HOSEA 7

₁Ge ke re ke alafa Isiraele, go fela go utologa bobe bja Efuraimi, le bokgopo bja Samaria, ge go dirwa tša bofora, mahodu a tsena, kua ntle go gara bahlakodi. ₂Dipelong tša bona ga ba ikeletše ba re, bobe bja bona ka moka nna nka se bo lebale; bjale ba dikilwe ke ditiro tša bona; ke dula ke ba ela hloko.

₃Kgoši ba e thabiša ka dibe tša bona; bakgoma ba ba kgahla ka maaka a bona. ₄Ka moka ke bahlanogi; ba etša sebešo sa mmešadinkgwana sa magala a hlennego, a sa kgotleletšwe ge dinkgwana di dubilwe di sa kokomoga. ₅Ka monyanya wa kgoši ya rena bakgoma ba itwatša ka bogale bja sedila, mme kgoši e fane diatla le bakweri. ₆Dipelo tša bona di swana le sebešo sa leretha ka maano a mabe a bona; sekgoro sa bona se lala bošego, se tsoga e le mollo o tukago.

₇Ka moka ga bona ba fiša wa leretha sebešong, ba fiša babuši ba bona; ka moka magoši a bona a a tekolwa, go se na e a nthapelago.

₈Efuraimi o itswakanya le ditšhaba. Efuraimi ke sekgwana se se sa kago sa retololwa se bešwa. ₉Maatla a gagwe a lewa ke ba mathoko yena a sa tsebe; o tšhetšwe bopududu yena a sa tsebe. ₁₀Le ge boikgogomošo e le hlatse e begago Isiraele, ga ba boele go Morena Modimo wa bona; ga ba mo nyake, le ge di šetše di eme ka mokgwa woo. ₁₁Efuraimi o swana le leeba la setlatla le se nago mogopolo; ba bitša Egipita, ba ya Asuri. ₁₂Mohla ba yago ke tlo ba phurollela lokwa la ka, ka ba tanya bjalo ka nonyana tša sebakeng, ka ba otla ka mo go boditšwego phuthego ya bona.

₁₃Kotsi e tlo ba wela, ka gobane ba ntahlile; ba tlo phethegelwa ke mahlolakotsi ka ge ba ntlhanogetše; le ge ke re ke ba phološe, ba mpolela ka maaka. ₁₄Ge ba mpitša, ga di tšwe pelong; ba golola ba le dilaong; ba kgobokanela mabele le mabjalwa, mme nna ba ntahla. ₁₅Ba ntira yo mobe, mola e le nna ke ba rutilego ka ba tiiša matsogo a bona. ₁₆Ba a boaboa; fela, ga ba boe ba leba godimo; ba bjalo ka bora bo rephilego; bakgomana ba bona ba tlo tekolwa ke lerumo, ka molato wa mahlapa a maleme a bona. Ke sona se se tlogo ba hlolela a bona. Ke sona se se tlogo ba hlolela dikwero tša Baegipita.