Dafida le Jonathane ba tiiša kgwerano
1Dafida a tšhaba gona moo Nayothe Rama, a tla a bolela le Jonathane a re: Ke dirileng? Tatago ke mo senyeditše kang, ge a rata go mpolaya?
2Jonathane a fetola a re: Tšeo a di be kgole! O ka se ke wa bolawa. O tsebe gore tate ga a ke a dira selo a sešo a ntsebiša, e ka ba se segolo le ge e le se senyenyane. Gomme taba e bjalo a ka nkutela bjang? Ga go taba e bjalo.
3Dafida a fetola a ba a ena a re: Tatago o tseba gabotse ge mahlo a gago a ntebeletše ka botho. Bjale o tla re: A Jonathane a se ke a di tseba, gore a se nyame pelo. Ruri, ka bophelo bja gago, lehu le kgauswiuswi le nna.
4Jonathane a re: Ke tlo go direla se pelo ya gago e se ratago.
5Dafida a re: Sedi, bosasa ke la kgwedi e mpsha, mo nka bego ke swanetše go dula le kgoši dijong. Fela, ntese ke yo utama šokeng go fihla mantšibao a la ka moso. 6Ge tatago a ka ntlhoka, o bolele o re: Dafida o mphegeleditše a re a akgofe a ye Betlehema motseng wa gabo, gobane kua ntshe go na le sedimo sa ngwaga sa moloko wohle. 7Ge a ka re: Ke mo go botse, ke mo nna mohlanka wa gago ke tlogo re ke šebešebe. Fela, ge a ka galefa, gona o tsebe gore go napile go tiile kotsi ye e tlogo ntlela e etšwa go yena. 8Bjale, nna mohlanka wa gago, ntire ka botho; ka gobane nna mohlanka wa gago o gwerane le nna ka Morena. Fela, ge mo go nna go ka ba le bokgopo, gona a nke ke bolawe ke wena; o sa tlo nkišetšang go tatago?
9Jonathane a re: Tšeo a di be kgole le nna. Fela, ge nka bona mo go tate go tiile gore kotsi e go tlele, nka se ke ka lesa go go sebela.
10Dafida a mmotšiša a re: Ke mang e a tlogo ntshebela ge tatago a go fetotše ka tše di thata?
11Jonathane a re: Tlaa, re tšwele kua lešokeng. Gomme ba ya lešokeng ka babedi. 12Jonathane a re: Ka Morena Modimo wa Isiraele, ge ke botšiša tate bosasa pakeno le ka moso, ka bona gore di go thatafaletše, wena Dafida, ke tlo roma motho a go tsebiša. 13Morena, nna Jonathane a ntire sa go re le sa go re, ge nka lesa go go sebela, ge tate a ka rata go go dira bobe. Ke tlogo tsebiša, ka go fa tsela, wa tloga o se ne taba. Gomme Morena o tlo ema le wena, bjalo ka mola a sa eme le tate. 14Bjale nna, ge ke sa phela o ntire ka botho bja Morena hle, gore ke se ke ka hwa. 15Gomme mohla woo Morena a tlogo ba a feditše manaba a Dafida ohle mo lefaseng, gona ba lapa la ka o se ke wa ba hlokiša botho bja gago neng le neng. 16Ke wona mokgwa wo Jonathane a tiišitšego kgwerano le leloko la Dafida.
17Gomme Jonathane a buša a enela Dafida lerato le a mo ratago ka lona, gobane o be a mo rata bjalo ka pelo ya gagwe. 18Jonathane a tsebo re: Bosasa ka kgwedi e mpsha o tlo hlokega, ka gobane o tlo ba o se ntshe bodulong bja gago. 19Ka moso o nape o fologe, o tle felo mo o bego o utame mohla wola wa ditaba tšela; o dule lentsweng la Asela. 20Nna ke tlo tla ka betša mesebe e meraro gona moo bjalo ka e ke ke betša maleba. 21Ke tlo napa ka roma lesogana ka re: Yaa, o tope mesebe! Ge ke tlo re: Mesebe šeno e tope mono morago ga gago! gona o ka tla ka gobane e tlo ba e le šebešebe, go se ne taba, ka bophelo bja Morena. 22Fela, ge nka botša lesogana ka re: Mesebe šelee kua pele ga gago, gona o tšhabe, ka gobane Morena o tlo ba a go file tsela. 23Ge e le taba ye re e boletšego, nna le wena, hlatse ya yona ke Morena neng le neng.
24Gomme Dafida a utama mo lešokeng. Ka kgwedi e mpsha kgoši ya dula dijong ya ja. 25Ge kgoši e šetše e dutše bodulong bja yona bja ka mehla bja hleng le leboto, Jonathane a ema moo, Abenere a dutše lehlakoreng la Saulo; bodulo bja Dafida bja dula bo le fela. 26Ka tšatši leo Saulo ga a ka a bolela selo, ka gobane o be a re: Mohlomong o hlakane le seila, mme o sa hlapa. 27Ka la ka moswana, ka la bobedi la kgwedi e mphša, bodulo bja Dafida bo le fela, Saulo a botšiša Jonathane morwa wa gagwe a re: Morwa wa Isai ke ka baka lang a sa tla dijong maabane le lehono?
28Jonathane a fetola a re: Dafida o nkgopetše ka maatla go ya Betlehema; 29a re: Hle mphe tsela; go na le sedimo sa moloko wešo kua gae; gomme le mogolwake o mpiditše. A re: Ge mahlo a gago a ntebeletše ka botho, ntese ke yo bona bana bešo! Ke ka baka leo a sa kago a tla dijong tša kgoši.
30Ya ba gona bogale bja Saulo bo tuketšego Jonathane, a mo roga a re: Mošemana wa swele tena! A o re ga ke tsebe ge o ikgethetše morwa wa Isai gore e be yena e a tlogo go leša dihlong le mmago? 31Ka gobane mehla yohle ya ge morwa wa Isai a sa phela lefaseng, o ka se ke wa tia le bogoši bja gago. Napa o rome batho ba yo mo tšea, a tle fa; sa gagwe ke go bolawa.
32Jonathane a fetola a bolela le tatagwe a re: O bolawa ka baka lang? O sentšeng?
33Saulo a mmetša ka lerumo a re a mo hlabe. Ke mo Jonathane a lemogilego gore tatagwe o tiišitše go bolaya Dafida. 34Jonathane a napa a tsoga gona moo dijong a befetšwe gagolo; ka tšatši leo la bobedi la kgwedi e mpsha a se ke a ja bogobe, a šulafetse ka baka la Dafida, le ka gobane tatagwe a mo rogile. 35Ka la ka moswana e sa le bošego, Jonathane a tšwela nageng ka lebaka le a le boletšego le Dafida, a ya a na le lesoganyana. 36A botša lesogana leo la gagwe a re: Kganyela o ntopele mesebe ye ke e betšago. Lesogana la kganyela. Jonathane a betša a mo sediša ka mosebe. 37Lesogana ge le fihla mo mosebe o hlabilego ntshe, Jonathane a goeletša a re: A ga o bone ge mosebe o le kua pele ga gago? 38Jonathane a boeletša a goeletša lesogana la gagwe a re: Kganyela o tsoše lebelo, o se ke wa ema! Ke moka lesogana la Jonathane la topa mesebe, la boela go mong wa lona. 39Lesogana lona le be le sa tsebe selo; taba e be e tsebja ke Jonathane le Dafida. 40Bjale Jonathane a neela lesogana dibetša tša gagwe a re: Sepela o di iše gae.
41Ya re ge lesogana le sepetše, Dafida a tsoga ka thoko ya tlase, a tla a lotšha, a inama gararo, ba atlana ba lla ka babedi; ka kudukudu gwa lla Dafida. 42Jonathane a bolela le Dafida a re: Sepela o we pelo. Tše re di ennego ka babedi ka leina la Morena, ra re Morena ke yena hlatse ya rena, le ya bana ba ka le ya bana ba gago, di tiile neng le neng. Dafida a wela tsela a sepela; Jonathane a boela gae.
