HOSEA 8

₁Bea phalafala molomong! Ke ke lenong le le kgoulelago Ntlo ya Morena. Ke ka gobane ba hlanogetše kgwerano ya ka, le melao ya ka ba e lahla. ₂A ba tlo bitša nna ba re: O Modimo wa rena! Rena Baisiraele re a go tseba! ₃Ge manaba a manama Isiraele, ke ka gobane a hladile tše dibotse.

₄Ba beile dikgoši ba sa ka ba mpotšiša; ba bopa bakgoma nna ke sa tsebe. Ba itiretše medimo ka disilifera tša bona le ka digauta tša bona, mme ba amologa. ₅Hee Samaria! Namane yeo ya gago e a nkga! Bogale bja ka bo ba tuketše; ba tlo lesa neng go se kgonane le go setšwa? ₆Ke tše di hlagago go Isiraele. Di dirilwe ke morudi, mme ga se Modimo selo seo. Yona namane yeo ya Samaria e tlo pšhatlaganywa. ₇Ba bjetše phefo, ba buna ledimo. Ga go tšwe lebele; makgaba ga a tšwe bupi. Ge bo ka tšwa, bo tlo lewa ke bantle. ₈Isiraele o a metšwa; mo gare ga ditšhaba o bile selo se se sa thabelwego. ₉Gobane ba tšwele ba ya Asuri, boka pokolo ye e ikgapago; Baefuraimi ba reka barati. ₁₀Ge ba ipegile go bantle, nna bjale ke yo rapa bona bao; bona ba tlo šala ba notlega ka merwalo ya kgoši ya bakgoma.

₁₁Gobane Efuraimi o dirile aletare tše di ntši: mme dialetare tšeo tša ba fetogela dibe. ₁₂Ke ba ngwaletše melao ya ka gantšintši; mme bona ba e gerula. ₁₃Didimo tša dibego tša ka ba a hlaba; ke nama e lewago ke bona beng. Morena ga a ba thabele; ga a sa lebala makgopo a bona. O tlo lefetša dibe tša bona; ba tlo boela Egipita.

₁₄Gobane Isiraele o lebetše Mmopi wa gagwe, o aga nywako ya mošate. Juda o atiša metse ya dibo. Ge e le nna ke tlo roma mollo wa tšhuma metse ya bona, wa fiša nywako ya bogoši.