Bible Reading Plan – Day 109

₃Oho, Modimo, ako nkgauhele

ka mohau wa hao,

ho ya ka boholo ba lerato la hao

ako hlakole melato ya ka.

₄Ntlhatswisise bokgopo ba ka,

o ntlhwekise sebe sa ka;

₅hobane ke tseba melato ya ka,

ke hopola sebe sa ka kamehla.

₆Ke sitetswe wena, wena o inotshi,

ke entse bobe mahlong a hao.

Ho loka ha hao

ho tla bonahala ha o ahlola,

le ho hloka kodi ha hao

ha o diha nyewe.

₇Ruri ke bile ya sa lokang

ho tloha tswalong ya ka,

ke bile moetsadibe

ho tloha popelong ya mme.

₈Athe wena o thabela botshepehi,

botshepehi moyeng wa motho,

o nthuta bohlale

botebong ba pelo ya ka.

₉Fedisa sebe sa ka, ke tle ke hlweke;

o ntlhatswe, ke tle ke be mosweu,

ke be mosweu ho feta lehlwa.

₁₀Etsa hore ke utlwe mehoo ya thabo,

ke utlwe le mehoo ya nyakallo,

ditho tsa ka di tle di hlasimolohe,

ditho tseo o di robileng.

₁₁Nteballe dibe tsa ka,

o hlakole melato ya ka kaofela.

₁₂Oho, Modimo, ako bope ka ho nna,

o bope pelo e hlwekileng,

o kenye moya o motjha, o tiileng,

o o kenye ka sefubeng sa ka.

₁₃O se ke wa ntelekela hole le wena,

wa nkamoha Moya wa hao,

Moya o Halalelang.

₁₄Ako mpuseletse nyakallo,

nyakallo ya ho pholoswa ke wena,

o mmatlafatse ka moya wa boitelo.

₁₅Ba etsang diphoso ke tla ba ruta,

ke ba rute ditsela tsa hao,

mme baetsadibe

ba tla kgutlela ho wena.

₁₆Modimo, Modimo ya mpholosang,

ako ntopolle kahlolong ya lefu,

leme la ka le tumise

ho loka ha hao.

₁₇Oho, Morena,

ako rarolle leleme la ka,

molomo wa ka

o phatlalatse thoriso ya hao.

₁₈Ha o kgahlwe ke mahlabelo;

leha nka o nyehella ka setjheso,

o ke ke wa se amohela.

₁₉Sehlabelo se ratwang ke Modimo:

ke moya o swabileng;

ke pelo e swabileng, e hlomohileng;

oho, Modimo, o ke ke wa e kgesa.

₂₀Haeba o ka kgahlwa,

ako etsetse Sione molemo,

o tsose marako a Jerusalema.

₂₁Ke moo o tla kgahliswa

ke mahlabelo a lokelang,

ditjheso le dinyehelo tse tjheswang;

mme ho tla nyehelwa ka dipohwana,

ho nyehelwe ka tsona aletareng ya hao.

₃O ithorisetsang ka bobe,

wena ya sehloho?

Tseba, mohau wa Modimo

ke wa kamehla yohle.

₄O ntse o rera ho timetsa ba bang,

leleme la hao le ka lehare le bohale,

wena ya etsang bolotsana.

₅O rata bobe ho ena le botle,

le leshano ho ena le nnete.

₆O rata dipuo tse timetsang,

wena ya leleme le thetsang!

₇Modimo o tla o ripitlela ruri,

a o hlwibile,

a o hotolele ntle ho tente ya hao,

a o fedise

lefatsheng la ba phelang.

₈Ba lokileng ba tla bona tsena,

mme ba tshabe;

ba tla mo tsheha, ba re:

₉“Bonang motho

ya sa etsang Modimo tshabelo sa hae,

ya itshepetseng bongata

ba maruo a hae,

ya entseng bokgopo

setshabelo sa hae.”

₁₀Empa nna, ka tlung ya Modimo,

ke jwaloka sefate sa mohlwaare,

fate se setalana;

ke tshepa mohau wa Modimo,

ke o tshepa kamehla le mehla.

₁₁Ke tla o boka kamehla

ka seo o se entseng,

ke tlotlise bitso la hao

ke le hara batshepuwa ba hao,

hobane wena o molemo.

₂Ka pelong sethoto se re:

“Ha ho na Modimo.”

Diketso tsa batho di bodile,

di a nyonyeha,

ha ho le ya mong ya etsang tse ntle.

₃Modimo, a le mahodimong,

o tadima bana ba batho,

ho bona hore

na ho teng ya utlwisisang,

ya batlang Modimo.

₄Bohle ba kgelohile,

ba senyehile kaofela;

ha ho ya etsang tse ntle,

ha ho le ya mong.

₅Na baa bohle ha ba na tsebo,

baa ba etsang tse sa lokang

baa ba itjellang setjhaba sa ka,

jwalokaha ba eja bohobe,

ba sa ipiletse ho Modimo?

₆Jwale ba tla tshoha haholo,

ba tshohe kantle ho lebaka,

hobane Modimo

o tla qhalanya masapo,

masapo a ba neng ba o thibeletse.

O tla ba hlabisa dihlong,

mohla Modimo a ba lahlang.

₇E se eka pholoho ya Iseraele

e ka tswa Sione!

Mohla Modimo a kgutlisang

setjhaba sa hae,

a se kgutlisa bothopuweng,

Jakobo o tla nyakalla,

Iseraele le yena a thabe.

₃Oho, Modimo, ako mpholose,

mpholose ka baka la lebitso la hao,

o nkahlolele ka matla a hao.

₄Oho, Modimo,

ako mamele thapelo ya ka,

o sekehele dipolelo tsa ka tsebe.

₅Baikakasi ba ntsohetse matla,

ba sehloho ba batla bophelo ba ka,

ha ba na taba le Modimo.

₆Empa nna Modimo o a nthusa,

Morena ke mmaballi e moholo,

ke mmaballi wa bophelo ba ka.

₇Ba ntaletseng

ba ke ba putswe ka bobe;

ba fedise

ka baka la botshepehi ba hao.

₈Ke tla ithaopela

ho o nyehella ka sehlabelo,

ke boke bitso la hao, Morena,

hobane le molemo.

₉O ntopolotse

matshwenyehong a ka kaofela;

ke tadima dira tsa ka ka tello.

₂Oho, Modimo, ako sekehe tsebe,

o sekehele thapelo ya ka tsebe,

o se ke wa furalla thapedi ya ka.

₃Ako mmamele, o be o nkarabe:

Ke tsielehile, ke sisa pelo,

ke a fehelwa,

₄ka baka la ho hlodiuwa

ke dira tsa ka,

le ka baka la ho hlapaolwa

ke ba kgopo.

Ba nneta ka bokgopo,

ba ntlhorisa ba halefile.

₅Pelo ya ka e uba habohloko,

matswalo a lefu a mpupeditse.

₆Ke kenwe ke letswalo,

ke a thothomela,

ke aparetswe ke tshabo.

₇Ke bile ka re:

“Ke mang ya tla mpha mapheo,

mapheo a kang a leeba,

ke tle ke fofe, ke yo phomola?”

₈E, nka be ke baleha, ke eya hole,

ke ilo iphelela lehwatateng.

₉Ke ne ke tla potlakela

ho ya fumana tshireletso

meyeng ya ditsokotsane le ya difefo.

₁₀Morena, lobokanya merero

ya ba kgopo,

o ferekanye maleme a bona,

hobane nna ke bona sehloho,

ke bona le diqabang motseng;

₁₁di solla hodima marako a motse,

di solla teng motsheare le bosiu,

bokgopo le bobe di kahara wona.

₁₂Hara wona ke timelo feela,

bomenemene le mano

di ke ke tsa sutha mabaleng a wona.

₁₃Hoja ke sera se ntlhapaolang,

ke ne ke tla mamella;

hoja ya ntlhoileng

ke yena ya ikgantshetsang nna,

ke ne ke tla ipatela yena.

₁₄Empa ke wena ya nkentseng jwalo,

wena o leng molekane wa Ka,

le thaka ka, le motswalle wa ka;

₁₅wena eo

re neng re buisana hamonate,

re le sehlopheng

se yang tlung ya Modimo.

₁₆Lefu le ke le ba kgaoletse,

ba ke ba theohele Nqalong ya Bafu,

ba theohele ba ntse ba phela,

hobane ba ahisane le bokgopo,

mme bo hara bona.

₁₇Empa nna

ke tla ipiletsa ho Modimo,

mme Morena o tla mpholosa.

₁₈Hoseng, motsheare le mantsiboya,

ke sisa pelo, ke a fehelwa,

mme o utlwa lentswe la ka.

₁₉O mpholositse ntweng,

a mpha kgotso,

leha ba mphutuhetseng

ba ne ba le bangata.

₂₀Modimo o tla utlwa, a ba kokobetse,

yena eo esaleng a ituletse

teroneng ya hae;

hobane ha ba sokolohe,

ha ba tshabe Modimo.

₂₁Molekane wa ka o futuhetse

metswalle ya hae,

o robile selekane sa hae.

₂₂Leleme la hae le ne le le monate,

empa bora bo ne bo le teng,

bo le teng ka pelong ya hae.

Mantswe a hae

a ne a thoba hamonate,

empa e ne e le disabole tse hlabang.

₂₃Rolela morwalo wa hao ho Morena,

mme o tla o jarisa;

a ke ke a tlohella ya lokileng

hore a sisinngwe le ka mohla.

₂₄Wena Modimo, o tla ba dihela,

o tla ba dihela mohohlong wa timelo,

batho bao ba ratang ho tsholla madi,

ba ratang le ho thetsa;

ba ke ke ba phela

leha e le halofo ya ditshiu tsa motho.

Empa nna ke tshepile wena.

₂Oho, Modimo, ako nkgauhele,

hobane batho ba a nkgatakela,

ba ntwantshang

ba mpatisitse kamehla,

₃Ba ntaletseng ba nkgatakela kamehla,

ba bangata ba ntwantshang.

₄Wena Ya Hodimodimo,

mohla ke tshohileng,

ke tla tshepa wena.

₅Ke rorisa Modimo,

hobane ke a mo tshepa,

ke tshepa Modimo,

nke ke ka tshaba letho;

motho yena a ka nketsang?

₆Ba sotha dipuo tsa ka kamehla,

merero yohle ya bona

e ntswalla bobe.

₇Ba a bokana, ba ipatele nna,

ba lalle metsamao ya ka,

ba ntse ba tsoma bophelo ba ka.

₈Na ba ka phonyoha

ka baka la bokgopo ba bona?

Oho, Modimo,

ako dihe baditjhaba,

o ba dihe ka kgalefo ya hao.

₉O tseba ho lelera ha ka,

o kgakeleditse meokgo ya ka,

o e kgakeleditse ka lefiswana;

na tsee ha di a ngolwa

bukeng ya hao?

₁₀Ha ke ipiletsa ho wena,

dira tsa ka di tla tjhetjha.

Ke a tseba

hore Modimo o na le nna.

₁₁Ke rorisa Modimo

hobane ke a mo tshepa,

ke rorisa Morena

hobane ke a mo tshepa.

₁₂Ke tshepile Modimo,

nke ke ka tshaba letho;

motho yena a ka nketsang?

₁₃Modimo, dikano tsa ka ho wena

di ntlamile;

ke tla o nyehella

ka mahlabelo a teboho,

₁₄hobane o mpholositse lefung,

o phemisitse maoto a ka,

wa a phemisa ho kgopjwa,

ke tle ke tsamaye

pontsheng ya Modimo,

seding la ba phelang.

₂Nkgauhele, oho, Modimo nkgauhele,

hobane ke tshabela ho wena.

Ke tshabela moriting

wa mapheo a hao,

ho fihlela koduwa e ba e feta.

₃Ke ipiletsa ho Modimo,

Ya Hodimodimo,

yena Modimo ya nketsetsang tsohle.

₄A le mahodimong, a ke a nthusetse;

a ferekanye ya nkgatakelang.

Modimo a ntshitse

ka mohau wa hae,

a mpontshe botshepehi ba hae.

₅Ke dutse hara ditau

tse harolang batho;

meno a tsona

a ka marumo le metsu,

maleme a tsona

a ka sabole tse bohale.

₆Modimo, bontsha hore

o okametse mahodimo,

tlotla ya hao

e phahamele lefatshe lohle.

₇Ba tjhehile maoto a ka ka leraba,

mme moya wa ka o siame;

ba ntjheketse lemena,

empa ke bona

ba wetseng ka ho lona.

₈Pelo ya ka e matlafetse, Modimo,

pelo ya ka e matlafetse;

ke tla bina, ke o roke.

₉Tsoha, moya wa ka;

tsohang, lona thomo le harepa;

ke tla tsoha mafube a eso hlahe.

₁₀Morena, ke tla o boka hara ditjhaba,

ke o roke hara merabe;

₁₁hobane mohau wa hao o moholo,

o fihla mahodimong,

le botshepehi ba hao

bo fihla marung.