšatši le tee? A setšhaba se ka tswalwa ka gatee? Ge e le Tsione, o re o sa šonopega wa be o šetše o belege bana ba wona. ₉Bjale a nka bula tswala, ka lesa go tswadiša? O realo Morena. Ge nna ke le yena motswadiši, a nka di thibela? O realo Morena Modimo wa gago. ₁₀Thabang le Jerusalema, le o hlalalele ka moka ba o ratago! Thabang le wona ka go nyakalala, bohle ba le bego le o llela! ₁₁Gore le anye mabele a wona, le hore mahomotšapelo, le kgolwe ruri le ipshine ka botlalo bja bokwala bja wona.

₁₂Gobane Morena o re: Tsebang ge e le nna ke išago khutšo go wona, ya ela boka noka; mme mahumo a ditšhaba a tlo tšhologela go wona boka noka ge e tletše. Le tlo amušwa, le tlo pepulwa, le tlo farwa difarong. ₁₃Ke tlo le homotša bjalo ka ge motho a homotšwa ke mmagwe; le tlo homotšwa gona fa Jerusalema. ₁₄Ge le di bona, ke mo dipelo tša lena di tlogo thaba; ditho tša lena tša tlo taga wa botala bjo bofsa; ke mo seatla sa Morena se tlogo tsebiwa ke balata bagwe, ge a galefetše manaba a gagwe.

₁₅Le tsebe gobane Morena o etla ka mollo; dikoloi tšagwe di le bjalo ka ditimo, a tuka bogale wa mollo, a kgalema ka dikgabo di tukago. ₁₆Gobane Morena nama ka moka o tlo e ahlolela ka mollo le ka lerumo la gagwe; gomme go tlo ata ba Morena a ba fedišago.

₁₇Ke bona baikgethi bao ba go hlapa dirapeng tša medimo, ba goloma ka nthago ga e mongwe wa bona, ba eja dinama tša kolobe, le diila, le magotlo; ba tlo gogolwa ka moka. O realo Morena.

₁₈Gomme nna ke tseba mediro ya bona le kelelo tša bona. Go tlo tla tšatši la go botha bantle bohle le maleme ohle. Ba tlo tla ba bona letago la ka. ₁₉Ke tlo ba beela seka; ba bangwe ba bona e lego baphonyokgi, ke tlo ba roma ba ya go bantle ba kua Tarasisi, le kua Phule, le kua Ludi go bangangamara, le Thubala, le Jafane, le go dihlakehlake tša kua kgole, mo go sešogo gwa fihla tumo ya ka, mo go sešogo gwa bonwa tago la ka; mme ba tlo anegela bantle tago la ka. ₂₀Ba tlo tliša bana beno bohle, ba ba ntšha ditšhabeng ka moka, ba ipega go Morena ka bona. Ba tlo ba tliša ka dipitsi le ka dikoloi, ba rwelwe ka boako, ba nametše meila le kamela. Ba tlo ba tliša fa Jerusalema thabeng e kgethwa ya ka. O realo Morena. Go tlo etša mola, Baisiraele ba etla le dibego ka dibjana tše di hlapilego, ba di tliša mo Ngwakong wa Morena. ₂₁Ba bangwe ba bona ke tlo ba hlaola ka ba dira baperisita le Balefi. O realo Morena.

₂₂Mme moloko wa lena o tlo dula o le gona; le maina a lena a tlo dula a le gona, boka legodimo le lefase le lefsa le ke tlogo le dira, ge di tlo dula di le gona pele ga ka. ₂₃Mme e tlo fela e re kgwedi e balama, le ka Sabatha e nngwe le e nngwe nama ka moka e tlo tla ya khutša pele ga ka. O realo Morena. ₂₄Ba tlo tšwa ba yo bona ditoto tša bao ba ntlhanogetšego; gobane seboko sa bona se ka se ke sa hwa, mme mollo wa bona o ka se ke wa tima; mme e tlo ba selalogi go nama ka moka.