Bible Reading Plan – Day 112

₂Oho, Modimo, ako ntopolle;

oho, Morena,

ako potlakele ho nthusa.

₃Ba tsomileng bophelo ba ka

ba ke ba hlajwe ke dihlong,

ba ferekane;

ba ntakaletsang bobe

ba ke ba tjhetjhe, ba tlontlolohe.

₄Ba ke ba kgutliswe

ke ho tlontloloha,

bana ba reng ka nna: “Aha! Aha!”

₅Bohle ba o batlang

ba ke ba nyakalle, ba o thabele.

Ba ratang ho pholoswa ke wena

ba nne ba re:

“Modimo o moholo!”

₆Ha e le nna

ke mohlophehi le mofutsana:

Oho, Modimo, ako mpotlakele.

Ke wena mothusi le molopolli wa ka;

oho, Morena, se diehe.

₁Ke tshabela ho wena Morena,

ke tle ke se ke ka hlajwa ke dihlong

ka hlajwa ke dihlong le ka mohla.

₂Ako nnamolele ka ho loka ha hao,

nnamolele o ntopolle;

o ntshekehele tsebe, o mpholose.

₃Eba lehaha

leo ke tshabelang ho lona,

leo nka tshabelang ho lona kamehla;

o se o laetse hore ke pholoswe,

wena lefika la ka

le qhobosheane ya ka.

₄Modimo wa ka, ako nnamolele,

o nnamolele matsohong a ya kgopo,

diatleng tsa ya sa lokang,

tsa ya sehloho.

₅Morena, Morena wa ka,

o tshepo ya ka,

ke o tshepile

ho tloha botjheng ba ka.

₆O ntsheheditse

ho tloha tswalong ya ka,

wa ntshireletsa

ho tloha popelong ya mme;

nke ke ka kgaotsa ho o rorisa.

₇Ke jwaloka mohlolo ho ba bangata,

empa wena

o setshabelo sa ka sa nnete.

₈Molomong wa ka

ho tletse thoriso ya hao,

le tlotliso ya hao kamehla.

₉Se ntahle boqhekung ba ka,

o se mphuralle

ha matla a mpheletse;

₁₀hobane dira tsa ka di bua ka nna,

ba ntaletseng ba a nthera,

₁₁ba re: “Modimo o mo furaletse,

mo lelekiseng,

le mo tshware,

hobane ha ho ya tla mo namolela.”

₁₂Modimo, se be hole le nna,

Modimo wa ka,

ako potlakele ho nthusa.

₁₃Ba ntwantshang

ba ke ba hlajwe ke dihlong,

ba ke ba hlajwe ke dihlong, ba timele;

ba ntakaletsang bobe

ba ke ba fetohe sekgobo,

ba fetohe sekgobo, ba tlontlolohe.

₁₄Empa nna nke ke ka kgaotsa

ho o tshepa,

ke tla eketsa ho o rorisa.

₁₅Molomo wa ka

o tla bolela tsa ho loka,

o bolele tsa ho loka ha hao,

le tsa ho pholosa ha hao kamehla,

le hoja nke ke ka tseba ho di bala.

₁₆Ke tla bua ka tsa matla a hao,

wena Morena, Morena wa ka,

ke hopotse batho tsa ho loka ha hao,

ho loka hoo e leng ha hao feela.

₁₇Modimo, o nthutile

wa nthuta ho tloha botjheng ba ka,

mme ho fihlela jwale

ke ntse ke tumisa dimakatso tsa hao.

₁₈Jwale ha ke se ke le leqheku,

hlooho e se e le putswa,

oho, Modimo, o se ke wa mphuralla,

ho fihlela ke senolela

meloko yohle e tlang

tsa matla a hao

le tsa bonatla ba hao,

₁₉le tsa ho loka ha hao,

ho fihlang hodimodimo,

wena Modimo.

O entse tse kgolo, Modimo;

ke mang ya tshwanang le wena?

₂₀Le hoja o nkutlwisitse matshwenyeho,

matshwenyeho a mangata,

a bohloko,

o tla boela o mmatlafatse,

o boele o nnyolle

botebong ba lefatshe;

₂₁o nkgodise ho feta pele,

o nne o ntshedise hape.

₂₂Jwale nna ke tla o boka ka seletsa,

ka baka la botshepehi ba hao,

wena Modimo wa ka;

ke o roke ka harepa,

wena Ya Halalelang wa Iseraele.

₂₃Molomo wa ka o tla howa ka thabo,

o howe ha ke o roka,

le wona moya wa ka

oo o o lopolotseng.

₂₄Leleme la ka le tla bolela

tsa ho loka,

le bolele tsa ho loka ha hao kamehla,

ba ntakaletsang bobe ba tlontlolohe,

ba tlontlolohe, ba ferekane.

Oho, Modimo,

etsa hore kgosi e ahlole,

e ke e ahlole ka toka,

o nee mora kgosi ho loka ha hao,

₂a tle ahlolele tjhaba sa hao,

a se ahlolele ka ho loka,

le mafutsana a hao ka toka.

₃Dithaba di ke di tlise kgotso,

di e tlisetse setjhaba,

le wona maralla

a se tlisetse ho loka.

₄Bahlophehi hara setjhaba

a ba ahlolele,

a pholose bana ba mafutsana,

a hatakele mohatelli.

₅A ke a phele halelele jwaloka letsatsi,

le jwaloka kgwedi

ho isa melokong yohle.

₆A be jwaloka pula a nelang jwang,

le jwaloka medupe

e nwesetsang lefatshe.

₇Ditshiung tsa hae

ho loka ho ke ho ate,

le kgotso e be ngata,

ho fihlela kgwedi e fifalla ruri.

₈A buse ho tloha lewatleng le leng

ho isa ho le leng,

le ho tloha Nokeng

ho isa pheletsong tsa lefatshe.

₉Ba mo lwantshang

ba ke ba mo kgumamele,

dira tsa hae di nyeke lerole.

₁₀Dikgosi tsa Tarashishe

le tsa dihlekehleke

di ke di mo nyehelle,

dikgosi tsa Sheba le tsa Seba

di mo tlisetse dithelo.

₁₁Dikgosi tsohle di itihe kapele ho yena,

ditjhaba tsohle di mo sebeletse.

₁₂O tla lopolla mohloki

ya llang ho yena,

le mohlophehi

ya hlokang mothusi.

₁₃Ya fokolang le ya hlokang

o tla ba utlwela bohloko,

a pholose bophelo ba mafutsana.

₁₄O tla ba lopolla

a be lopolle ho ba mamenemene,

a ba lopolle le ho ba sehloho,

madi a bona e tla ba a bohlokwa,

e be a bohlokwa mahlong a hae.

₁₅A ke a phele!

A newe kgauta ya Sheba,

a nne a rapellwe ho sa kgaotswe,

a nne a bokwe ka matsatsi wohle.

₁₆Lefatshe le ke le aparelwe ke koro,

e ekethehe qhoweng tsa dithaba,

tjhai e be jwaloka ya Lebanone;

metseng ho tlale batho,

ba be jwaloka jwang ba naha,

jwang bo tlokomang.

₁₇Lebitso la hae le se ke la lebalwa,

le se ke la lebalwa le ka mohla,

le hopolwe

ha letsatsi le ntse le tjhaba.

Ditjhaba tsohle

di ke di hlohonolofale,

di hlohonolofale ka baka la hae,

merabe yohle

e mmitse ya lehlohonolo.

₁₈Ho bokwe Morena,

Modimo wa Iseraele,

e leng yena a inotshi

ya etsang dimakatso.

₁₉Lebitso la hae le tlotlehang le bokwe,

le bokwe kamehla le mehla,

lefatshe lohle le tlale tlotla ya hae.

A ho be jwalo! A ho be jwalo!

Ruri Modimo o molemo ho Iseraele,

e, le ho ba pelo di hlwekileng.

₂Empa nna,

ke batlile ke kgothometseha,

maoto a ka a batlile a thella;

₃hobane ke ne ke honohela baikakasi,

ha ke bona katleho ya ba kgopo.

₄Bona ha ba na matshwenyeho,

mmele ya bona e shahlile,

ba nonne.

₅Ha ba na dikgathatso

jwaloka ba bang,

mme ha ba otlwe

jwaloka ba bang.

₆Ka baka leo,

boikgohomoso ke sefaha,

ke sefaha melaleng ya bona,

sehloho ke seaparo

seo ba se apereng.

₇Mahlo a bona

a rotolohile ke mafura,

ka dipelong

ba tletse mehopolo ya bowatla.

₈Ba a tlaka, mme ba bua tse mpe,

ba sokela batho ka boikgantsho.

₉Melomo ya bona

e nyefola tsa lehodimo,

maleme a bona

a bebera tsa lefatshe.

₁₀Kahoo setjhaba sa ka

se ba sala morao,

se inyorolla ka metsi

a mehopeng ya bona.

₁₁ba re: “Modimo a ka tseba jwang?

Na tsebo e teng

ho Ya Hodimodimo?”

₁₂Ba kgopo ba jwalo;

kamehla ba qhwaolla dikobo,

ba ikatisetsa maruo.

₁₃Ho thusang ho hlwekisa pelo ya ka,

le ho hlokisa matsoho a ka molato,

₁₄ha e le moo ke otlwa

ka matsatsi wohle,

ke otlwa hoseng ho hong le ho hong?

₁₅Hoja nkile ka re:

“Ke tla bua jwaloka bona,”

nka be ke kgelohile molokong,

molokong wa bana ba hao.

₁₆Ha ke ntse ke nahanahana,

ke nahana hore ke utlwisise tsena,

ka fumana e le ntho e thata,

₁₇ho fihlela ke ba ke kena Sehalalelong,

Sehalalelong sa Modimo,

mme ke utlwisisa

seo qetello ya ba kgopo

e tla ba sona.

₁₈Ruri o ba beile moo ho thellang,

wa ba dihela hore ba ye timelong;

₁₉ba fetoha lesupi

ka ho panya ha ntshi,

ba fedile,

qetello ya bona ke e tshosang.

₂₀Morena, jwalokaha toro e fela,

e fela ha motho a phaphama,

le wena ha o tsoha

o fedisa seriti sa bona.

₂₁Ha pelo ya ka

e ne e utlwile bohloko,

mme maikutlo a ka a hlabehile,

₂₂ka ba lewatla, ka hloka kutlwisiso,

ka ba jwaloka phoofolo

mahlong a hao.

₂₃Empa leha ho le jwalo,

ke na le wena kamehla,

o ntshwere ka letsoho le letona.

₂₄O ntsamaisa ka keletso ya hao,

mme qetellong

o tla nkamohela ka tlotla.

₂₅Nka ba le mang lehodimong

haese wena?

Ha ke ena le wena,

ha ke sa lakatsa letho lefatsheng.

₂₆Leha mmele wa ka

le pelo ya ka di ka fela,

Modimo ke lefika la ka

le kabelo ya ka kamehla.

₂₇Ha e le ba ikarohantseng le wena,

bona ba tla timela;

o fedisa bohle

ba sa tshepahaleng ho wena.

₂₈Empa ho nna ho ba haufi le Modimo,

ke ntho yona e molemo.

Ke ikgethetse Morena,

Morena wa ka,

ho ba setshabelo sa ka,

ke tle ke bolele

mesebetsi ya hae yohle.

Modimo, na o re lahletse ruri?

Keng ha o halefela mohlape,

mohlape wa makgulo a hao,

o o halefela ka bohale bo tukang?

₂Ako hopole phutheho ya hao

eo e bileng leruo la hao,

leruo la hao ho tloha kgale,

eo o e lopolotseng,

moloko oo e leng lefa la hao;

le thaba ya Sione

eo o ahileng ho yona.

₃Lebisa mehato ya hao dithakong,

dithakong tseo tsa kgale,

sera se sentse tsohle

tse ka Sehalalelong.

₄Ba o lwantshang ba puruma,

ba puruma ba le Sehalalelong sa hao,

ba hlomile mekgele ya bona,

ba e hloma e le pontsho ya tlholo.

₅Ba tshwana le ba kenang morung,

ba kenang teng ka dilepe;

₆mekgabiso yohle ya yona ya lehong,

ba e pshatlile ka dikwakwa,

ba e pshatla le ka dikoto.

₇Ba tjhesitse Sehalalelo sa hao,

ba heletsa,

ba tlontlolla Leaho la hao.

₈Ka dipelong tsa bona ba itse:

“A re ba hatakeleng

kaofela ha bona,

re tjhese dibaka tsohle tsa phutheho,

tsa phutheho ya Modimo

naheng ena.”

₉Ha re sa na pontsho

tse tswang ho Modimo,

ha ho sa le moporofeta;

hara rona ha ho le ya mong

ya tsebang hore

ho tla ba jwalo ho fihlela neng.

₁₀Modimo, ya o lwantshang,

o tla o nyefola ho fihlela neng?

Na sera se tla o nyedisa,

se nyedise lebitso la hao kamehla?

₁₁O sa tshwaretseng

letsoho la hao?

O patetseng

letsoho la hao le letona,

wa le pata sefubeng sa hao?

₁₂Athe Modimo, o kgosi ya ka

ho tloha mehleng ya kgale,

wena mohlodi wa topollo lefatsheng.

₁₃Ke wena ya ileng a arohanya lewatle,

wa le arohanya ka matla a hao,

wa pshatla hlooho tsa dikganyapa,

wa di pshatela lewatleng.

₁₄wa di thuakanya dihlooho,

wa di abela ditlhapi

e be dijo tsa tsona.

₁₅Ke wena ya ileng a bulela didiba,

wa bulela le dinokana,

wa pshesa dinoka

tse phallang kamehla.

₁₆Motsheare ke wa hao,

le bosiu ke ba hao;

kgwedi le letsatsi o di beile,

wa di bea madulong a tsona.

₁₇Ke wena ya ileng a seha meedi,

wa seha meedi yohle ya lefatshe,

lehlabula le mariha

di entswe ke wena.

₁₈Morena, ako hopole

kamoo sera se o nyefolang kateng,

kamoo setjhaba sa dithoto

se nyedisang lebitso la hao kateng.

₁₉Se neele sebata

moya wa Leeba la hao,

bophelo ba mafutsana a hao

o se bo leballe ruri.

₂₀Ako hopole selekane sa hao,

hobane diqhobo tsohle tsa naha

di tletse ba sehloho.

₂₁Ya hatellwang

a se ke a hlajwa ke dihlong,

mohlophehi le mofutsana

ba rorise lebitso la hao.

₂₂Tsoha Modimo, o itwanele,

hopola hore sethoto se a o nyefola,

se o nyefola ka matsatsi wohle.

₂₃Se lebale ho rora ha ba o lwantshang,

ho eketseha ha lerata

la ba o tsohelang matla.