Bible Reading Plan – Day 108

₂Pelong ya ka

ho tletse taba tse monate,

ke bolela

tseo ke di qapetseng kgosi,

leme la ka le ka lesiba la sengodi,

siba la sengodi se mahlahahlaha.

₃O motle

ho feta bana bohle ba batho,

molomo wa hao o a kgahleha,

hobane Modimo

o o hlohonolofatsa kamehla.

₄Wena mohale,

tlamella sabole ya hao qholong;

ka hlompho le ka botlotlehi ba hao,

₅palama, o hlole, o lwanele nnete,

le boikokobetso, le ho loka.

Tsoho la hao le letona

le o etsetse diketso tse makatsang.

₆Metsu ya hao e leotsehile,

ditjhaba di tla wela tlasa puso ya hao,

dira tsa kgosi di tla nyahama pelo.

₇Terone ya hao, Modimo,

ke ya kamehla le mehla,

lere la hao la puso

ke lere la toko.

₈O rata ho loka, o hloile bokgopo.

Kahoo Modimo, Modimo wa hao,

o o tlotsitse ka ole ya thabo,

ho ena le balekane ba hao;

₉aparo tsa hao tsohle

di nonoditswe ka mmira,

le ka lekgala, le ka sente.

Matlung a kgabisitsweng

ka manaka a tlou

ho utlwahala harepa tse o thabisang.

₁₀Kgosatsana di teng

hara mafumahatsana,

mafumahatsana a hao a lomphehang;

mofumahadi o eme

tsohong la hao le letona,

o eme a kgabile ka kgauta ya Ofire.

₁₁Mamela, morwetsana;

bona, o sekehe tsebe;

tela tjhaba sa heno le lapa leno,

₁₂hore kgosi e tle e tjhatjhehele botle,

e tjhatjhehele botle ba hao haholo.

Kahobane ke yona monga hao,

o itihe maotong a yona.

₁₃Ba motse wa Tire

ba tla o nyehella ka dimpho,

barui ba baditjhaba

ba tla batla thuso ya hao.

₁₄Kgosatsana e kena e le Seilatsatsi,

aparo tsa yona di homilwe ka kgauta;

₁₅e iswa ho kgosi

e apere tse mahadihadi.

Baetsana ba barwetsana

ba tliswa ho kgosi.

₁₆Ba tliswa ka thabo le nyakallo,

ba kena ka tlung ya kgosi.

₁₇Tulong tsa bo-ntatao

ho tla dula bara ba hao,

o tla ba bea mahosana naheng yohle.

₁₈Ke tla etsa hore bitso la hao

le hopolwe ke meloko yohle;

ka baka leo, tjhaba di tla o boka,

di o boke kamehla le mehla.

₂Modimo ke setshabelo sa rona

le matla a rona;

ke thuso e teng kamehla,

thuso matshwenyehong.

₃Ka baka leo, re ke ke ra tshaba,

leha lefatshe le ka reketla,

le dithaba tsa sisinyeha

botebong ba lewatle;

₄leha metsi a lona a ka befa,

a tlokoma mafilo,

dithaba tsa reketliswa

ke ho tuduana ha wona.

₅Noka e teng eo makala a yona

a thabisang motse wa Modimo,

leaho le halalelang

la Ya Hodimodimo.

₆Modimo o bohareng ba motse oo,

o ke ke wa sisinyeha;

Modimo o tla o thusa

ha mafube a hlaha.

₇Ditjhaba di a befa,

mebuso e a sisinyeha;

ha a kgaruma,

lefatshe le a qhibidiha.

₈Morena wa mabotho o na le rona,

Modimo wa Jakobo

ke qhobosheane ya rona.

₉Tloong,

le bohe mesebetsi ya Morena,

kamoo a ripitlileng lefatshe kateng.

₁₀O fedisa dintwa

ho isa pheletsong tsa lefatshe;

o robakanya diqha, a pome marumo,

a tjhese dithebe mollong, a re:

₁₁“Kgaotsang, le tsebe

hore nna ke Modimo,

ke tla okamela ditjhaba,

ke okamele lefatshe.”

₁₂Morena wa mabotho o na le rona,

Modimo wa Jakobo

ke qhobosheane ya rona.

₂Lona ditjhaba tsohle, opang mahofi;

faphang Modimo ka mehoo ya thabo.

₃Morena ya hodimodimo o a tshabeha;

ke yena kgosi e kgolo,

kgosi ya lefatshe lohle.

₄O bea ditjhaba tlasa puso ya rona,

merabe katlasa maoto a rona.

₅O re kgethela lefa la rona,

bokgabane ba Jakobo

eo a mo ratileng.

₆Modimo o nyolohile

ka mehoo ya thabo,

Morena o nyolohile ka modumo,

ka modumo wa terompeta.

₇Rokang Modimo, mo rokeng;

rokang kgosi ya rona, e rokeng.

₈Modimo ke kgosi ya lefatshe lohle,

mo rokeng ka bokgeleke.

₉Modimo o rena hodima ditjhaba,

Modimo o dutse teroneng,

teroneng ya hae e halalelang.

₁₀Mahosana a ditjhaba

a bokane hammoho,

hore e be setjhaba

sa Modimo wa Aborahama;

hobane babusi ba lefatshe

ke ba Modimo,

mme yena

o kahodimodimo ho bohle.

₂Morena o moholo,

o lokelwa ke thoriso e kgolo

motseng wa Modimo wa rona,

thabeng ya hae e a halalelang.

₃Thaba ya Sione e a kgahleha,

e kgahleha ka bophahamo ba yona,

e thabisa lefatshe lohle;

e ka leboya

ho motse wa Kgosi e kgolo.

₄Modimo o teng matlung a bokgosi,

matlung a bokgosi a motse oo,

yena o tsejwa e le qhobosheane.

₅Bonang, dikgosi di ile tsa kopana,

tsa o futuhela di le mmoho.

₆Tsa o bona, mme tsa hlollwa;

tsa ferekana, mme tsa baleha.

₇Tsa tshwarwa ke thothomelo,

ya di tshwara hona moo,

le bohloko bo kang ba pelehi;

₈jwalokaha moya wa botjhabela

o pshatlakanya dikepe,

kepe tsa Tarashishe.

₉Seo re se utlwileng re bile re se bone

motseng wa Morena wa mabotho,

motseng wa Modimo wa rona,

oo Modimo a o tiisitseng

ka ho sa feleng.

₁₀Modimo, re hopola mohau wa hao

re le ka Tempeleng ya hao.

₁₁Jwaloka lebitso la hao Modimo,

thoriso ya hao e fihla jwalo,

e fihla jwalo pheletsong tsa lefatshe.

Tsoho la hao le letona le tletse toka.

₁₂Thaba ya Sione e ke e thabe;

metse ya Juda e ke e nyakalle

ka baka la kahlolo tsa hao.

₁₃Potapotang Sione, le e potolohe,

balang ditora tsa yona;

₁₄elang hloko lerako la yona,

rako la yona la tshireletso,

hlahlobang matlo a yona a bokgosi,

le tle le phetele moloko o tlang,

le re:

₁₅“Enwa ke Modimo,

ke Modimo wa rona

kamehla le mehla,

o tla re tsamaisa.”

₂Mamelang, lona ditjhaba tsohle;

sekehang tsebe,

lona baahi bohle ba lefatshe,

₃lona bafo le lona marena,

lona barui le mafutsana hammoho.

₄Molomo wa ka o tla bua tsa bohlale,

pelong ya ka ke tla nahana

tse nang le kelello.

₅Ke tla sekehela maele tsebe,

ke tla hlalosa selotho sa ka

ke ntse ke letsa harepa.

₆Nka tshoha eng nakong tse mpe,

ha ke teetswe hare ke dira tse kgopo,

₇e leng batho

ba tshepileng matlotlo a bona,

ba ithorisang

ka maruo a bona a mangata?

₈Ha ho motho

ya ka lopollang ngwanabo,

leha e le ho mo lefella ho Modimo.

₉Tefello ya bophelo ba motho

e feta matla a hae,

a ke ke a e lekana le ka mohla!

₁₀Motho a ke ke a phela hoyahoile,

a se ke a tseba lebitla.

₁₁O tla fela a bone

hore le ba bohlale ba a shwa,

sethoto le lewatla

ba timela ka ho tshwana,

ba siele ba bang matlotlo a bona.

₁₂Mabitla a bona

ke matlo a bona a mehla yohle,

ke leaho la bona

ho isa melokong yohle,

le hoja dinaha di reeletswe ka bona.

₁₃Motho ya phelelang leruo

o hloka kelello,

o tshwana le diphoofolo tse shwang.

₁₄Ena ke yona tsela ya ba itshepileng,

ke pheletso ya ba kgotsofetseng,

ba kgotsofaletseng matlotlo a bona.

₁₅Ba kgannelwa Nqalong ya Bafu

jwaloka dinku;

lefu e tla ba modisa wa bona.

Ba tla theohela lebitleng,

sebopeho sa bona se tla senyeha;

Nqalo ya Bafu e tla ba leaho la bona.

₁₆Empa Modimo o tla ntopolla,

a nntshe diatleng tsa lefu.

₁₇O se ke wa tshoha

leha motho a ka rua,

mme matlotlo a ntlo ya hae

a eketseha;

₁₈hobane mohla a shwang

a ke ke a nka letho,

matlotlo a hae

a ke ke a mo sala morao.

₁₉Le hoja ha a sa phela,

a ne a ikuka a le lehlohonolo,

kapa a ne a rorisetswa

katleho ya hae,

₂₀o tla be a yo fihla

molokong wa bo-ntatae,

ba ke keng ba hlola ba bona lesedi.

₂₁Motho ya phelelang leruo

o hloka kelello,

o tshwana le diphoofolo tse shwang.

Modimo ya matla wohle, Morena,

o buile, o bitsa lefatshe lohle

ho tloha botjhabela

ho isa bophirimela.

₂Modimo o kganya a le Sione,

motseng o motlemotle.

₃Modimo wa rona o a tla,

a ke ke a hlola a kgutsa.

Kepele ho yena ke mollo,

mollo o tjhesang lore!

Sefefo se matla se mo teetse hare.

₄O bitsa mahodimo le lefatshe

ho tla kahlolong ya setjhaba sa hae.

₅O re: “Bokellang batshepuwa ba ka,

le ba bokelle kapele ho nna,

e leng ba entseng selekane le nna

ba se entseng ka mahlabelo.”

₆Mahodimo a bolela ho loka ha hae,

kaha Modimo ke yena moahlodi.

₇“Mamelang, lona setjhaba sa ka,

mme ke tla bua;

wena Iseraele, ke tla o qosa.

Ke nna Modimo, Modimo wa hao.

₈Ha ke o nyatsetse mahlabelo a hao,

hobane ha o kgaotse

ho nnyehella ka ditjheso.

₉Nke ke ka amohela poho

ya saka la hao,

leha e le phooko

ya mohlape wa hao;

₁₀hobane dibatana tsohle tsa meru

ke tsa ka,

le tsona diphoofolo

tse diketekete dithabeng.

₁₁Ke tseba dinonyana tsohle

tse sepakapakeng,

le dinyamatsane tsohle tsa naha

ke tsa ka.

₁₂Hoja ke ne ke lapile,

ke ne ke sa tlo o bolella,

hobane lefatshe ke la ka,

le tsohle tse ho lona.

₁₃Na ke ja nama ya dipoho?

Kapa ke nwa madi a diphooko?

₁₄Nyehella Modimo

ka sehlabelo sa teboho,

phetha dikano tsa hao

ho Ya Hodimodimo.

₁₅Ipiletse ho nna

ka nako ya matshwenyeho;

ke tla o lopolla,

mme wena o tla ntlotlisa.”

₁₆Empa ho ya kgopo Modimo o re:

“O na le tokelo efe

ya ho bolela melao ya ka,

kapa ho boledisa selekane sa ka,

o se boledisa ka molomo wa hao,

₁₇athe o hloile ho kgalemelwa,

o lahlile mantswe a ka ho hang?

₁₈Ha o bona leshodu,

o so kgema le lona;

o motswalle wa difebe.

₁₉O dumella molomo wa hao

ho bua tse mpe,

leleme la hao le loha mano.

₂₀O duletse ho bua ngwaneno hampe;

o silafatsa ngwana mmao.

₂₁Tsena o di entse;

jwale o re nka kgutsa?

O hopola hore ke tshwana le wena?

Ke tla o kgalemela,

ke totobatse tsohle mahlong a hao.

₂₂“Lona ba lebalang Modimo,

le ke le lemohe tsena,

esere ka le harola,

mme la hloka ya le namolelang.

₂₃Ya nnyehellang

ka sehlabelo sa teboho

ka sona o a ntlotlisa,

ya tsamayang ka ho loka

ke tla mmontsha

kamoo Modimo a pholosang kateng.”