Bible Reading Plan – Day 136

₁Morena o hloile sekala

se qhekanyetsang,

empa boima bo nepahetseng

bona bo a mo thabisa.

₂Boikakaso bo etella dihlong pele,

boikokobetso bona

bo tsamaya le bohlale.

₃Ba tshepahalang

ba tataiswa ke botshepehi ba bona,

ba sa tshepahaleng bona ba timela,

ba timetswa

ke ho se tshepahale ha bona.

₄Kgalefo ya Modimo

e ke ke ya fediswa,

ya fediswa ke maruo a motho,

empa ho loka

ho lopolla motho lefung.

₅Ho loka ha ba se nang molato

ho lokisa tsela tsa bona,

ba kgopo ba timetswa

ke bokgopo ba bona.

₆Ho loka ha ba lokileng

ho a ba lopolla,

ba hlokang botshepehi

ba tshwaswa ke ditakatso,

takatso tsa bona tse mpe.

₇Ha ya kgopo a eshwa,

tshepo ya hae e a fela,

maruo ao a neng a a tshepile

le wona a a fela.

₈Ya lokileng

o pholoswa tsietseng ya hae,

ebe ya kgopo yena o wela ho yona.

₉Polelo tsa ya kgopo

di timetsa mohahabo,

empa ya lokileng

yena o pholoswa ke tsebo.

₁₀Ha ba lokileng ba atleha

motse o a nyakalla,

ha ba kgopo ba timela,

hara motse ke medidietsane.

₁₁Ho hlohonolofatswa ha ba lokileng

ho haha motse,

athe leme la ya kgopo

lona le a o timetsa.

₁₂Sethoto se nyedisa mohahabo sona,

empa ya nang le kutlwisiso

yena ke lethola.

₁₃Ya ratang ditshebo

o hlahatsa makunutu,

ya tshepahalang yena o na le sefuba.

₁₄Tjhaba se hlokang botsamaisi

se a lahleha,

se nang le baeletsi ba bangata

se a bolokeha.

₁₅Ya itlamang ka molato wa motho

o a itsietsa,

ya hanang ho itlama

o iphemisa kotsi.

₁₆Mosadi ya mosa

o kgaba ka hlompho,

banna ba dikgoka

ba ikgapela maruo.

₁₇Monna ya mohau

o iketsetsa tse molemo,

athe ya sehloho

yena o a itshitelwa.

₁₈Motho ya kgopo

o amohela moputso wa bolotsana,

ya jalang ho loka

o kotula moputso wa nnete.

₁₉Motho ya lokileng

o tla rua bophelo,

ya pheeletseng bobe

yena o tla timela.

₂₀Morena o hloile ba pelo di kgopo,

empa o thabela

ba metsamao e lokileng.

₂₁Ruri ba kgopo ba tla ahlolwa,

ba lokileng bona ba pheme kahlolo.

₂₂Mosadi ya hlokang boitshwaro

leha a le motle,

o jwaloka sale la kgauta

nkong ya kolobe.

₂₃Ya lokileng

o lakatsa tse molemo,

ya kgopo yena

o emetswe ke kgalefo.

₂₄E mong o fana haholo,

leruo le mo atele,

e mong e be lekgonatha,

bofuma bo mo aparele.

₂₅Ya fanang haholo

o tla fumana katleho,

ya fanang ka metsi

le yena o tla a fuwa.

₂₆Ya hanang ho rekisa koro

batho ba a mo rohaka,

empa ya ba rekisetsang

yena o a hlohonolofala.

₂₇Ya pheellang tse molemo

o tla hauhelwa,

ya pheellang bobe

bo tla mo wela hodimo.

₂₈Ya tshepang maruo a hae

o tla timela,

ya lokileng o atleha

jwaloka hlaku le letalana.

₂₉Ya hlorisang lapa la hae

a ke ke a rua letho,

sethoto se tla fetoha

kgoba la ya bohlale.

₃₀Tholwana ya ho loka

ke sefate sa bophelo,

ya bohlale yena

o hapa meya ya batho.

₃₁Ya lokileng

o tla fumana moputso a sa phela,

ya kgopo le moetsadibe

le bona ba tla putswa.

₁Ya ratang ho lauwa o rata tsebo,

ya hloileng ho kgalengwa

ke phoofolo ya naha;

₂ya lokileng

Morena o a mo hauhela,

ya merero e mebe

yena o a mo ahlola.

₃Bokgopo

ha bo ke be bo bope motho,

ba lokileng bona

ba ke ke ba sisinngwa.

₄Mosadi ya lokileng

ke moqhaka ho monna wa hae,

ya hlabisang dihlong

yena ke mofetshe,

ke mofetshe

o jang monna hae masapo.

₅Merero ya ya lokileng e nepahetse,

keletso tsa ya kgopo di tletse thetso.

₆Polelo tsa ya kgopo

ke maraba a ho bolaya,

empa tsa ya lokileng

tsona di a pholosa.

₇Ho hlolwa ha ba kgopo

ke ho fela ha bona,

athe lapa la ya lokileng

lona le tiya kamehla.

₈Motho o babatswa

ka baka la bohlale ba hae,

empa ya pelo e kgopo

yena o a nyediswa.

₉Ho molemo ho nyatswa

o ena le kgoba le le leng,

ho ena le ho hlomphuwa

o bolawa ke tlala.

₁₀Ya lokileng

o baballa phoofolo ya hae,

mohau wa ya kgopo

o kwetlile sehloho.

₁₁Ya lemang masimo a hae

o tla tjhaya haholo,

ya pheellang mafeela

yena o hloka kelello.

₁₂Ya kgopo o labalabela

qhoqha ya mahahapa,

empa ya lokileng yena o a atleha.

₁₃Motho ya kgopo

puo tse mpe tsa hae di a mo kgata,

empa ya lokileng

yena o phema tsietsi.

₁₄Motho e mong o atlehiswa

ke dipuo tsa hae,

athe e mong o putswa

ho ya ka mesebetsi ya hae.

₁₅Tsela ya sethoto

e bonahala e lokile ho sona,

empa ya bohlale o amohela keletso.

₁₆Sethoto se sitwa ho itshwara

ha se halefa,

empa ya bohlale

o iphapanyetsa dikgopiso.

₁₇Paki ya sebele

e bua nnete eo e e tsebang,

empa ya bohata yona e bua leshano.

₁₈Polelo tsa ya phasolohang

di hlaba jwaloka sabole,

leleme la ya bohlale lona le a fodisa.

₁₉Polelo tsa nnete di hlola kamehla,

athe leshano ha le na mokoka.

₂₀Pelong tsa ba rerang bobe

ho tletse thetso,

empa tsa ba rerang kgotso

tsona di tletse thabo.

₂₁Ba lokileng

ba ke ke ba hlahelwa ke ditsietsi,

empa ba kgopo

ba tla aparelwa ke bobe.

₂₂Morena o hloile motho

ya buang leshano,

empa ya buang nnete

yena o a mo thabisa.

₂₃Mohlalefi ha a boledisake

tsebo ya hae,

sethoto sona

se pepesa bothoto ba sona.

₂₄Ya sebetsang ka thata

ke yena ya tla busa,

empa sekgoba sona

se tla fetoha lekgoba.

₂₅Ho feha matshwafo

ho nyahamisa pelo ya motho,

polelo e monate yona e a e thoba.

₂₆Ya lokileng ke mohlala

ho ba ahisaneng le yena,

ba kgopo ba tsamaya

tseleng e kgelosang.

₂₇Sekgoba se kgutla tsholong

se itlhophere,

athe tjhai ya sehwai e sasamatsa disiu.

₂₈Tsela tse lokileng di isa bophelong,

di kutlehile hantle, ha di ise timelong.

₁Mora ya bohlale

o mamela thuto ya ntatae,

empa moikakasi

ha a natse kgalemo.

₂Motho o kgola tholwana tse monate,

tholwana tsa dipuo tsa hae,

ya sa tshepahaleng

yena o lapetse mahahapa.

₃Ya tshwarang leme la hae

o baballa bophelo ba hae,

ya phasolohang feela

yena o tla timela,

₄Sekgoba se a lakatsa,

empa ha se fumane letho,

sekgothadi se a atleha,

se kgotsofatswa ke tsohle.

₅Motho ya lokileng o hloile leshano,

ya kgopo ha a na dihlong,

o a swabisa.

₆Toka e sireletsa ya lokileng,

bokgopo bona

bo kudupanya baetsadibe.

₇E mong o iketsa morui,

a se na letho,

e mong a iketse mofutsana,

a hafa ka nkatana.

₈Bophelo ba motho

bo ka lopollwa ka maruo a hae,

mofumanehi yena

ha a ke a sokelwa ke motho.

₉Lebone la ya lokileng

le tuka haholo,

empa bone la ya kgopo

lona le tla tingwa.

₁₀Dikgang di hlahiswa ke boikakaso,

bohlale bo fumanwa

ho ba mamelang dikeletso.

₁₁Maruo a bolotsana a tla fela hang,

a kolletswang kahanyane

wona a a eketseha.

₁₂Tshepo e sa phethahaleng

e nyahamisa pelo,

takatso tse phethahatswang

di ka fate sa bophelo.

₁₃Ya nyefolang dikeletso

o tla timela,

ya bolokang molao

o tla amohela moputso.

₁₄Thuto ya ya bohlale

ke sediba sa bophelo,

e phemisa motho maraba a lefu.

₁₅Kelello e tjhatsi ho bohle

e a kgahleha,

tsela ya ba sa tshepahaleng

e isa timelong.

₁₆Motho ya bohlale

o sebetsa ka kelello,

sethoto sona

se pepesa bothoto ba sona.

₁₇Leqosa le kgopo

le welwa ke ditsietsi,

moromuwa ya tshepahalang

o tlisa tse molemo.

₁₈Bofuma le dihlong

di wela ya hanang kgalemo,

tlotla e aparela

ya sa haneng ho nyatsuwa.

₁₉Se labalabelwang ha se fihletswe

se a thabisa,

dithoto tsona ha di rate ho tela bobe.

₂₀Ya tsamayang le bahlalefi

o a hlalefa,

molekane wa dithoto

yena o a thotofala.

₂₁Bobe bo salama baetsadibe,

ba lokileng bona

ba putswa ka tse molemo.

₂₂Monna ya lokileng

o siela tloholo tsa hae lefa,

leruo la moetsadibe

ke lefa la ba lokileng.

₂₃Masimong a mofutsana

tjhai e ba ngata,

ba hlokang toka bona ba a e fedisa.

₂₄Motho ya sa shapeng mora hae

o mo hloile,

athe ya ratang mora hae

yena o a mo kgalema.

₂₅Ya lokileng o a ja,

a ikgotsofatse,

empa ya kgopo

yena o ngongorehela dijo.