Dafida o tšhabela go Ahimeleke le go Akise
1Dafida a tla motseng wa Nobe go Ahimeleke moperisita. Ahimeleke a dumedišana le Dafida a tšhogile, a re: O hloma bjang o etla o nnoši, go se motho e a tlago nago?
2Dafida a botša Ahimeleke moperisita a re: Kgoši o nthomile ka ditaba, a re: Taba ye ke go romago ka baka la yona, ye ke go laelago yona, ke thopa. Masogana a ka ona ke a rometše motseng o mongwe. 3Bjale ge o ka ba le dijo, hlalla dinkgwe tše tlhano, goba tše dingwe tše o ka bago natšo.
4Moperisita a fetola a re: Mo go nna ga go na dinkgwa tša ka mehla, ge e se tše kgethwa, ge e ba ka masogana a itotile basading.
5Dafida a fetola a re: Ruri re ileditšwe basadi bjalo ka maabane le maloba ge re tšwa, le ge e le leeto fela; lehono gona ga go na e a nago le seila.
6Ke mo moperisita a mo neilego dinkgwa tše kgethwa, ka gobane go be go se tše dingwe ge e se tšeo tša dinkgwaponwa, tše di bego di beilwe pele ga Morena, tša tlošwa ge go bewa tše dingwe.
7Gomme ka lona tšatši leo, gona fao pele ga Morena go be go na le e mongwe wa bahlanka ba Saulo, a tswaletetšwe moo; leina la gagwe e be e le Doege, Moedomo, mogolo wa badiši ba Saulo.
8Dafida a botšiša Ahimeleke a re: A ga go ne lerumo, le ge e le tšhoša mo go wena? Gobane ga ka tloga le lerumo la ka le ge e le dibetša tša ka, ka ge taba ya kgoši e akgofišwa.
9Moperisita a re: Se se lego gona ke tšhoša yela ya Goliata Mofilisita yola o mmolailego kua moeding wa merula; še, e phuthetšwe ka lešela gomme e širilwe ke kobjana ya moperisita. Ge o rata o ka tšea yona; ke yona e lego gona.
Dafida a re: Ga go na e nngwe e swanago le yeo; mphe yona.
10Bjalo Dafida a tsoga a tšhaba Saulo ka lona tšatši leo, a tla go Akise kgoši ya Gathe. 11Bahlanka ba Akise ba mmolela ba re: Naa ga se Dafida kgoši ya naga? A ga se yena yola ba kilego ba mo opelela dikoša ba re: Saulo o hlaba ba gagwe ba sekete; Dafida ba gagwe ke kete tše lesome?
12Gomme Dafida mantšu ao a na a mo tsena pelong, a boifa Akise kgoši ya Gathe gagolo. 13A re ge ba mo lebeletše, a hlafiša sefahlogo sa gagwe, a itira segafa, a ngapaka mamati a mojako, a lesa mare a gagwe a elela maledung. 14Akise a omanya bahlanka ba gagwe a re: Monna e, a ga le mmone ge e le segafa? Le mo tliša go nna ka baka lang? 15A le re ke hloka magafa, ge le mo tliša fa gore a gafe mo go nna? A fa o mobjalo a ka tsena ngwakong wa ka?
