Bible Reading Plan – Day 137

₁Mosadi ya bohlale

o haha lapa la hae,

empa ya sethoto

o le qhala ka matsoho a hae.

₂Motho ya lokileng

o tshaba Morena,

empa ya kgopo

yena o nyedisa Morena.

₃Polelo tsa sethoto

di se otlela boikgantsho,

empa tsa ba bohlale

tsona di a ba sireletsa.

₄Moo kgomo di leng siyo

sejelo ha se na letho,

tjhai e ba ngata ka matla a dipholo.

₅Paki e tshepahalang

ha e ke e thetsa,

empa ya bohata

yona e bua leshano.

₆Mosomi o batla bohlale,

empa ha a bo fumane,

ya nang le kutlwisiso

tsebo o e fumana habonolo.

₇Sutha pela sethoto,

hobane ho sona tsebo ha e yo.

₈Ya bohlale o tseba

ho kgetha tsela ya hae,

sethoto se ithetsa ka bothoto ba sona.

₉Dithoto di tadima sebe e le papadi,

ba lokileng

ba tseba molemo wa poelano.

₁₀Motho o tseba

bohloko ba pelo ya hae,

ha ho e mong

ya ka utlwang thabo ya yona.

₁₁Ntlo ya ya kgopo e tla heletswa,

leaho la ya lokileng

lona le tla atleha.

₁₂Tsela e teng e bonahalang

e lokile ho monga yona,

empa e qetella ka ho isa lefung.

₁₃E mong o tsheha a ntsa hlomohile,

tsheho la hae le qetelle ka maswabi.

₁₄Motho ya kgopo

o ahlolelwa melato ya hae,

ya lokileng yena

o putsetswa diketso tsa hae.

₁₅Kamehla ya se nang tsebo

ke tumelakgweela,

empa ya bohlale

eka kgona a ikgodise.

₁₆Motho ya bohlale

o tshaba bobe, o a bo ila,

empa sethoto

se a tlatselela, se a itshepa.

₁₇Motho ya halefang kapele

o etsa bothoto,

ya nang le mehopolo e mebe

batho ba a mo hloya.

₁₈Lefa la ba se nang tsebo ke bothoto,

athe moqhaka wa ba bohlale ke tsebo.

₁₉Ba kgopo ba kgumama

kapela ba lokileng,

baetsadibe bona

kapela kgoro tsa ba lokileng.

₂₀Mafutsana a hloilwe

le ke ba ahisaneng le wona,

empa barui

ba na le metswalle e mengata.

₂₁Ya nyedisang ya ahisaneng le yena

o etsa sebe,

empa ho lehlohonolo

ya hauhelang mofutsana.

₂₂Ba rerang bobe ba a lahleha,

empa ba rerang botle

ba fumana mohau le nnete.

₂₃Mesebetsi yohle

e na le moputso wa yona,

empa ho berabera

hona ho a futsanehisa.

₂₄Meqhaka ya ba bohlale

ke maruo a bona,

bothoto ba dithoto

bona bo tswala bothoto.

₂₅Paki ya nnete e pholosa batho,

athe ya bohata yona e bua leshano.

₂₆Ya tshabang Morena

o na le qhobosheane,

bana ba hae ba fumana setshabelo.

₂₇Ho tshaba Morena

ke sediba sa bophelo,

ya mo tshabang

o phema maraba a lefu.

₂₈Tlotla ya kgosi

ke ho busa tjhaba se le sengata,

athe kgosana

e timela ke ho hloka setjhaba.

₂₉Ya diehang ho halefa

o na le kutlwisiso,

athe sefelapelwana

se bontsha bothoto.

₃₀Pelo e nang le kgotso

e phedisa motho hantle,

empa mona

o bodisa masapo a motho.

₃₁Ya hatellang mofutsana

o nyedisa Mmopi wa hae,

empa ya mo hauhelang

yena o tlotla Modimo.

₃₂Ya kgopo o fediswa

ke bokgopo ba hae,

ya lokileng o na le letshepa,

esita le lefung la hae.

₃₃Ya nang le kutlwisiso

o ruile bohlale,

le hara dithoto bo a itotobatsa.

₃₄Ho loka ho atlehisa setjhaba,

empa sebe ke sekgobo ho sona.

₃₅Kgosi e kgahlwa

ke mohlanka ya bohlale,

athe ya hlabisang dihlong

yena e a mo halefela.

₁Ya arabang ka boikokobetso

o tima kgalefo,

empa polelo e kgahlapetsang

e baka bohale.

₂Leme la ya bohlale

le ratisa batho tsebo,

empa molomo wa sethoto

o kopotsa bothoto.

₃Mahlo a Modimo a bona kahohle,

a disa ba kgopo le ba lokileng.

₄Leme le thabisang

ke fate sa bophelo,

empa le thetsang

le senya pelo ya motho.

₅Sethoto se nyedisa

thuto ya ntata sona,

athe ya ratang kgalemo

yena o a hlalefa.

₆Ka tlung ya ya lokileng

leruo le teng,

empa ya kgopo

leruo le mmakela ditsietsi.

₇Molomo wa ya bohlale o jala tsebo,

pelo ya ya sethoto yona e mpe.

₈Mahlabelo a ya kgopo

ke manyala ho Morena,

empa thapelo ya ya lokileng

e a mo kgahla.

₉Ditsela tsa ya kgopo

ke manyala ho Morena,

ya labalabelang ho loka

yena o a mo rata.

₁₀Ya kgelohang tsela o tla otlwa haholo,

ya hloileng kgalemo yena o tla timela.

₁₁Morena o tseba

tse ka Nqalong ya Bafu,

le tse ka ho ya Timelo o a di tseba,

a ka sitwa keng ho tseba

makunutu a batho?

₁₂Mosomi yena o hloile kgalemo,

le ho ba bohlale

a ke ke a batla keletso.

₁₃Pelo ha e thabile

sefahleho se kganya kgotso,

empa ha e hlomohile

motho o utlwa bohloko.

₁₄Ya nang le kutlwisiso

o labalabela tsebo,

athe dithoto tsona

di labalabela bothoto.

₁₅Ya tshwenngwang

o phela habohloko ka nako tsohle,

ya thabileng

yena o keteka kamehla.

₁₆Sejosenyane se molemo

ha o tshaba Morena,

ho ena le maruo

a o bakelang ditsietsi.

₁₇Ho molemo ho ja moroho

o fanwang ka lerato,

ho ena le matshufu

a fanwang ka lehloyo.

₁₈Motho ya bohale o baka diqabang,

ya nang le mamello yena o a di fedisa.

₁₉Tsela ya sekgoba

e ririellane meutlwa,

athe ya ya lokileng

yona e bataletse hantle.

₂₀Ngwana ya bohlale o thabisa ntatae,

empa sethoto sona

se nyedisa le mma sona.

₂₁Ya hlokang bohlale

o thabiswa ke bothoto,

ya nang le kutlwisiso

yena o etsa ho lokileng.

₂₂Ya sa rateng dikeletso

merero ya hae e a nyopa,

ya eletswang ke ba bangata

yena o a atleha.

₂₃Karabo e nepahetseng

e thabisa monga yona,

e tlang ka nako ya yona

e molemo hakaakang!

₂₄Ho ya bohlale

tsela ya bophelo ke e yang hodimo,

ho mo phemisa

ho theohela lebitleng.

₂₅Morena o timetsa

lapa la moikgantshi,

empa o sireletsa

moedi wa lapa la mohlolohadi.

₂₆Mehopolo ya ya kgopo

ke manyala ho Morena,

polelo tsa ya lokileng

tsona di kgahlisa Morena.

₂₇Ya meharo

o tlisetsa lapa la hae tsietsi,

ya hloileng tjotjo yena o tla phela.

₂₈Ya lokileng o inahana a eso arabe,

molomong wa ya kgopo

bokgopo bo a kopotsa.

₂₉Morena o emeletse thoko,

thoko le ba kgopo,

thapelo ya ba lokileng

o e sekehela tsebe.

₃₀Ho tadima motho hantle

ho thabisa pelo ya hae,

taba tse molemo di mo tsosa molota.

₃₁Ya mamelang kgalemo

e isang bophelong,

o tla dula hamonate hara ba bohlale.

₃₂Ya sa natseng thuto o a inyedisa,

empa ya mamelang kgalemo

o ekeletswa kutlwisiso.

₃₃Ho tshaba Morena

ho ruta motho bohlale;

ikokobetse pele, mme o tla tlotlwa.

₁Pelo ya motho e rera merero,

tseo a di buang

di laolwa ke Morena.

₂Ketso tsa motho

di tadimeha di lokile ho yena,

empa Morena

o lekola sepheo sa hae.

₃Bea mesebetsi ya hao

atleng tsa Morena,

mme merero ya hao

e tla phethahala.

₄Tsohle Morena o di entse

ka morero wa hae,

le ya kgopo

tsatsi la ditlokotsi le mo emetse.

₅Motho ya ikgantshang,

Morena o a mo nyonya,

ya jwalo Morena o tla mo ahlola.

₆Sebe se hlakolwa

ke lerato le botshepehi;

ya tshabang Morena

bobe o tla bo phema.

₇Eo metsamao ya hae

e kgahlang Morena,

Morena o mo phedisa

ka kgotso le dira tsa hae.

₈Sejosenyane se molemo

ha se fumanwe ka toka,

ho ena le maruo

a fumanwang ka bolotsana.

₉Motho o itherela tsela ya hae,

empa ke Morena ya mo tataisang.

₁₀Diqeto tsa kgosi

di tswa ho Modimo,

ha e ahlola e ahlola ka toka.

₁₁Tekanyo tse nepahetseng

ke tsa Morena,

majwe a supang boima

a entswe ke yena.

₁₂Kgosi di nyatsa ketso tse manyala

ho loka hona ho tsitsisa mmuso.

₁₃Molomo o buang tse lokileng

o thabisa dikgosi,

dikgosi di rata motho ya buang nnete.

₁₄Kgalefo ya kgosi

e tshwana le ya tlisang pehi,

empa ya bohlale

o kokobetsa kgalefo.

₁₅Ho thaba ha kgosi ho a phedisa,

mohau wa yona

o ka leru la pula selemo.

₁₆Ho fumana bohlale

ho molemo ho feta kgauta,

ho fumana kutlwisiso

ho molemo ho feta silefera.

₁₇Tsela ya ba lokileng

e kgeloha bobe,

ya e hlokomelang

o baballa bophelo ba hae.

₁₈Boikakaso bo etella timelo pele,

boikgohomoso bo etelle ho wa, pele.

₁₉Ho molemo ho ikokobetsa

o le hara mafutsana,

ho ena le ho arolelana kgapo

le baikgohomosi.

₂₀Ya elang ditaelo hloko o a atleha,

ya tshepang Morena

o a hlohonolofala.

₂₁Ya bohlale

ho thwe o na le kutlwisiso,

polelo tse monate tsona

di a kgodisa,

₂₂Bohlale ke diba sa bophelo

ho ya nang le bona,

ho ruta dithoto

ke ho itshenyetsa nako.

₂₃Ya bohlale

o hlalefiswa ke pelo ya hae,

le seo a tla se bua

o se rutwa ke yona.

₂₄Polelo tse monate

di ka mahe a dinotshi,

moyeng di a hlabosa,

di matlafatse mmele.

₂₅Tsela e teng e bonahalang

e lokile ho monga yona,

empa e qetella ka ho isa lefung.

₂₆Sekgothadi se a itshebeletsa,

se itshebeletsa ka thata,

hobane se lakatsa ho ikgotsofatsa.

₂₇Senokwane se rera bobe,

molomong wa sona

ho tswa tse tjhesang sa malakabe.

₂₈Motho ya kgopo o duka kgotso,

mosebi yena o qabanya metswalle,

metswalle ya hlooho ya kgomo.

₂₉Motho ya dikgoka

o hohela ya ahisaneng le yena,

a mo tsamaise tseleng tse sa lokang.

₃₀Ya robang leihlo o rera bokgopo,

ya petlang melomo

bobe o sa bo entse.

₃₁Moriri o moputswa

ke mofapahlooho o kgabane,

o fumanwa

ke ya phelang ka ho loka.

₃₂Ya nang le mamello

o molemo ho feta ya dikgoka,

ya itshwarang ha a halefile

o feta ya hapang motse.

₃₃Batho ba laola ditaba ka lotho,

empa diqeto tsona ke tsa Morena.