1 BAKORINTHE 14

₁Phegelelang lerato; Le latiše dineo tša Moya, gagolo le bone gore le porofete. ₂Gobane e a bolelago ka maleme ga a bolele le batho, o bolela le Modimo; ga a kowe ke motho, o bolela diphiri tša Moya. ₃Ge e le e a porofetago, o bolela le batho tša kagišo, tša keletšo le khomotšo. ₄E a bolelago ka maleme o a ikagiša; e a porofetago o agiša phuthego. ₅Nka thaba ge le ka bolela ka maleme ka moka ga lena; fela, se nkago se thabela gagolo ke ge le ka porofeta; gobane e a porofetago o phala wa go bolela ka maleme, ge e se ge a ka hlatholla, gore phuthego e agišwe.

₆Banabešo! Ge nna bjale nka tla go lena ke bolela ka maleme, ke tlo le hola kang ge nka lesa go bolela le lena ka go le utollela le ka tsebo le ka porofeto le ka thuto? ₇Ešita le diletšo tše di se nago bophelo, e ka ba naka, e ka ba lekope, ge di sa lle ka mello ya tšona, motho a ka hlaologanya bjang ge e le naka le ge e le lekope? ₈Ge phalafala e sa lle ya gala, ke mang a tlogo tšwa dira? ₉Le lena, ge ka maleme le sa bolele taba e kwegago, se se bolelwago se ka hlathwa bjang? Le tlo ba le bolela tše di tšewago ke phefo. ₁₀E fela go na le mebolelo ya mehutahuta lefaseng; gomme ga go mmolelo wo o sa kwalego. ₁₁Bjale ge ke sa kwe se mmolelo o se bolelago, ke tlo re mmoledi ke lethoko; yena mmoledi a re lethoko ke nna. ₁₂Le lena ge le phegelela dineo tša Moya, le nyake tše di kago agiša phuthego gore di le hole.

₁₃Ke gona, e a bolelago ka maleme a rapele gore a tsebe go hlatholla. ₁₄Gobane ge ke rapela ka maleme, go rapela moya wa ka, mme tlhaologanyo ya ka ga e tšweletše se se kago hola motho. ₁₅Bjale taba ke eng? Ke tlo rapela ka moya ke rapela le ka tlhaologanyo; ke tlo opela ka moya ke opela le ka tlhaologanyo. ₁₆Fela, ge o ka fo leboga ka moya, motho e a dutšego fao a sa di lemoge, tebogo ya gago a ka e dumela bjang ka go re: Amene, ge a sa kwe tše o di bolelago? ₁₇Wena o tlo ba o itebogetše gabotse, mme ba bangwe ba se agišwe selo. ₁₈Nna ke leboga Modimo ge ka moka ga lena ke le phala ka go bolela ka maleme. ₁₉Fela, ge e le phuthegong ke hwetša go le kaone ge nka bolela mantšu a mahlano fela ka tlhaologanyo ka ruta ba bangwe, ka lesa go bolela mantšu a diketekete ka maleme.

₂₀Banabešo! Le se ke la ba bana temogong. Ge e le bobeng le be masea; temogong gona le be babolokatlalo. ₂₁Molaong go ngwadilwe gwa thwe: Setšhaba se ke tlo bolela naso ka maleme a šele le ka melomo e šele; le ge go le bjalo ba ka se ke ba nkwa. ₂₂Ke gona, go bolela ka maleme ke mohlolo go ba ba sa dumelego, e sego go badumedi; boporofeta ga se bja ba ba sa dumelego, ke bja ba ba dumelago.

₂₃Bjale, ge phuthego ka moka e phuthegile, mme ka moka la bolela ka maleme, ge go ka tsena ba ba sa dumelego, le ba ba sa di lemogego, a ba ka se ke ba re le hlakane dihlogo? ₂₄Ge go ka porofeta bohle, mme gwa tsena e a sa dumelego le e a sa di lemogego, bohle ba tlo mo kgothatša, bohle ba tlo mo sola. ₂₅Gwa tlo utologa tše di lego mo pelong ya gagwe, a tlo khunama a inama a rapela Modimo, a le hlatsela a re: Ruri, Modimo o na le lena.

₂₆Bjale go ka reng? Banabešo! Ge le phuthega, e mongwe a na le sefela, e mongwe a na le tša maleme, e mongwe a na le kutollo, e mongwe a na le tlhathollo, gona ka moka a di tle e be go agiša. ₂₇Ge e mongwe a bolela ka maleme, le wa bobedi a le gona, wa boraro a e be wa go goma; mme ba hlatlamane, wa go hlatholla a be gona. ₂₈Ge wa go hlatholla a se gona phuthegong, ba homole; ba ipolelele ba le nnoši le Modimo. ₂₉Ge e le baporofeta, a go bolele ba babedi, le ge e le ba bararo; ba bangwe e be ba go fetola. ₃₀Ge e mongwe wa ba ba dutšego a na le se a se utolletšwego, a bolele ge go homola e a mo rakilego pele. ₃₁Le ka porofeta ka moka ga lena le šalana morago, gore bohle ba rutwe, ba eletšwe. ₃₂Meoya ya baporofeta e bušwa ke bona baporofeta. ₃₃Gobane Modimo ga se Modimo wa tlhakatlhakano; ke Modimo wa molao.

Ke wona mokgwa wa diphuthego tšohle tša ba bakgethwa. ₃₄Basadi ba lena a ba homole diphuthegong. Ga ba dumelelwe go bolela. A ba ipoetše. Le Molao o realo. ₃₅Ge ba na le se ba ratago go se rutwa, ba ka botšiša banna ba bona magaeng; gobane go befile ge basadi ba bolela phuthegong.

₃₆Goba le re lentšu la Modimo le šimologile mo go lena? Goba le re le fihlile go lena fela? ₃₇Ge mo go lena go ka ba le e a rego: ke moporofeta, a re: ke wa Moya, a a tsebe gore tše ke le ngwalelago tšona di tšwa go Morena. ₃₈Ge go ka ba le e a di ganago, a a ikganele.

₃₉Ke gona, Banabešo, phegelelang go porofeta; le go bolela ka maleme le se ke la go thibela. ₄₀Tšohle di ye ka bothakga le ka molao.