Simei o roga Dafida. Abesalomo o dula mošate
1Ya re ge Dafida a sa katoga thaba a etla patogeng, gwa fihla Tsiba mohlanka wa Mefibosethe a dumesida; o be a na le dipokolo tše pedi, di belešitšwe dinkgwa tše makgolo a mabedi, le mekwapi e lekgolo ya morara, le lekuka la beine. 2Kgoši ya botšiša Tsiba ya re: O dirang ka dilo tše?
Tsiba a re: Dipokolo ke tša go namelwa ke ba mošate; dinkgwa le dikenyo tše ke mefago ya bahlanka; beine ke ya go tlo nowa ke ba ba lapago šokeng.
3Kgoši ya re: Morwa wa mong wa gago o go kae?
Tsiba a fetola a re: Yena o šetše Jerusalema, gobane a re: Bjale setšhaba sa Isiraele se tlo bušetša bogoši bja tate go nna.
4Kgoši ya re: Gona tšohle tše e lego tša Mefibosethe e tlo ba tša gago.
Tsiba a re: Ke a lotšha; anke mahlo a gago ke fele ke hwetša e le a mašweu, Kgoši Mongaka!
5Ya na ya re ge kgoši Dafida a etla Bahurimi, gwa tšwelela monna e mongwe wa moloko wa Saulo; leina la gagwe e be e le Simei morwa wa Gera; yena eo a tla a tšama a rogaka; 6a betša Dafida le bahlanka ba gagwe ka moka ka maswika, batho ka moka le bagale ka moka ba faregile Dafida, ba le go la le letona le go la ntsogošo. 7Simei a rogaka a re: Tšwaa! Tšwaa! Wena motho wa madi, sehlola tena! 8Morena o go bušološetša madi ka moka a leloko la Saulo, eo o ipeilego kgoši bakeng sa gagwe. Bjale bogoši Morena o bo neile Abesalomo morwa wa gago. Ke bjona bošula bjo bo go lebanego, ka gobane o motho wa madi.
9Abisai morwa wa Tseruya a botšiša Dafida a re: Setoto sa mpša seo se roga kgoši mong wa ka se reng? A nke ke ye ke mo kgaole hlogo.
10Kgoši ya re: Taba tša ka ga se tša lena barwa ba Tseruya. Mo leseng a roge. Ge a laetšwe ke Morena gore a roge Dafida, ke mang e a kago re: O dira bjalo o reng? 11Gomme Dafida a bolela le Abisai le bahlanka ba gagwe ka moka a re: Nke le boneng! Ge ešita morwa wa ka a tsoma bophelo bja ka, bjale monna e wa ga Benyamini a a ka lesa go dira ka mokgwa woo? Mo leseng a roge, o laetšwe ke Morena. 12Mohlomongwe Morena a ka bona go hlaka ga ka, a ntlišetša botse bakeng sa dithogo tša lehono.
13Dafida le banna ba gagwe ba fela ba ikela ka tsela; gomme Simei a fela a sepela a bapetše le Dafida a le thabeng, a tšama a roga, a betša ka maswika le ka makokota. 14Gomme kgoši le batho ba yona ka moka ba ba ba bokana ba lapile, ba khutša gona.
15Ke ge Abesalomo le setšhaba ka moka sa banna ba Isiraele ba gorogile Jerusalema; le Ahitofele o be a le moo. 16Husai wa Araki mogwera wa Dafida a tsena go Abesalomo, a dumediša Abesalomo a re: A kgoši e phele! Kgoši e phele!
17Abesalomo a fetola a re: A ke lona lerato le o ratago mogwera wa gago ka lona? O hloma bjang o sa ka wa tloga le mogwera wa gago?
18Husai a re: Aowaa, nna ke tlo ba wa gabo eo a kgethilwego ke Morena, a kgethilwego ke setšhaba se le banna ba Isiraele ka moka. Ke yena ke tlogo dula nae. 19Le gona ke tlo ba mohlanka wa mang? A ga ke re ke tlo ba mohlanka wa morwa wa gagwe? Ke tlo ba mohlanka wa gago ka mokgwa wo ke bego ke šika le tatago ka wona.
20Bjale Abesalomo a bolela le Ahitofele a re: Eletšanang re tsebe se re tlogo se dira.
21Ahitofele a eletša Abesalomo a re: Tsena basading ba direthe ba tatago, ba a ba tlogetšego gore ba lete ngwako. Ke mo Baisiraele ka moka ba tlogo lemoga gobane o kgaogane le tatago sa ruri; ke mo ba ba nago le wene ba tlo go tiiša maatla. 22Ke moka ba hlomela Abesalomo mošaša godimo ga ngwako; Abesalomo a tsena basading ba direthe ba tatagwe; Baisiraele ka moka ba di bona.
23Mehleng yeo keletšo e tšwago go Ahitofele e be e le bjalo ka phetolo e tšwago go Modimo. Dikeletšo tša Ahitofele di be di le bjalo mola a sa na le Dafida, le bjale a na le Abesalomo.
