UISAYA 9

₂Abantu abahamba ebumnyameni

babona ukukhanya okukhulu;

abahlezi ezweni lethunzi lokufa

ukukhanya kuyabakhanyisela.

₃Uyakwandisa isizwe, ukhulise intokozo yaso;

bathokoza phambi kwakho

njengokuthokoza ekuvuneni,

njengalokhu abantu bethokoza ekwabeleni kwabo impango.

₄Ngokuba ijoka lomthwalo wabo,

nenduku yamahlombe abo,

noswazi lomhluphi wabo

uyakwaphula njengasosukwini lukaMidiyani.

₅Ngokuba zonke izicathulo ezifakiweyo esiyaluyalwini sokulwa

nezingubo ezigingqwé egazini

ziyakuba-ngezokushiswa,

zidliwe ngumlilo.

₆Ngokuba sizalelwa umntwana, siphiwa indodana;

umbuso uyakuba-semahlombe akhe,

negama lakhe liyakuthiwa

uMluleki omangalisayo, uNkulunkulu onamandla,

uYise ongunaphakade, iNkosi yokuthula.

₇Umbuso uyakuba-mkhulu,

ukuthula kungabi-nakuphela

esihlalweni sobukhosi sikaDavide nasembusweni wakhe,

ukuze uqiniswe, usekelwe

ngokwahlulela nangokulunga,

kusukela manje kuze kube-phakade.

Ukushisekela kukaJehova-Sebawoti kuyakwenza lokhu.

₈INkosi ithumé izwi kuJakobe,

lehlela kwaIsrayeli.

₉Bonke abantu bayakwazi,

uEfrayimi nabakhé eSamariya,

abasho ekuziphakamiseni kwabo

nasekuziphenyeni kwenhliziyo ukuthi:

₁₀Izitini ziwile,

kepha siyakwakha ngamatshe abaziweyo;

imithombe igawuliwe,

kepha siyakutshala imisedari* ezikhundleni zayo.

₁₁UJehova uyabaphakamisela izitha zikaResini,

ahlomise abamelene nabo,

₁₂iAramu ngaphambili namaFilisti ngasemuva,

bamudle uIsrayeli ngomlomo okhamisiweyo;

kukho konke lokhu intukuthelo yakhe ayibuyi,

isandla sakhe siseluliwe.

₁₃Abantu ababuyelanga nokho kobashayileyo,

futhi abamfunanga uJehova-Sebawoti.

₁₄Ngalokho uJehova uyanquma kwaIsrayeli

ikhanda nomsila, igatsha lesundu nomhlanga,

ngalusuku lunye.

₁₅Ilunga nophakemeyo bayikhanda,

nomprofethi ofundisa amanga ungumsila.

₁₆Ngokuba abahola lababantu bayabadukisa,

nabaholwa yibo bayagwinywa.

₁₇Ngalokho iNkosi ayithokozi ngezinsizwa zabo,

ayihawukeli izintandane nabafelokazi babo,

ngokuba bonke bangabangenaNkulunkulu nabenza okubi,

nayo yonke imilomo ikhuluma ubuwula;

kukho konke lokhu intukuthelo yakhe ayibuyi,

isandla sakhe siseluliwe.

₁₈Ngokuba ububi bushisa njengomlilo,

buqeda amakhakhasi nameva,

buthungela ezihlahleni zamahlathi,

zize zifuquke insika yomusi.

₁₉Ngentukuthelo kaJehova-Sebawoti

izwe lishisiwe;

abantu bangukudla komlilo,

akakho osindisa umfowabo.

₂₀Umuntu uyahlwitha ngakwesokunene, abe esalambile nokho,

adle ngakwesokhohlo, kepha angasuthi;

bayakudla, kube-yilowo nalowo inyama yengalo yakhe,

₂₁uManase uEfrayimi, noEfrayimi uManase,

bobabili basukele kanyekanye uJuda;

kukho konke lokhu intukuthelo yakhe ayibuyi,

isandla sakhe siseluliwe.