Bible Reading Plan – Day 111

Etsetsang Modimo ditlatse,

lona ba lefatshe lohle,

₂mo rokeng, le tlotlise lebitso la hae,

le mo rorise

ka mokgwa o tlotlehang.

₃Ereng ho Modimo:

“Mesebetsi ya hao

e tshabeha hakaakang!

Ka baka la matla a hao a maholo,

dira tsa hao di a o qekisa.

₄Lefatshe lohle le a o kgumamela,

le a o roka,

le roka lebitso la hao.”

₅Tloong, le bohe

mesebetsi ya Modimo:

O a tshabeha diketsong tsa hae,

ketsong tsa hae ho bana ba batho.

₆O ile a apola lewatle,

ha hlaha mobu o ommeng,

batho ba tshela noka ka maoto;

ka baka leo, a re mo thabeleng.

₇Ka matla a hae o busa kamehla,

mahlo a hae a disa ditjhaba,

esere bahanyetsi ba boela ba tsoha.

₈Bokang Modimo wa rona,

lona ditjhaba,

utlwahatsang thoriso ya hae.

₉Ke yena ya re fileng bophelo,

ya sa kang a tlohela maoto a rona,

a a tlohella ho thella.

₁₀Modimo, o ile wa re hlahloba,

wa re hlwekisa seboping

jwaloka silefera;

₁₁wa re tshwasa ka letlowa,

wa re belesa mojaro o boima;

₁₂wa dumella batho ho re hata melala,

ra feta hara mollo le metsi;

wa ntano re kgatholla haholo.

₁₃Ke tla ya tlung ya hao

ke nkile setjheso,

ke o phethele dikano tsa ka,

₁₄tseo ke di buileng ka molomo wa ka,

ka di bolela ke le matshwenyehong.

₁₅Ke tla o nyehella ka ditjheso,

ka ditjheso tsa phoofolo tse nonneng,

le ka setjheso sa dipheleu,

setjheso se monko o monate,

ke o hlabele dipohwana le diphooko.

₁₆Tloong, le mamele,

lona bohle ba tshabang Modimo,

ke le phetele

seo a nketseditseng sona.

₁₇Ke ipileditse ho yena

ka molomo wa ka,

ka mo phafa ka leleme la ka.

₁₈Hoja ke ne ke dumella bobe

pelong ya ka,

Morena a ka be a sa nkutlwa,

₁₉empa Modimo o nkutlwile,

o mametse sello sa thapelo ya ka.

₂₀Ho bokwe Modimo,

ya sa kang a lahla thapelo ya ka,

ya sa kang a ntima mohau wa hae.

₂Modimo ako re hauhele,

o re hlohonolofatse,

o re bontshe sefahleho,

fahleho se kganyang kgotso.

₃Ditsela tsa hao

di ke di tsejwe lefatsheng,

ditjhaba tsohle di tsebe

hore o a pholosa.

₄Ditjhaba di ke di o boke,

wena Modimo,

ditjhaba tsohle di o boke.

₅Merabe e ke e thabe, e etse ditlatse,

hobane o ahlola ditjhaba ka toka;

ke wena motsamaisi

wa merabe lefatsheng.

₆Ditjhaba di ke di o boke,

wena Modimo,

ditjhaba tsohle di o boke.

₇Lefatshe le bile le tjhai e kgolo,

Modimo, Modimo wa rona,

o re hlohonolofaditse!

₈Modimo o re hlohonolofaditse,

a tshajwe ke bohle lefatsheng,

ho isa dipheletsong tsa lona.

₂Modimo a ke a tsohe,

dira tsa hae di qhalane,

ba mo hloileng ba mmalehe.

₃Ba nyamele

jwalokaha mosi o nyamela,

jwalokaha tshotso

e qhibidihiswa ke mollo,

ba kgopo ba timela jwalo,

ba timela jwalo mahlong a Modimo.

₄Empa ba lokileng ba a thaba,

ba nyakallela Modimo,

ba tlale thabo.

₅Binelang Modimo,

rokang lebitso la hae,

lokisang tsela ya ya kaletseng maru.

Lebitso la hae ke Morena,

nyakallang mahlong a hae.

₆Modimo ke ntata dikgutsana,

ke mosireletsi wa bahlolohadi,

o leahong la hae le halalelang.

₇Ba se nang moneketsela,

Modimo o ba fa bodulo,

o boela o busetsa

batshwaruwa boiketlong,

athe bahanyetsi

ba sala mahalaopeng.

₈Modimo, mohla o neng o haola

hara lehwatata,

o eteletse tjhaba sa hao pele,

₉lefatshe la na la reketla,

mahodimo a nesa pula

mahlong a Modimo,

Modimo wa Sinai,

Modimo wa Iseraele.

₁₀Modimo, wa nesa pula,

pula ya ditlwebelele;

wa e nesetsa bao e leng lefa la hao,

wa ba matlafatsa

ha ba ne ba kgathetse,

₁₁mohlape wa hao

wa fumana bodulo teng,

boo ka mohau wa hao

o bo lokisitseng,

wa bo lokisetsa bahlophehi.

₁₂Morena a ntsha taelo,

letshwele la basadi

la tlisa molaetsa o reng:

₁₃“Dikgosi le mabotho a tsona

di balehile, di balehetse ruri!”

Basadi ba setseng hae

ba arola tse hapilweng.

₁₄Ha lona le ne le paqame,

le paqame marakong a masaka,

bona ba ne ba ka maebana

a apesitswe ka silefera,

ao masiba a wona a phatsimang,

a phatsimang sa kgauta e tshehla,

₁₅ha Ya Matla wohle

a ne a qhalanya dikgosi,

lehlwa la kgetheha

thabeng ya Salemone.

₁₆Thaba ya Bashane

ke thaba e telele,

thaba ya Bashane

ke thaba e makgeka.

₁₇Lona dithaba tse makgeka,

keng ha le honohela thaba,

thaba eo Modimo

a kgahlilweng ke yona,

ho e etsa leaho la hae,

moo Morena a tla aha teng,

a ahe teng ka ho sa feleng?

₁₈Kariki tsa Modimo tsa ntwa

ke kete tsa dikete,

ka tsona Morena

o tlile Sehalalelong,

o tlile Sehalalelong sa hae

a etswa Sinai.

₁₉O nyolohetse hodimo

a nkile bathopuwa,

a nyehellwa ka batho,

esita le ka bahanyetsi.

Morena Modimo a ba le leaho.

₂₀Ho bokwe Morena

ka matsatsi wohle,

yena ya re pepang,

yena Modimo, mopholosi wa rona.

₂₁Modimo wa rona

ke Modimo ya pholosang;

Morena ke Morena wa rona,

Morena ya re phemisang lefu.

₂₂Modimo o tla pshatla dihlooho,

a pshatle hlooho tsa dira tsa hae,

mahata a dihlotho a ba kgopo.

₂₃Morena o itse:

“Ke tla ba lata Bashane,

ke ba late le botebong ba lewatle,

₂₄leoto la hao

le tla hata mading a bona,

dintja tsa hao

di itjelle nama tsa dira.”

₂₅Bohle ba bona

mekoloko ya hao, Modimo,

mekoloko ya Modimo wa ka,

kgosi ya ka,

mekoloko e kenang Sehalalelong.

₂₆Kapele ke dibini,

kamorao ke baletsi,

hare ke thwetsana

e tidinyang meropa.

₂₇Bokang Modimo diphuthehong,

bokang Morena

dibokeng tsa Iseraele.

₂₈Benjamine, kgorula,

o ba eteletse pele,

o latetswe ke hlopha sa mahosana,

mahosana a Juda,

le mahosana a Sebulone,

le mahosana a Nafthali.

₂₉Oho, Modimo, bontsha matla a hao,

ao o re sebeleditseng ka wona.

₃₀Ka baka la Tempele ya hao,

Tempele e Jerusalema,

dikgosi di tla o nyehella ka dimpho.

₃₁Kgalema sebatana se moferong,

batho ba kang mohlape wa dipoho,

le manamane a wona,

ba ke ba ineele, ba o tlisetse silefera;

qhalanya ditjhaba tse ratang ntwa.

₃₂Mahosana a tla tswa Egepeta,

Kushe e phahamise matsoho,

e a phahamisetse ho Modimo.

₃₃Binelang Modimo,

lona mebuso ya lefatshe,

le roke Morena.

₃₄Ke yena ya kaletseng mahodimo,

mahodimo a kgalekgale;

o utlwahatsa lentswe la hae,

lentswe la hae le matla.

₃₅Thoholetsang matla a Modimo;

ke yena ya renang hodima Iseraele,

matla a hae a marung.

₃₆Modimo o a tshabeha

Sehalalelong sa hae.

Ke Modimo wa Iseraele,

ya matlafatsang

setjhaba sa hae haholo.

Ho bokwe Modimo!

₂Ako mpholose Modimo,

hobane metsi a a nkgama.

₃Ke qahilwe tebetebeng ya seretse,

ha ho moo nka hatang teng,

ka hata ka tsitsa.

Ke fihlile kweetseng,

maqhubu a nkwahetse.

₄Ke kgathetse ke ho meketsa,

ke se ke tjhele lentswe;

mahlo a ka a se a fifetse

ke ho nna ke lebella Modimo.

₅Ba ntlhoileng ntle ho lebaka

ba bangata,

ba feta qoba tsa moriri wa ka;

dira tsa mahelehele

di mpheta ka matla,

di ntsekisa seo ke sa se utswang.

₆Wena Modimo,

o tseba bothoto ba ka,

diphoso tsa ka

ha di a pateha ho wena.

₇Ba o tshepileng

ba se hlajwe ke dihlong,

ka baka la ka,

Morena, Morena wa mabotho;

ba o batlang

ba se ke ba ferekana,

ka baka la ka,

Modimo wa Iseraele.

₈Ke ka baka la hao

ke jereng sekgobo,

fahleho sa ka

se aparetsweng ke dihlong.

₉Ke fetohile moditjhaba

ho bana beso,

ke se ke le ya sa tsejweng ke baeso.

₁₀Ho tjhesehella ntlo ya hao ho ntjele,

dinyefolo tsa ba o nyefolang

le nna di nkwetse hodimo.

₁₁Ha ke itlhokofatsa ka ho itima dijo,

hona e ba hoo ke ho nyefolelwang.

₁₂Ha ke apara tse mahwashe,

eba ke fetoha pale ho bona.

₁₃Ba dulang kgorong tsa motse

ba bua ka nna,

matahwa a qapile dipina ka nna.

₁₄Ke lebisa thapelo ya ka

ho wena Morena,

ka nako e o kgahlang, Modimo.

Ako nkarabe

ka mohau wa hao o moholo,

le ka botshepehi ba hao

bo pholosang.

₁₅Nqaholle tebetebeng ya seretse,

o nnamolele ho ba ntlhoileng,

ke phonyohe kweetseng.

₁₆Ke se ke ka nkwa

ke morallo wa metsi,

ka metswa ke bodiba,

ka kometswa ke lebitla.

₁₇Nkarabe, Morena,

hobane mohau wa hao o moholo,

o ntadime ho ya ka boholo,

boholo ba lerato la hao.

₁₈O se ke wa pata sefahleho sa hao,

wa se patela mohlanka wa hao,

o nkarabe kapele,

hobane ke matshwenyehong.

₁₉Atamela ho nna, o mpholose,

o ntopolle ka baka la dira tsa ka.

₂₀Wena o tseba sekgobo sa ka,

le dihlong tsa ka,

le ho tlontlollwa ha ka;

ba ntwantshang o ba tseba kaofela.

₂₁Sekgobo se hlabile pelo ya ka,

ke fedile;

ke ne ke lebeletse kutlwelobohloko,

empa ha ke a ka ka e fumana;

ka batla batshedisi,

ka se ke ka ba fumana.

₂₂Bakeng sa dijo ba nneile leshokgwa,

ha ke nyorilwe ba nnea asene.

₂₃Eka dijo tsa bona

di ka ba fetohela leraba,

mekete ya bona ya mahlabelo

ya ba fetohela letlowa.

₂₄Eka mahlo a bona a ka fifala,

ba se ke ba bona,

matheka a bona

a nonyoloha hoyahoile.

₂₅Theolela kgalefo ya hao

hodima bona,

mollo wa bohale ba hao

o ba fumane.

₂₆Leaho la bona le ke le fetohe lesupi,

ho se be motho

metlotlwaneng ya bona.

₂₇Ba hlorisa eo o seng o mo shapile,

ba eketsa bohloko

ba eo o mo otlileng.

₂₈Ba ekeletse bobe

hodima bobe ba bona,

ba se ke ba fumanwa ke wena

ba lokile;

₂₉ba hlakolwe bukeng ya bophelo,

ba se ke ba ngolwa le ba lokileng.

₃₀Ha e le nna ke hlophehile,

ke a opelwa;

oho, Modimo, mpholose,

ke boele ke tsohe.

₃₁Ke tla rorisa lebitso la Modimo

ka sefela,

ke le phafe ka teboho.

₃₂Hona ho tla kgahlisa Morena

ho feta hlabelo sa dipohwana,

sa pohwana tse dinaka,

pohwana tse dikgolana.

₃₃Ba eisehang ba tla bona, ba thabe;

lona, ba batlang Modimo,

betang dipelo.

₃₄Morena o utlwa mafutsana,

ha a kgese batho ba hae

ba ditlamong.

₃₅Mahodimo le lefatshe

di ke di mo rorise,

le mawatle

le tsohle tse sesang ho wona;

₃₆hobane Modimo o tla pholosa Sione,

a tsose metse ya Juda:

hore batho ba tle ba ahe ho yona,

e be lefa la bona.