Jeremia o biletšwa boporofeta
1Mantšu a Jeremia morwa wa Hilikia, yo e bego e le e mongwe wa baperisita ba Anathothe nageng ya Benyamini. 2Yena yo lentšu la Morena le mo tletše mehleng ya Josia morwa wa Amoni kgoši ya Juda ka ngwaga wa lesome la metšo e meraro wa pušo ya gagwe. 3Le mo tletše le mehleng ya Joyakima morwa wa Josia kgoši ya Juda, gwa ba gwa fela ngwaga wa lesome la motšo o tee wa Tsedekia morwa wa Josia, yo e bego e le kgoši ya Juda go fihla ge ba Jerusalema ba thopiwa ka kgwedi ya bohlano.
4Lentšu la Morena le mo tletše la re: 5Ke go tsebile mola ke sešo ka go bopa mo mmeleng wa mmago, o sešo wa belegwa, ka go bea gore o be moporofeta wa ditšhaba.
6Mme nna ka re: Joo Morena Mongaka! Hleng ga ke tsebe go bolela ka ge ke sa le ngwana!
7Ke mo Morena a itšego: O se re: Ke sa le ngwana, gobane o tlo ya gohle mo ke go romago; mme tšohle tše ke tlogo go laela, o tlo di bolela. 8Se boife batho; nna ke tlo ba le wena, ka go hlakodiša! O realo Morena.
9Morena a ntšha seatla a fathiša molomo wa ka a bolela le nna a re: O tsebe gore ke bea mantšu a ka molomong wa gago. 10Lehono ke gona ke go beago mookamedi wa ditšhaba le mebušo, gore o tomole, o phušole, o fediše, o rutle, o age, o bjale.
11Lentšu la Modimo la buša la ntlela la re: Jeremia, o bonang?
Nna ka re: Ke bona thupa ya mophafogi.
12Morena a re: O bone gabotse! Ke nna Mophafogelalentšu ka gore ke le phethe.
13Lentšu la Morena la buša la ntlela la re: O bonang?
Nna ka re: Ke bona pitša e belago, e leba mono e le thoko ya leboa.
14Morena a re: Bošula bo tlo hlaga thoko ya leboa bja wela bohle ba ba agilego mo faseng. 15Gobane ke nna ke tlogo bitša lete tšohle tša mebušo ya leboa. O realo Morena. Ba tlo tla ba bea didulo tša bona mo go tsenwago kgorong tša Jerusalema ka gona, tša okamela metse ka moka ya Juda. 16Ke mo ke tlogo ba sekiša ba bola bobe ka moka ga bona, bja ge ba ntlhala ba yo fiša diorelo tša medimo e šele, ba khunamela bopja tša diatla tša bona. 17Mme wena itleme letheka o tsoge, o ba botše tšohle tše ke tlogo go laela tšona. O se ke wa ba tšhoga, ke se tlo go tšhoša o le pele ga bona. 18Ge e le nna, lehono ke go dira motse wa sebo, kokwane ya tshipi, morako wa mphiri wa go okamela naga yohle, le kgoši ya Juda, le tona tša gona, le baperisita ba gona, le tšhaba sa naga. 19Le ge ba tlo lwa nago, ba ka se go kgone, gobane e a lego le wena ke nna, gore ke go hlakodiše. O realo Morena.
