To The Word – Day 139

₁Baiseraele bohle ba kgobokanela Heborone, ho Davida, mme ba re: “Bona, re madi a le mang. ₂Mehleng ya ha Saule e ne e le kgosi ya rona, e ne e le wena ya etellang Baiseraele pele ha ba futuha. Morena Modimo wa hao, a na a re ho wena: ‘O tla disa setjhaba sa ka sa Baiseraele, mme o tla ba kgosi ya setjhaba sa ka sa Baiseraele.’ ”

₃Yaba baholo bohle ba Iseraele ba ya ho kgosi e le Heborone. Davida a etsa selekane le bona moo Heborone, kapele ho Morena, mme ba mo tlotsa hore e be kgosi ya Iseraele, ho ya ka polelo ya Morena, eo a neng a e bolele ka Samuele.

₄Yaba Davida le Baiseraele bohle ba ya Jerusalema, e neng e bitswa Jebuse, e leng moo Bajebuse, baahi ba naha eo, ba neng ba ahile teng. ₅Baahi ba Jebuse ba re ho Davida: “O ke ke wa kena mona!” Leha ho le jwalo, Davida a hapa qhobosheane ya Sione, e leng yona Motse wa Davida.

₆Davida a re: “Mang kapa mang ya tla bolaya Mojebuse pele, e tla ba molaodi e moholo.” Joabe, mora wa Seruya, a tlola pele, mme ya eba yena molaodi.

₇Davida a aha qhobosheaneng eo; ka baka leo, ba e bitsa Motse wa Davida. ₈A haha motse o potapotileng qhobosheane eo ho tloha Milo. Joabe yena a tsosa marako wohle a motse. ₉Davida a nna a tswela pele ho matlafala, hobane Morena wa mabotho o ne a ena le yena.

₁₀Bana ke bona baokamedi ba bahale ba Davida, ba neng ba mo tsheheditse mmusong wa hae, mmoho le Baiseraele bohle, hore e be kgosi, ho ya ka polelo ya Morena, eo a neng a e bue mabapa le Iseraele. ₁₁Palo ya bahale ba Davida ke ena: Jashobame wa Mohakemoni e ne e le yena mookamedi wa balaodi. Ke yena ya neng a fekefe banna ba makgolo a mararo ka lerumo, a ba bolaya ka nako e le nngwe. ₁₂O ne a hlahlangwa ke Eleasare, mora wa Dodo, wa morabe wa Ahohi, e le e mong wa bahale ba bararo. ₁₃O ne a ena le Davida ha a le Pasa-Damime, moo Bafilesita ba neng ba theile theko ya ntwa teng, tshimong ya harese. Bahlabani ba baleha Bafilesita. ₁₄Eleasare le bahlabani ba hae ba ikema hara tshimo, ba e hapa, ba bolaya Bafilesita, mme Morena a ba tlisetsa tlholo e kgolo.

₁₅Ba bararo ba baokamedi ba mashome a mararo ba theohela ho Davida lefikeng, ka lehaheng la Adulame. Lebotho la Bafilesita le ne le hlomme ka kgohlong ya Refaime. ₁₆Davida o ne a le ka qhobosheaneng, ha lebotho la Bafilesita lona le ne le le Betlelehema. ₁₇Davida a utlwa a nyorilwe, mme a re: “Eka motho a ka mpha metsi a tswang sedibeng sa Betlelehema, se pela kgoro ya motse!” ₁₈Jwale bahale ba bararo ba phunyeletsa mabotho a Bafilesita, ba ya kga metsi sedibeng sa Betlelehema se pela kgoro ya motse. Ba ekga metsi ao, ba a isa ho Davida. Empa Davida a hana ho a nwa, a a qhalla fatshe e le nyehelo ho Morena, ₁₉a re: “Modimo wa ka a nthuse ke se ke ka etsa ntho ena. Na nka nwa madi a banna bao ba ileng ba ipea kotsing?” Ba ne ba ile ba ipea kotsing ka ho ya kga metsi, ka baka leo, a se ke a a nwa.

Tsena di ile tsa etswa ke bahale bana ba bararo.

₂₀Abishai, ngwanabo Joabe, e ne e le yena mookamedi wa ba mashome a mararo. Ke yena ya neng a fekefe ba makgolo a mararo ka lerumo, a ba bolaya, mme lebitso la hae la tuma hara ba mashome a mararo. ₂₁A tuma ho feta bahlabani ba mashome a mararo, ya eba molaodi wa bona. Empa a se ke a tuma jwaloka balaodi ba bararo ba pele.

₂₂Benaya, mora wa Jehoyada, ya neng a etswa Kabeseele, e ne e le monna ya tumileng ka diketso tsa bokwankwetla. A bolaya bahale ba babedi ba Moabe, ba bohale jwaloka tau. A ba a bolaya le tau e neng e le ka lemeneng, mohla lehlwa le neng le kgethehile. ₂₃A bolaya monna wa Moegepeta, wa seqhobane, eo bolelele ba hae bo neng bo feta dimethara tse pedi. Moegepeta eo o ne a tshwere lerumo le lekaalo ka mofeng wa motjhine o ohlang, empa Benaya a ya ho yena a tshwere molamu; a hlotha lerumo letsohong la Moegepeta, a mmolaya ka lerumo leo la hae. ₂₄Tsena ke tsona diketso tsa Benaya, mora wa Jehoyada, tse ileng tsa mo tumisa hara ba mashome a mararo. ₂₅O ne a tumile ho feta ba mashome a mararo, empa a sa tuma jwaloka balaodi ba bararo ba pele. Davida a mo etsa mookamedi wa balebedi ba hae.

₂₆Bahale ba bang ba Davida e ne e le Bana: Asaele, ngwanabo Joabe, le Elehanane, mora wa Dodo wa Betlelehema, ₂₇le Shamote wa Harode, le Helese wa Mopelone, ₂₈le Ira mora wa Ikeshe wa Tekowa, le Abiesere wa Anatote, ₂₉le Sibekai wa Husha, le Ilai wa Ahohi, ₃₀le Maharai wa Netofa, le Helede, mora wa Baana wa Netofa, ₃₁le Itai mora wa Ribai wa Gibea, wa ba morabe wa Benjamine, le Benaya wa Piratone, ₃₂le Hurai wa melatswaneng ya Gaasha, le Abiele wa Areba, ₃₃le Asemafete wa Bahurime, le Eleaheba wa Shaaleboni, ₃₄le bara ba Hasheme wa Gisone, le Jonathane mora wa Shage wa Harare, ₃₅le Ahiame, mora wa Sakara wa Harare, le Elefale, mora wa Ure, ₃₆le Hefere wa Mekera, le Ahiya wa Mopelone, ₃₇le Hesero wa Karamele, le Naarai, mora wa Esebai, ₃₈le Joele, ngwanabo Nathane, le Mibehare, mora wa Hageri, ₃₉le Seleke wa Moamone, le Naharai wa Berota, mojari wa dihlomo tsa Joabe, mora wa Seruya, ₄₀le Ira wa Jethero, le Garebe wa Jethero, ₄₁le Uriya wa Mohete, le Sabada, mora wa Akalai, ₄₂le Adina, mora wa Shisa wa morabe wa Rubene, eo e neng e le molaodi wa ba morabe wa Rubene, le ba mashome a mararo ba neng ba ena le yena, ₄₃le Hanane, mora wa Maaka, le Joshafate wa Miteni, ₄₄le Usiya wa Ashetarote, le Shama, le Jeiele, bara ba Hotame wa Arowere, ₄₅le Jediaele, mora wa Shimeri, le Joha wa Tise, e leng ngwanabo, ₄₆le Eleele wa Mohafa, le Jeribai, le Joshafeya, bara ba Elenaama, le Jitema wa Moabe, ₄₇le Eleele, le Obede, le Jaasiele wa Mesobaya.

₁Bana ke bona ba ileng ba tla ho Davida ha a ntse a ipatile Sikelage, ka baka la ho tshaba Saule, mora wa Kishe. E ne e le ba bang ba bahale ba neng ba mo thusa ntweng. ₂Ba ne ba hlometse ka diqha, mme ha ba betsa majwe ka matjeketjane, kapa ba fula ka metsu, ba ne ba tseba ho sebedisa matsoho a matona kapa a matshehadi ka ho tshwana. E ne e le ba morabe wa Benjamine, e le bang ka Saule.

₃Mookamedi wa bona e ne e le Ahiesere, a hlahlangwa ke Jowashe. Bobedi ba bona e ne e le bara ba Shemaa wa Gibea. Baokamedi ba bang e ne e le Jesiele, le Pelete, bara ba Asemafete, le Beraka, le Jehu wa Anatote, ₄le Jisemaya wa Gibeone, eo e neng e le e mong wa bahale ba mashome a mararo, e bile e le molaodi wa bona, le Jeremia, le Jahasiele, le Johanane, le Josabada wa Gedera, ₅le Elosai, le Jerimote, le Bealeya, le Shemariya, le Shefatiya wa Harufe, ₆le Elekana, le Jeshia, le Asariele, le Joesere, le Jashobame, e leng ba morabe wa Kora, ₇le Joela, le Sebadiya, e leng bara ba Jerohame wa motse wa Gedore.

₈Ba bang ba morabe wa Gade ba fetohela ka ho Davida ha a le qhobosheaneng e lehwatateng. E ne e le banna ba dinatla, ba matsholathebe, ba tsebang ho lwana ka thebe le lerumo. Difahleho tsa bona di ne di ka tsa ditau, ba le lebelo jwaloka dikgama tsa thaba. ₉Wa pele e ne e le Esere, wa bobedi e le Obadiya, wa boraro e le Eliabe, ₁₀wa bone e le Mishemanna, wa bohlano e le Jeremia, ₁₁wa botshelela a le Atai, wa bosupa e le Eleele, ₁₂wa borobedi e le Johanane, wa borobong e le Elesabade, ₁₃wa leshome e le Jeremia, wa leshome le motso o mong e le Makabanai.

₁₄Bana e ne e le bara ba Gade, e le balaodi ba mabotho. Molaodi ya ka sehloohong o ne a ka phaladisa lebotho la bahlabani ba sekete, ya katlasetlase a ka phaladisa lebotho la ba lekgolo. ₁₅Bana ke bona ba neng ba tshele noka ya Jorodane, ka kgwedi ya pele, ha noka eo e ne e eja ditlhokwa. Ba leleka bohle ba phelang ka kgohlong, ba ka botjhabela le ka bophirimela.

₁₆Ba bang ba morabe wa Benjamine le ba morabe wa Juda le bona ba ya ho Davida qhobosheaneng. ₁₇Davida a ya ba kgahlanyetsa, a re ho bona: “Haeba le tlile ka kgotso, ho tla nthusa, ke tla le kgomarela, empa haeba le tlile ho tla nkekela dira tsa ka, leha ke se na molato, Modimo wa bo-ntata rona o tla le bona, a le otle.”

₁₈Jwale Moya wa Modimo wa theohela hodima Amasai, molaodi wa ba mashome a mararo, mme a re:

Yaba Davida o a ba amohela, mme a ba etsa balaodi ba mabothwana a hae.

₁₉Ba bang ba morabe wa Manase le bona ba fetohela ka ho Davida, mohla a neng a ena le Bafilesita ha ba futuhetse Saule. Empa a se ke a thusa Bafilesita, hobane mahosana a bona a ne a ile a eletswa hore a mo leleke, a re: “O tla fetohela ka ho monga hae Saule, ebe re a bolawa.” ₂₀Yare ha Davida a eya Sikelage banna bana ba morabe wa Manase ba fetohela ka ho yena: Adenake, le Josabada, le Jediaele, le Mikaele, le Josabada, le Elehu, le Siletai. E mong le e mong wa bona e ne e le molaodi wa bahlabani ba sekete. ₂₁Ke bona ba ileng ba thusa Davida ho lwantsha mabothwana a hlaselang, hobane kaofela ha bona e ne e le bahale, e bile e le balaodi ba mabotho. ₂₂Ka tsatsi le leng le le leng banna ba nna ba tla ho Davida, ho tla mo thusa, ho fihlela lebotho la hae le eba leholo jwalokaha eka ke lebotho la Modimo.

₂₃Ena ke palo ya bahlabani ba mabothwana a hlometseng, a ileng a tla ho Davida ha a le Heborone, ho ya mmea hore e be kgosi sebakeng sa Saule, ho ya ka polelo ya Morena.

₂₄Ba morabe wa Juda ba neng ba tshwara thebe le lerumo, e ne e le banna ba dikete tse tsheletseng le makgolo a robedi.

₂₅Ba morabe wa Simeone e ne e le bahale ba dikete tse supileng le lekgolo.

₂₆Ba morabe wa Levi e ne e le dikete tse nne le makgolo a tsheletseng. ₂₇Jehoyada e ne e le moetapele wa lelapa la Arone, a ena le banna ba dikete tse tharo le makgolo a supileng. ₂₈Sadoke, mohale wa mohlankana, o ne a ena le balaodi ba mashome a mabedi a metso e mmedi, ba tswang lapeng labo. ₂₉Ba morabe wa Benjamine, bao e neng e le bang ka Saule, ba ne ba le dikete tse tharo. Ho fihlela ka nako eo, bongata ba bona bo ne bo ntse bo le ka lehlakoreng la Saule.

₃₀Ba morabe wa Efraime e ne e le bahale ba dikete tse mashome a mabedi le makgolo a robedi, ba tumileng malapeng abo bona.

₃₁Ba karolo ya morabe wa Manase, ba neng ba thontswe ka mabitso ho tla bea Davida hore e be kgosi, ba ne ba le dikete tse leshome le metso e robedi.

₃₂Ba morabe wa Isakare, ba neng ba tseba ditaba tsa mehla eo, ba tseba le seo Iseraele e lokelang ho se etsa, e ne e le baetapele ba makgolo a mabedi, e le bona ba laolang bang ka bona bohle.

₃₃Ba morabe wa Sebulone, ba neng ba futuha, ba kwetliseditswe ho lwana ka mefuta yohle ya dihlomo, ba theile theko ya ntwa, ba ne ba le dikete tse mashome a mahlano, mme ba tshepahala.

₃₄Ba morabe wa Nafthali e ne e le balaodi ba sekete, ba ena le bahlabani ba dikete tse mashome a mararo a metso e supileng, ba hlometseng ka dithebe le marumo.

₃₅Ba morabe wa Dane, ba neng ba kwetliseditswe ntwa, ba ne ba le dikete tse mashome a mabedi a metso e robedi, le makgolo a tsheletseng.

₃₆Ba morabe wa Ashere, ba neng ba kwetliseditswe ntwa, e le malalaalaotse, ba ne ba le dikete tse mashome a mane.

₃₇Ba morabe wa Rubene, le ba morabe wa Gade, le karolo ya ba morabe wa Manase, ba neng ba le ka botjhabela ho Jorodane, ba ne ba le dikete tse lekgolo le mashome a mabedi, ba hlometse ka mefuta yohle ya dihlomo.

₃₈Bahlabani bana bohle, ba neng ba ema thekong ya ntwa, ba fihla Heborone ba ikemiseditse ho bea Davida hore e be kgosi ya Iseraele. Le Baiseraele bohle ba ne ba le maikutlo a le mang a hore Davida a bewe, e be kgosi.

₃₉Bana bohle ba qeta matsatsi a mararo ba ena le Davida, ba ntse ba eja, ba enwa tseo bana babo bona ba neng ba ba lokiseditse tsona. ₄₀Le ba neng ba le haufi le bona, e leng ba merabe ya Isakare, le Sebulone, le Nafthali, ba ba tlisetsa dijo ba di bofile ditonking, le dikameleng, le dimmeileng, le dipeleseng: phofo, le diphaphatha tsa mangangajane a feiye, le diphaphatha tsa mangangajane a morara, le veine, le ole, le dipholo le dinku. Tsena ba di tlisa ka bongata, hobane Baiseraele ba ne ba thabile.

₁Davida a rerisana le balaodi ba bahlabani ba dikete, le ba ba makgolo, le mookamedi e mong le e mong wa mabotho. ₂Yaba o re ho setjhaba sohle sa Iseraele: “Haeba le rata, eba le Morena Modimo wa rona o a rata, a re romeleng molaetsa hohle naheng ya Iseraele, moo bana babo rona ba ahileng teng; re o romele le ho baprista, le ho Balevi ba metseng le metsaneng, hore ba phuthehele kwano. ₃Jwale re boele re late areka ya Modimo wa rona, re e tlise kwano, hobane mehleng ya Saule ha re a ka ra e natsa.” ₄Setjhaba sohle sa re se tla etsa jwalo, hobane se ne se bona hore hoo ho lokile.

₅Yaba Davida o kgobokanya Baiseraele bohle, ho tloha nokeng ya Shihore e Egepeta, ho ya fihla kgorong ya Hamate, hore ba yo lata areka ya Modimo, Kiriate-Jearime. ₆Jwale Davida le Baiseraele bohle ba nyolohela Baala, e leng hona Kiriate-Jearime e Juda, ho ya lata areka ya Morena Modimo, ya dutseng hodima dikerubime, e leng areka eo a tla kgumamellwa ho yona.

₇Ba bea areka ya Modimo hodima kariki e ntjha, ba e ntsha ka tlung ya Abinadabe. Bo-Usa le Ako ba qhoba kariki eo. ₈Davida le bohle ba ntlo ya Iseraele ba etsa motjeko ka sefutho se seholo, ba le kapele ho Modimo. Ba letsa diharepa, le dikatara, le meropa, le matlheretlhere, le diterompeta.

₉Ha ba fihla seotlong sa Kidone, Usa a nanabetsa letsoho, a tshwara areka, hobane dipholo di ne di kgothometseha. ₁₀Bohale ba Modimo ba tlokomela Usa, mme Morena a mmolaya, hobane o ne a ile a ama areka. A shwela hona moo, kapele ho Modimo.

₁₁Davida a tshwenyeha haholo, hobane Morena o ne a bolaile Usa; ka baka leo, yaba sebaka seo se rewa lebitso la Kotlo ya Usa, mme le kajeno-ya-bokajeno se ntse se bitswa jwalo.

₁₂Ka lona letsatsi leo, Davida a tshaba Modimo, mme a re: “Ekaba areka ya Modimo ke tla e isa jwang ha ka?” ₁₃Yaba Davida ha a sa isa areka eo ha hae, Motseng wa Davida, o se a e isa tlung ya Obede-Edomo wa Mogate. ₁₄Areka eo ya Modimo ya qeta kgwedi tse tharo e le moo ha Obede-Edomo, ka tlung ya hae. Morena a hlohonolofatsa lelapa la Obede-Edomo le tsohle tseo a neng a ena le tsona.

₁Jwale kgosi Hirame wa Tire a romela maqosa ho Davida; a ba a mo romella le mapolanka a kedare, le dibetli tsa majwe le tsa mapolanka, ho ya mo hahela ntlo. ₂Davida a elellwa hore Morena o mo tsitsisitse bokgosing ba Iseraele, hobane puso ya hae e ile ya atlehiswa haholo, ka baka la setjhaba sa hae sa Iseraele.

₃Davida a boela a nyala basadi ba bang hape ha a le Jerusalema, mme a tswala bara le baradi ba bang ba bangata. ₄Ana ke mabitso a bana ba Davida, bao a ileng a ba tswala ha a le Jerusalema: Shamua, le Shobabe, le Nathane, le Solomone, ₅le Jibehare, le Eleshua, le Elepalete, ₆le Noga, le Nefege, le Jafia, ₇le Eleshama, le Beleada, le Elefelede.

₈Ha Bafilesita ba utlwa hore Davida o tlotsitswe hore e be kgosi ya naha ya Iseraele, ba futuha ho ya mo tsoma. Davida a utlwela, mme a ya ba kgahlanyetsa. ₉Bafilesita ba tla, ba fihla ba shatamana ka kgohlong ya Refaime. ₁₀Yaba Davida o botsa Morena, o re: “Na nka futuhela Bafilesita? Na o tla neelana ka bona matsohong a ka?”

Morena a re ho yena: “Futuha, hobane ke tla neelana ka bona matsohong a hao.”

₁₁Yaba Davida o ba futuhela ha ba le Baale-Perasime, mme a ba hlolela hona moo. Jwale Davida a re: “Modimo o phunyeleditse theko ya dira tsa ka ka letsoho la ka, jwaloka metsi ha a phatlola lerako.” Ka baka leo, ba rea sebaka seo lebitso la Baale-Perasime. ₁₂Bafilesita ba siya medimo ya bona hona moo, mme Davida a laela hore e tjheswe.

₁₃Bafilesita ba boela ba shatamana ka kgohlong. ₁₄Ka baka leo, Davida a boela a botsa Modimo, mme Modimo a re ho yena: “O se ke wa ba futuhela o ba setse morao; o ba pote ka nqane, o ba futuhele o hlaha ka difateng tsa monokotshwai. ₁₅E tle ere ha o utlwa mohlwathatsa hodima difate tsa monokotshwai, ebe o a futuha, hobane Modimo o tla be a o eteletse pele ho ya bolaya lebotho la Bafilesita.” ₁₆Ka baka leo, Davida a etsa kamoo Modimo a mo laetseng kateng, mme Baiseraele ba phaladisa lebotho la Bafilesita ho tloha Gibeone, ho ya fihla Gesere.

₁₇Botumo ba Davida ba phatlalla le dinaha tsohle, mme Morena a etsa hore ditjhaba tsohle di mo tshabe.

₁Davida a ikgahela matlo Motseng wa Davida, a lokisetsa areka ya Modimo sebaka sa yona, a e hlomela tente. ₂Yaba Davida o re: “Ho se be ya ka jarang areka ya Modimo, haese Balevi feela, hobane bona ba kgethilwe ke Morena hore ba jare areka ya Modimo, mme ba mo sebeletse kamehla yohle.”

₃Davida a kgobokanyetsa Baiseraele bohle Jerusalema, hore ba ise areka ya Morena sebakeng seo a e lokiseditseng sona. ₄Davida a kgobokanya bana ba Arone le Balevi. ₅Ho bara ba Kohate, hlooho ya bona e ne e le Uriele, bana babo ba le lekgolo le mashome a mabedi. ₆Ho bara ba Merari, hlooho ya bona e ne e le Asaya, bana babo ba le makgolo a mabedi le mashome a mabedi. ₇Ho bara ba Gereshone, hlooho ya bona e ne e le Joele, bana babo ba le lekgolo le mashome a mararo. ₈Ho bara ba Elesafane, hlooho ya bona e ne e le Shemaya, bana babo ba le makgolo a mabedi. ₉Ho bara ba Heborone, hlooho ya bona e ne e le Eleele, bana babo ba le mashome a robedi. ₁₀Ho bara ba Usiele, hlooho ya bona e ne e le Aminadabe, bana babo ba le lekgolo le leshome le metso e mmedi.

₁₁Jwale Davida a bitsa baprista, e leng Sadoke le Abiatare; a bitsa le Balevi, e leng Uriele, le Asaya, le Joele, le Shemaya, le Eleele, le Aminadabe. ₁₂Yaba o re ho bona: “Ke lona dihlooho tsa malapa a Balevi; ka hona itlhwekiseng, lona le bana babo lona, le tle le tsebe ho tlisa areka ya Morena Modimo wa Iseraele, sebakeng seo ke e lokiseditseng sona. ₁₃Kahobane ha e a ka ya tliswa ke lona ka lekgetlo la pele, Morena Modimo wa Iseraele, o ile a re halefela, hobane re ne re sa ka ra mo hlompha ka mokgwa o tshwanetseng.”

₁₄Yaba baprista le Balevi ba a itlhwekisa, hore ba tle ba tsebe ho lata areka ya Morena Modimo wa Iseraele. ₁₅Balevi ba jara areka ya Modimo ka mefeng, jwalokaha Moshe a ne a ba laele, ho ya ka polelo ya Morena.

₁₆Davida a buisana le bao e leng dihlooho tsa Balevi, hore ba kgethe bana babo bona ba tla bina ka diletsa, e leng dikatara, le diharepa, le matlheretlhere, ba bine haholo, ba thabile. ₁₇Balevi ba kgetha Hemane, mora wa Joele; ho bana babo ba kgetha Asafo, mora wa Berekiya; ho bara ba Merari ba kgetha Etane, mora wa Kushaya. ₁₈Ba ba hlahlamang ka boemo ya eba Sekariya, le Jaasiele, le Shemiramote, le Jeiele, le Uni, le Eliabe, le Benaya, le Maasiya, le Matiteya, le Elefelehu, le Mikeniya, le Obede-Edomo, le Jeiele, e leng balebedi ba monyako.

₁₉Dibini tsena, bo-Hemane le Asafo, le Etane, tsa kgethelwa hore di letse matlheretlhere a lethose. ₂₀Bo-Sekariya, le Jaasiele, le Shemiramote, le Jehiele, le Uni, le Eliabe, le Maasiya, le Benaya, ba letsa dikatara tse lentswe le lesesanyane. ₂₁Bo-Matiteya le Elefelehu le Mikeniya, le Obede-Edomo, le Jeiele, le Asasiya ba letsa diharepa tse lentswe le letenya. ₂₂Kenaniya, eo e neng e le hlooho ya Balevi, o ne a okametse dibini, a di ruta mmino, kaha e ne e le kgeleke.

₂₃Bo-Berekiya le Elekana e ne e le balebedi ba areka. ₂₄Baprista, bo-Shebaniya, le Jehoshafate, le Netanele, le Amasai, le Sekariya, le Benaya, le Eleesere, bona ba ne ba letsa diterompeta ba le kapele ho areka ya Modimo. Bo-Obede-Edomo le Jehiya e ne e le balebedi ba areka.

₂₅Jwale bo-Davida, le baholo ba Iseraele, le balaodi ba bahlabani ba dikete, ba ya tlung ya Obede-Edomo, ho ya lata areka ya selekane sa Morena, ba thabile. ₂₆Kahobane Modimo a ne a ile a thusa Balevi ba jereng areka ya selekane sa Morena, ba etsa nyehelo ka dipohwana tse supileng le dipheleu tse supileng. ₂₇Davida o ne a apere seaparo se setle, se entsweng ka lesela la lene, esita le Balevi bohle ba neng ba jere areka, le dibini, le Kenaniya, motsamaisi wa dibini. Davida o ne a bile a apere le setipe se entsweng ka motsitla. ₂₈Yaba Baiseraele bohle ba tlisa areka ya Morena ka ditlatse, le ka medumo ya manaka, le ka diterompeta, le ka matlheretlhere; ba letsa le dikatara, le diharepa.

₂₉Yare ha areka ya selekane sa Morena e kena Motseng wa Davida, Mikale, moradi wa Saule, a sheba ka fesetere, a bona Davida a tlala, a etsa menyakwe, mme a mo nyedisa.

₁Pesalema ya Davida.