PSALM 77

₁VIR die musiekleier; op die wysie van: „Jedútun.” 'n Psalm van Asaf.

₂My stem is tot God en ek roep; my stem is tot God, dat Hy na my kan luister.

₃Op die dag van my benoudheid soek ek die Here; snags bly my hand uitgestrek sonder om moeg te word; my siel weier om getroos te word.

₄As ek aan God dink, moet ek steun; peins ek, dan versmag my gees. Sela.

₅U hou my ooglede oop; ek is onrustig en kan nie spreek nie.

₆Ek dink oor die dae van die voortyd, oor die ou, ou jare.

₇Ek wil dink aan my snarespel in die nag, wil peins met my hart, en my gees deurvors:

₈Sal die Here vir altyd verstoot en verder nie meer goedgunstig wees nie?

₉Hou sy goedertierenheid vir altyd op? Is dit met die belofte gedaan van geslag tot geslag?

₁₀Het God vergeet om genadig te wees? Of het Hy in toorn sy barmhartighede toegesluit? Sela.

₁₁Toe het ek gesê: Dit is my grootste bekommernis dat die regterhand van die Allerhoogste verander!

₁₂Ek dink aan die dade van die Here; ja, ek wil dink aan u wonders uit die voortyd

₁₃en al u werk oordink, en ek wil peins oor u dade.

₁₄o God, u weg is in heiligheid. Wie is 'n groot God soos God?

₁₅U is die God wat wonders doen; U het u sterkte onder die volke bekend gemaak.

₁₆U het u volk met 'n sterk arm verlos, die kinders van Jakob en van Josef. Sela.

₁₇Die waters het U gesien, o God, die waters het U gesien, hulle het gebewe; ja, die watervloede het gesidder.

₁₈Die wolke het water uitgegiet, die hemele het donder laat hoor, ook het u pyle rondgevlieg.

₁₉U rollende donder het weerklink; bliksems het die wêreld verlig; die aarde het gesidder en gebewe.

₂₀U weg was in die see en u paaie in groot waters, en u spore was nie te beken nie.

₂₁U het u volk soos skape gelei deur die hand van Moses en Aäron.