Babele go tlo hulwa ke Bameda
1Moenomoela Babele wa tše di bonwego ke Jesaya morwa wa Amotsi.
2Tsemang sefoka thabeng ya legwete, le ba hlabele mokgoši; le emišeng seatla le ba bitše, ba tsene ka dikgoro tša mošate. 3Ke nna ke rapilego ba ke ba digilego, ka bitša le bagale ba ka ba tle ba feletše bogale bja ka mo go bao ba nyatšago bogolo bja ka,
4Kwang modumo kua dithabeng, e kego ke wa dira tše dintši! Kwang mašata a mebušo ya ba ntle ge ba kokelana! Morena wa mašaba o lekola madira a gagwe. 5Ba tšwa kua dinageng tša kgole morumong wa leratadima; ke Morena le marumo a sehutla sagwe, a go senya lefase ka moka.
6Hlabang mokgoši, gobane tšatši la Morena le kgauswi, e ke go tla tšhwalalano ye e tšwago go Yogodimo. 7Ke ka baka leo ge matsogo ohle a rephile, ge go gakanega dipelo tša batho bohle. 8Ba tlaletšwe, ba tsenwe ke mahloko le mašoko, mme ba šonopega bjalo ka mmelegi; ba lebana ba khutlola mahlo a tukago boka mollo. 9Seleo tšatši la Morena, le etla e le la sehlogo, la sehutla le bogale bo tukago, la gore naga e šale e le marope, go fedišwe disenyi mo go yona. 10Gobane naledi tša legodimo, le boMagakgala, di ka se hlwe di etša, letšatši le fifala le sa hlaba, le ngwedi ge o sa taga.
11Ke otla lefase ka baka la bobe bja lona, ke lata molato wa babe, ke fediša boikgantšho bja baipoti, ke uša letšeke la bapateletši. 12Ke tlo hlokofatša batho go fetiša tshipi e khwibidu, motho a tlo nyakwa boka tshipi e khwibidu ya Ofira. 13Ke ka baka leo ge ke tlo šišinya legodimo, lefase la tlo šutha madulong a lona, ka kgalefo ya Morena wa masaba, mohla go tuka bogale bja gagwe.
14Ba tlo etša phuti ye e tsošitšwego, mohlape o hlokago mooroši; motho a tlo leba mo go lego wabo, a nyaka setšhabelo mo nageng ya gabo. 15Bohle ba ba tlogo hwetšwa ba tlo hlabja; ba ba tlogo swarwa ba tlo tekolwa ka lerumo. 16Bana ba bona ba tlo pšhatlaganywa bona ba lebeletše; tša mo nywakong ya bona di tlo thopša, mme basadi ba bona ba katwa.
17Le tsebe gore ke tlo tsoša Bameda, ba ba sa lotego tshipitshehla, ba ba sa ratego tshipi e khwibidu. 18Bora bja bona bo kgabutla masogana; ga ba gaugele ngwana, le a sešogo a belegwa; mahlo a bona ga a setše lesea. 19Wena Babele, wena bokwala bja mebušo, wena seala sa makoko a Bakaladea, o tlo ribegetšwa bjalo ka Sodoma le Gomora mola e ribegetšwa ke Modimo. 20O tlo ba lešope go ya go ile, o ka se hlwe o agwa neng le neng; le Moarabia a ka se tle a hloma mokutwana, go tlo hlokwa le moraka wa modiša. 21E tlo ba matšaba a dibata; nywakong ye ya bona go tlo tlala marebiši, go tlo dula dimpšhe, go bina badimogatšana. 22Mo nywakong ya bona ya bogoši go tla lla phiri; phapošing tša bona tša mathabo go tlo lla diphukubje. Lebaka la tše bjalo le kgauswi; mehla ya tšona ga e sa tlo diega.
