1 BAKORINTHE 15

₁Banabešo! Ke le gopotša Ebangedi ye ke le anegetšego yona, la e amogela mme la ema ka yona. ₂Ke ye le phološwago ka yona ge le e gomarela e le lentšu leo ke le anegetšego lona, ge e se ge le dumeletše lefela.

₃Gobane tabakgolo ye ke le neilego yona, ye le nna ke e neilwego, ke ye: Kriste o hwile ka baka la dibe tša rena ka mo mangwalo a bolelago. ₄O fihlilwe, a tsoga ka letšatši la boraro ka mo mangwalo a bolelago. ₅Gomme o bonwe ke Kefase, a tla a bonwa ke ba lesome le metšo e mebedi. ₆A buša a bonwa ke bana bešo ba ba fetago makgolo a mahlano ka lebaka le tee. Ba bantši ba bona bao le lehono ba sa le gona; ba bangwe ba bona ba ithobaletše. ₇A buša a bonwa ke Jakobo; a buša a bonwa ke baapostola ka moka.

₈Mafelelong, ge bohle bao ba šetše ba mmone, ke ge a bonwa ke nna ke etšago lefolotšana. ₉Gobane nna ke e monyenyane go baapostola; ga ka swanelwa go bitšwa Moapostola, gobane ke tlaišitše phuthego ya Modimo. ₁₀Ke ka kgaugelo ya Modimo ge ke le se ke lego sona; mme kgaugelo ya gagwe ga ya ntlela lefela; eupša ke dirile go fetiša bona ka moka; gomme e be e se nna; go dirile kgaugelo ya Modimo e na le nna. ₁₁Bjale, le ge e ka ba nna, le ge e ka ba bona, se re lego sona re bagoeledi, mme lena la dumela.

₁₂Bjale ge go tsebatšwa Kriste, gore o tsogile bahung, ba bangwe ba lena ba bolela bjang ge ba re: Tsogo ya bahu ga eyo? ₁₃Ge tsogo ya bahu e se gona, gona le Kriste ga a tsoga. ₁₄Gomme ge Kriste a sa tsoga, gona se re se tsebatšago ke lefela, mme le tumelo ya lena ke ya lefela. ₁₅Le rena re ka hwetšwa re le ba go hlatsela ra re o tsošitše Kriste bahung mola a sa ka a mo tsoša. Go ka ba bjalo ge bahu ba sa tsoge. ₁₆Gobane ge bahu ba sa tsoge, gona le Kriste ga a ka a tsoga. ₁₇Gomme ge yena Kriste a sa tsoga, gona tumelo ya lena ke ya lefela, gona le sa le dibeng tša lena. ₁₈Gona le ba ba ithobaletšego e le ba Kriste ba timetše. ₁₉Ge re le ba go holofela Kriste bophelong bjona fela, gona ba go ka kwelwa bohloko mo go batho bohle e ka be e le borena.

₂₀Bjale gomme, Kriste o tsogile bahung a ba yena thakangwaga ya ba ba ithobaletšego. ₂₁Bjale ka ge lehu le tlile ka motho, le tsogo ya bahu e tlile ka motho. ₂₂Bjale ka ge bohle ba ehwa ka Adama, ba tlo phedišwa bohle ka Kriste. ₂₃E mongwe le e mongwe o tlo ba le sebaka sa gagwe. Thakangwaga ke yena Kriste; o tlo hlatlangwa ke bao e lego ba gagwe mohla a tlago, ₂₄gwa tlo kgono tla bofelo mohla a tlogo bušetša Modimo Tatagwe mmušo, mohla a tlogo ba a fedišitše bobuši bjohle, le bogoši bjohle, le tše maatla ka moka. ₂₅Gobane go mo swanetše ge a eba kgoši; manaba a gagwe ka moka a be ka tlase ga nao tša gagwe. ₂₆Lenaba le le tlogo fedišwa ya ba wa bofelo, ke lehu. ₂₇Gobane tšohle di beilwe ka tlase ga nao tša gagwe. Ge go thwe “tšohle” di bušwa ke yena, ga se go re go balwa le e a mmeilego mmuši. ₂₈Mohla tšohle di tlogo ba di beilwe ka tlase ga nao tša gagwe, ke mo le yena Morwa a tlogo bewa ka tlase ga e a mmeilego mmuši wa tšohle, gore Modimo e be yena Mobatšohlegobohle.

₂₉Le gona, ba ba kolobeletšwago bahu ba di direlang ge bahu ba ka be ba sa tsoge? Ba reng ge ba kolobeletšwa bahu? ₃₀Le rena re direlang ge re itebanya le dikotsi ka nako tšohle? ₃₁Nna ke wa go hwa ka mehla! Bana bešo! Ke realo ke kgantšha Kriste mong a rena. ₃₂Ge kua Efeso ke lwile le dibata, go nkholang? Ge bahu ba sa tsoge, gona a nke re re: A re jeng! A re nweng gobane ka moswana re yo hwa!

₃₃Le se ke la forwa; mehlamo e mebe e senya bokwala. ₃₄Phafogelang sa ruri, le lese go senya; gobane go na le ba go se tsebe Modimo. Ke realo gore ke le leše dihlong.

₃₅Ge go le e a rego: Bahu ba ka tsoga bjang? A re: Ba tlo boa ka mmele o bjang? ₃₆Lešilo towe! Se o se bjalago ga se phedišwe ge se sa hwe. ₃₇Gomme ge o bjala, ga o bjale sebopo seo se tlogo tšwelela, o bjala thoro fela, e ka ba ya mabele le ge e le ya tše dingwe. ₃₈E a e fago sebopego ka mo a ratago ke Modimo; ke yena a fago peu e nngwe le e nngwe lebopo le e tlogo ba ka lona.

₃₉Dinama ga di swane. Nama ya batho e šele; nama ya dikgomo e šele; le ya dihlapi e šele; le ya dinonyana e šele.

₄₀Le mebele ya legodimo e gona. Le mebele ya lefase e gona. Letago la ya legodimo le šele; le la ya lefase le šele. ₄₁Letago la letšatši le šele; le letago la dinaledi le šele; mme tšona dinaledi di phalana ka letago.

₄₂Le go tsoga ga bahu go bjalo. Go bjalwa mmele o bolago; go tlo tsoga wo o sa bolego. ₄₃O bjalwa o nyatšega; o tlo tsoga o tagile. O bjalwa o fokola; o tlo tsoga e le wa maatla. ₄₄O bjalwa e le mmele wa nama; o tlo tsoga e le mmele wa moya. Bjalo ka ge go na le mmele wa nama, le mmele wa moya o gona. ₄₅Bjalo ka ge go ngwadilwe gwa thwe: Motho wa pele, Adama, a napa a ba moya o phelago, le Adama wa mafelelo yena ke moya wo o phedišago. ₄₆Mmele wa moya ga se wona o thomilego go ba gona; wa pele ke wa nama, wa latelwa ke wa moya. ₄₇Motho wa pele o tšwa mmung; motho wa bobedi o tšwa legodimong, ke wa gona kua. ₄₈Ba lefase ba swana le yena yola wa go tšwa mmung; ba legodimo ba swana le yena yo wa go tšwa legodimong. ₄₉Bjalo ka ge re apere seswantšho sa wa mmu, le seswantšho sa wa legodimo re tlo se apara.

₅₀Se nna ke se bolelago, lena bana bešo, ke re: Nama le madi ga se tšona di tlogo ja lefa mmušong wa Modimo. Le tša go bola di ka se je lefa la tše di sa bolego.

₅₁Šedio; ke le botša sephiri. Re ka se ke ra ithobalela bohle; ge e le lebopo le šele re tlo fiwa bohle. ₅₂E tlo ba ka bjakobjako bja panyagatee, ka moletšo wa phalafala ya bofelo; gobane e tlo lla, bahu ba tlo tsoga ba se sa tlo bola; mme rena re tlo fiwa lebopo le šele. ₅₃Gobane se se bolago se tlo apešwa go se bole; se se hwago se tlo apešwa go se hwe. ₅₄Mohla tše di bolago tše ge di apešwa go se bole, ge di hwago tše di apere go se hwe, ke mo go tlogo tšwelela se se boletšwego ke lengwalo le le rego: ₅₅Lehu le meditšwe ya ba phenyo. Hee Lehu! Lebola la gago le kae! Hee Bodulabahu! Go fenya ga gago go kae! ₅₆Ge e le lebola la lehu ke sebe; mme maatla a sebe ke Molao. ₅₇Gomme a go lebogwe Modimo e a re fago go fenya ka Mong wa rena Jesu Kriste.

₅₈Ke gona, lena banabešo baratwa! Tiang maatla, le se ke la tekema, le tielele modirong wa Morena mo go fela, le tseba gore go itapiša ga lena ga se ga lefela Moreneng.