Comfort from the Word – Day 4

₁Ke rata Morena,

hobane o utlwile thapedi ya ka,

₂a ntshekehela tsebe,

mohla ke neng ke ipiletsa ho yena.

₃Marapo a lefu a ne a ntlamile,

maraba a Nqalo ya Bafu

a ntshwasitse,

ka ba matswalong le maswabing.

₄Yaba ke rapela lebitso la Morena,

ka rapela, ka re: “Oho, Morena,

ako pholose bophelo ba ka.”

₅Morena o mosa, o lokile,

Modimo wa rona

o na le kutlwelobohloko.

₆Morena o baballa ba hlokang mano,

a na a mpholosa ha ke ne ke fokola.

₂Modimo wa ka, Modimo wa ka,

o ntahletseng?

O hole le ho mpholosa,

ha o utlwe ho dumaela ha ka.

₃Modimo wa ka,

ke ipiletsa le motsheare,

empa ha o nkarabe;

ke howa le bosiu, ha ke kgutse.

₂₄“Lona ba hlomphang Morena,

mo roriseng;

lona ditloholo tsohle tsa Jakobo,

mo tlotliseng;

lona ditloholo tsohle tsa Israele,

mo tshabeng.

₂₅“Ha a a ka a nyedisa ya hlophehileng,

leha e le ho se tsotelle

bohlophehi ba hae;

ha a a ka a mo patela fahleho sa hae,

empa o ile a utlwa ha a mo llela.”

₁₃₇Morena, wena o lokile,

le dikahlolo tsa hao di nepahetse.

₁₃₈Temoso tseo o faneng ka tsona

di lokile, di tshepahala haholo.

₁₃₉Tjheseho ya ka e a nqeta,

hobane ba ntlhoileng

ba lebala mantswe a hao.

₁₄₀Tshepiso ya hao ke ya nnetenete,

mohlanka wa hao o a e rata.

₁₄₁Ke monyenyane, ke a nyediseha,

empa ditaelo tsa hao ha ke di lebale.

₁₄₂Ho loka ha hao

ke ho loka ha kamehla,

Molao wa hao ke nnete.

₁₄₃Ke fihletswe ke matshwenyeho,

ke fihletswe ke matswalo,

empa melao ya hao ke thabo ya ka.

₁₄₄Ditemoso tsa hao di lokile kamehla;

ako nnee kutlwisiso, ke tle ke phele.

₅Ke ile ka batla Morena,

mme a nkaraba,

a ntopolla matswalong wohle a ka.

₆Ba tadimang ho yena

ba kganya kgotso,

mahlong a bona dihlong ha di yo.

₇Motho wa batho

ha a ipiletsa ho Morena,

Morena o a mo utlwa,

o mo pholosa

matshwenyehong wohle a hae.

₁₆Retelehela ho nna, o nkgauhele,

hobane ke nnotshi,

mme ke hlophehile.

₁₇Fedisa matshwenyeho a pelo ya ka,

o nntshe makaqabetsing a ka.

₁₈Tadima ho hlopheha ha ka

le tsietsi ya ka,

mme o ntshwarele dibe tsa ka tsohle.

₁₉Bona kamoo dira tsa ka

di leng ngata kateng,

le kamoo

di ntlhoileng hampe kateng.

₂₀Ako baballe bophelo ba ka,

o nnamolele,

ke se ke ka hlajwa ke dihlong,

kaha ke tshabela ho wena.

₂₁Ako ntshireletse

hobane ke hloka kodi, ke lokile;

hobane ke o lebeletse, Morena.

₂₂Modimo, ako lopolle Iseraele,

o mo lopolle

matshwenyehong a hae wohle.

₇Ako nkutlwe, Morena,

ha ke ipiletsa ho wena;

o nkgauhele, o nkarabe.

₈Pelo ya ka e lohotha wena, e re:

“Batla fahleho sa hae.”

Ruri ke batla fahleho sa hao,

wena Morena.

₉O se mpatele fahleho sa hao;

o se halefele mohlanka wa hao,

wa mo leleka.

Ke wena mothusi wa ka,

o se ke wa ntebela;

o se ke wa ntahla Modimo,

mopholosi wa ka.

₁₀Leha ntate le mme ba ka ntahla,

Morena o tla nthola.

₁₁Mpontshe tsela ya hao Morena,

o ntsamaise mmileng o bataletseng,

ka baka la ba ntaletseng.

₁₂Se tlohele dira tsa ka

ho etsa borata ka nna,

hobane paki tsa bohata

di eme lepaketla

di a nqosa,

di bile di a ntshokela.

₁₃Ruri Morena o tla ntswela molemo,

a ntswele molemo

lefatsheng la ba phelang.

₁₄Lebella Morena, o be sebete;

tiya pelo, o lebelle Morena.

₁₀Nkgauhele Morena,

hobane ke matshwenyehong;

mahlo a ka a motela ke maswabi,

esita le moya wa ka, le mmele wa ka.

₁₁Bophelo ba ka bo fedile,

bo fedile ke mahlomola,

dilemo tsa ka di ile ke ho fehelwa;

matla a ka a fediswa ke ho hlopheha,

le masapo a ka a kgathetse.

₁₂Nna ke sekgobo

ho dira tsa ka tsohle,

haholoholo

ho bao ke ahisaneng le bona,

ke koko ho metswalle ya ka,

ba mponang ditseleng ba a mpaleha.

₁₃Ha ke sa hopolwa;

jwalokaha eka ke mofu,

ke tshwana le ntho e lahlilweng.

₁₄Ke utlwa ditshebo tsa ba bangata,

ke tshoswa ka nqa tsohle;

batho ba nkunuta ba le mmoho,

ba rera ho fedisa bophelo ba ka.

₂Ako mpholose Modimo,

hobane metsi a a nkgama.

₃Ke qahilwe tebetebeng ya seretse,

ha ho moo nka hatang teng,

ka hata ka tsitsa.

Ke fihlile kweetseng,

maqhubu a nkwahetse.

₁₄Ke lebisa thapelo ya ka

ho wena Morena,

ka nako e o kgahlang, Modimo.

Ako nkarabe

ka mohau wa hao o moholo,

le ka botshepehi ba hao

bo pholosang.

₁₅Nqaholle tebetebeng ya seretse,

o nnamolele ho ba ntlhoileng,

ke phonyohe kweetseng.

₁₆Ke se ke ka nkwa

ke morallo wa metsi,

ka metswa ke bodiba,

ka kometswa ke lebitla.

₁₇Nkarabe, Morena,

hobane mohau wa hao o moholo,

o ntadime ho ya ka boholo,

boholo ba lerato la hao.

₁₈O se ke wa pata sefahleho sa hao,

wa se patela mohlanka wa hao,

o nkarabe kapele,

hobane ke matshwenyehong.

₂₉ba hlakolwe bukeng ya bophelo,

ba se ke ba ngolwa le ba lokileng.

₃₀Ha e le nna ke hlophehile,

ke a opelwa;

oho, Modimo, mpholose,

ke boele ke tsohe.

₃₁Ke tla rorisa lebitso la Modimo

ka sefela,

ke le phafe ka teboho.

₃₂Hona ho tla kgahlisa Morena

ho feta hlabelo sa dipohwana,

sa pohwana tse dinaka,

pohwana tse dikgolana.

₃₃Ba eisehang ba tla bona, ba thabe;

lona, ba batlang Modimo,

betang dipelo.

₃₄Morena o utlwa mafutsana,

ha a kgese batho ba hae

ba ditlamong.

₃₅Mahodimo le lefatshe

di ke di mo rorise,

le mawatle

le tsohle tse sesang ho wona;

₃₆hobane Modimo o tla pholosa Sione,

a tsose metse ya Juda:

hore batho ba tle ba ahe ho yona,

e be lefa la bona.