USAMUWELI I 10

₁USamuweli wayesethatha umfuma wamafutha, wawathela ekhanda lakhe, wamanga, wathi: Angithi uJehova ukugcobile ukuba ube-ngumholi wefa lakhe na?

₂Nxa usumukile kimi namuhla, uyakufumana abantu ababili ngasethuneni likaRaheli emkhawulweni wakwaBenjamini eSelisa; bayakuthi kuwe: Izimbongolo owawuyé ukuzifuna zitholiwe; bheka, uyihlo uyekile izimbongolo, uyenqena ngani, ethi: Ngiyakwenze-njani ngomntanami na?

₃Nxa usukile khona uyé phambili, uyakufika kulo ioki* laseThabori; kuyakuhlangana nawe khona abantu abathathu bekhuphukela kuNkulunkulu eBethele, omunye ephethe amazinyane amathathu ezimbuzi, omunye ephethe izinkwa ezintathu, omunye ephethe imvaba yewayini;

₄bayakukubingelela, bakunike izinkwa ezimbili oyakuzamukela ezandleni zabo.

₅Emva kwalokho uyakufika entabeni kaNkulunkulu, lapho likhona ikhanda lamaFilisti; kuyakuthi nxa usufikile khona emzini, uhlangane neviyo labaprofethi behla endaweni ephakemeyo benogubhu, nesigubhu, negenkle, nehabhu* phambi kwabo, beprofetha;

₆uMoya kaJehova uyakwehlela phezu kwakho, uyakuprofetha kanye nabo, uphenduke omunye umuntu.

₇Kuyakuthi lapho lezozibonakaliso sezifikile kuwe, wenze esikufumanayo isandla sakho, ngokuba uNkulunkulu unawe.

₈Uyakwehla phambi kwami ukuya eGiligali; bheka, ngiyakwehlela kuwe ukuba nginikele ngeminikelo yokushiswa, ngihlabe imihlatshelo yokuthula; uyakuhlala izinsuku eziyisikhombisa, ngize ngifike kuwe, ngikutshele oyakukwenza.

₉Kwathi esefulathela emuka kuSamuweli, uNkulunkulu waphendukisa inhliziyo yakhe yaba-ngenye; zonke lezozibonakaliso zafika ngalona lolosuku.

₁₀Lapho sebefiké khona entabeni, bheka, iviyo labaprofethi lahlangana naye; uMoya kaNkulunkulu wehlela phezu kwakhe, waprofetha phakathi kwabo.

₁₁Kwathi bonke ababemazi kuqala sebebona ukuthi waprofetha nabaprofethi, abantu bathi omunye komunye: Kuyini lokhu okwehlele indodana kaKishi na? Kanti naye uSawule uphakathi kwabaprofethi na?

₁₂Kwaphendula umuntu wakhona, wathi: Ngubani uyise na? Ngalokho kwaba-yisaga ukuthi: Naye uSawule uphakathi kwabaprofethi na?

₁₃Eseqedile ukuprofetha wafika endaweni ephakemeyo.

₁₄Uyisekazi kaSawule wathi kuye nasencekwini yakhe: Niké naya ngaphi na? Wathi: Besiyé kufuna izimbongolo; lapho sesibonile ukuthi azikho, sase siya kuSamuweli.

₁₅Uyisekazi kaSawule wathi: Ake ningitshele: Utheni kini uSamuweli na?

₁₆USawule wathi kuyisekazi: Usitshelé impela ukuthi izimbongolo zitholiwe. Kepha indaba yombuso akhuluma ngayo uSamuweli akamtshelanga yona.

₁₇USamuweli wabizela abantu kuJehova eMispa;

₁₈wathi kubantu bakwaIsrayeli: UJehova uNkulunkulu kaIsrayeli usho kanje, uthi: Ngenyusa uIsrayeli eGibithe, nganophula esandleni sabaseGibithe nasesandleni sayo yonke imibuso eyayinicindezelayo;

₁₉kepha namuhla nimlahlile uNkulunkulu wenu, yena owanisindisa ezingozini zenu zonke nasezinsizini zenu, nishilo nathi: Hayi, kepha beka inkosi phezu kwethu. Ngalokho yimani phambi kukaJehova ngezizwe zenu nangezinkulungwane zenu.

₂₀USamuweli wayesesondeza zonke izizwe zakwaIsrayeli, kwadliwa isizwe sakwaBenjamini.

₂₁Wayesesondeza isizwe sakwaBenjamini ngemindeni yabo, kwadliwa umndeni wakwaMatri; kwadliwa uSawule indodana kaKishi; kepha lapho bebemfuna, akafunyanwanga.

₂₂Babuye babuza uJehova ukuthi: Usezakufika lowomuntu na? UJehova waphendula wathi: Bheka, ucashile empahleni.

₂₃Bagijima, bamlanda khona; wema phakathi kwabantu, wayemude kunabo bonke abantu kusukela emahlombe kuya phezulu.

₂₄USamuweli wathi kubo bonke abantu: Mbhekeni amkhethileyo uJehova ukuthi akakho onjengaye kubantu bonke. Base bekhamuluka abantu bonke, bathi: Mayime njalo inkosi.

₂₅USamuweli wayesebatshela abantu amalungelo ombuso, wawaloba encwadini, wayibeka phambi kukaJehova. USamuweli wamukisa bonke abantu, yilowo nalowo waya ekhaya lakubo.

₂₆Naye uSawule waya ekhaya lakhe eGibeya; kwahamba naye impi ezinhliziyo zayo uNkulunkulu azithintile.

₂₇Kepha abantu ababi bathi: Uyakusisindisa kanjani lowo na? Bamdelela, abamnikanga isipho. Kepha wathula.