2 SAMUELE 15

₁Tše di tlilego ka morago ga ditaba tšeo šedi: Abesalomo o itiretše koloi, e nago le dipitsi le banna ba masome a mahlano ba go mo eta pele. ₂Le gona Abesalomo o be a fela a tsoga e sa le bošego, a ye a eme tseleng ya go ya kgorong. Ge motho a na le taba a eya kgošing go ahlolelwa, Abesalomo a mmitše a re: O wa ga kae? Yena a re: Nna mohlanka wa gago ke wa motse wa gore wa dilete tša Isiraele. ₃Abesalomo a mo rere a re: O ko bone, taba ya gago ke e botse, e lokile; fela kua go kgoši o tlo hloka wa go theetša se o se bolelago. ₄Abesalomo a ba a re: Ke mang a kago mpea ka ba moahlodi nageng yeno, gore mang le mang e a nago le taba, le e a nago le molato, a tle go nna ke mo ahlolele! ₅Gomme ge motho a batamela a lotšha a inamile, a ntšhe seatla a mo sware a mo atle. ₆Baisiraele bohle Abesalomo o ba dirile ka mokgwa woo ge ba eya kgošing go ahlolelwa; ya ba gona go utswa dipelo tša banna ba Isiraele.

₇Ge go fetile nywaga e mene, Abesalomo a bolela le kgoši a re: Anke ke ye Heburone, ke phethe keno ye ke e enetšego Morena; ₈gobane mola ke dutše Gesuri kua Siria, nna mohlanka wa gago ke enne keno ka re: Ge Morena a ka mpušetša Jerusalema, ke tlo mo direla.

₉Kgoši ya re: Yaa o rotše pelo!

Ke moka Abesalomo a tsoga a ya Heburone. ₁₀Gomme Abesalomo o be a romile dihlodi, tša ya dileteng ka moka tša Isiraele tša re: Ge le ekwa moletšo wa diphalafala le re: Kgoši ke Abesalomo kua motseng wa Heburone! ₁₁Yena Abesalomo a tloga a na le banna ba makgolo a mabedi; ba be ba biditšwe ba etšwa Jerusalema; ba sepela ba se ne taba, ba sa tsebe selo. ₁₂Le gona Abesalomo o be a romile motho a bitša Ahitofele wa Gilo, letona la Dafida la motseng wa Gilo. Bjale ge Abesalomo a sa fihliša didimo, moferefere wa gola, batho ba tla ba fela ba bothelela go Abesalomo.

₁₃Gwa tla motho a tsebiša Dafida a re: Dipelo tša Baisiraele ka moka di gomaretše Abesalomo.

₁₄Dafida a laela bahlanka ba gagwe ba ba bego ba na nae motseng wa Jerusalema, a re: Tsogang re tšhabeng! Abesalomo re ka se mo phonyokge. Akgofang re sepeleng, a se tlo re tšhoganetša a re swara, a re wetša dikotsing ge a hula motse ka bogale bja marumo.

₁₅Bahlanka ba kgoši ba re: Ke rena ba bahlanka ba gago; a go dirwe ka mo mong wa rena a bonago. ₁₆Gomme kgoši ya tšwa e sepela ka dinao le bohle ba ngwakong wa kgoši; ya tlogela basadi ba lesome ba direthe gore ba šale ba leta ngwako.

₁₇Kgoši ya tšwa e na le batho ka moka, ba sepele ka dinao, ya ema ngwakong wa mafelelo. ₁₈Gomme bahlanka ka moka ba feta moo kgoši e emego, e le madira a mošate ka moka, le Bagathe ka moka, e le banna ba makgolo a selelago, ba ba bego ba tlile ba etšwa Gathe, ba sepela ka dinao ba eta kgoši pele. ₁₉Kgoši ya bolela le Ithai monna wa ga Gathe ya re: Wena o elang le rena? Goma o yo dula le kgoši, ka gobane o moeng; le gona kua ga geno o rakilwe. ₂₀O sa tšo fihla maabane; a nka fo go putlaputliša le rena? Ge e le nna ke ya mo ke yago; wena goma le batho ba ba geno; mme Morena a go dire ka botho a go botegele.

₂₁Ithai a fetola a re: Ka bophelo bja Morena le ka bophelo bja kgoši mong wa ka, mo wena Kgoši Mongaka o tlogo ba gona, le nna mohlanka wa gago ke tlo ba gona, e ka ba go pheleng le ge e le go hweng.

₂₂Dafida a tsebo re: Gona tlaa o sepele le rena! Ithai monna wa ga Gathe a sepela le Dafida a na le banna ba gagwe ka moka, le bana ka moka ba ba bego ba na nabo. ₂₃Gomme naga ka moka e be e lla ka lentšu le legolo; batho ka moka ba wela tsela. Kgoši ge e sela noka ya Kidirone, ke ge batho ka moka ba etile pele ka tsela e yago lešokeng.

₂₄Gwa napa gwa tla le Tsadoko a na le Balefi ka moka ba rwele polokelo ya kgwerano ya Modimo. Ba e bea fase; Abyathara a dira sehlabelo, setšhaba ka moka se se tšwilego motseng sa ba sa feta. ₂₅Ke mo kgoši e boletšego le Tsadoko ya re: Polokelo ya Modimo e bušetše motseng. Ge nka buša ka hwetša mahlo a Morena a ntebeletše ka botho, gona o tlo ba a nkgomiša ka buša ka e bona, ka bona le bodulo bja yona. ₂₆Fela, ge Morena a ka re: Ga ke go rate, gona ke nna e; a a ntire ka mo a ratago. ₂₇Kgoši, e sa bolela le Tsadoko moperisita, ya re: Wena o Mmoni; boela motseng o rotše pelo. Ahimaatse morwa wa gago, le Jonathane morwa wa Abyathara, barwa ba babedi ba lena ba, a ba šale le lena. ₂₈Le tsebe gore ke tlo fela ke nokologa fa molaleng wa lešoka, ke letela ditaelelo ge le ntsebiša ditaba. ₂₉Ke moka, Tsadoko le Abyathara ba bušetša polokelo ya Modimo motseng wa Jerusalema, ba dula ntshe.

₃₀Dafida a namela thaba ya mehlware, a tšama a lla, a ipipile sefahlogo, a sepela dinao di le fela; le batho ka moka ba ba bego ba na nae ba ipipa difahlogo ba rotoga ba lla. ₃₁Dafida ge a botšwa gore mo moferefereng wo le Ahitofele o gwerane le Abesalomo, a rapela a re: Morena a ko dire gore keletšo ya Ahitofele e be botlatla.

₃₂Ge Dafida a fihla serwaolong, mo go bego go rapelwa, ba napa ba gahlana le Husai wa Araki, a gagotše diaparo a itšhetše mobu hlogong. ₃₃Dafida a mo rera a re: Ge o ka sepela le nna, o tlo nkimela. ₃₄Fela, ge o ka boela motseng, wa bolela le Abesalomo wa re: Ke mohlanka wa gago, kgoši, bjalo ka mola ke le mohlanka wa tatago, ge o ka realo o tlo kgona go logolla maano a Ahitofele. ₃₅O tsebe gore Tsadoko le Abyathara, baperisita bao, ba nago ntshe. Bjale ditaba ka moka tše o di kwago mošate, o di nee Tsadoko le Abyathara baperisita. ₃₆Bona ba na le barwa ba bona ba babedi; ke Ahimaatse morwa wa Tsadoko, le Jonathane morwa wa Abyathara; ka bona o nthomele ditaba ka moka tše o di kwago.

₃₇Ke gona Husai mogwera wa Dafida a ilego motseng; gomme le Abesalomo a tla Jerusalema.