UMshumayeli 11

₁Phonsa isinkwa sakho emanzini,

ngokuba uzosithola emva kwezinsuku eziningi.

₂Yipha abayisikhombisa isabelo sakho,

kanjalo abayisishiyagalombili,

ngokuba awazi ukuthi bubi buni

obungahle behlele umhlaba.

₃Uma amafu emumethe imvula,

ayithululela emhlabeni;

nesihlahla uma siwela ngaseningizimu

noma ngasenyakatho,

sitholakala lapho siwele khona.

₄Onaka umoya akasoze atshala;

nalowo onaka amafu akasoze avuna.

₅Njengalokhu ungazi ukuthi umphefumulo

ungena kanjani emathanjeni

esibelethweni sowesifazane okhulelweyo,

kanjalo kawuwazi umsebenzi kaNkulunkulu

owenza izinto zonke.

₆Hlwanyela imbewu yakho ekuseni,

ungasiphumuzi isandla sakho kuze kuhlwe,

ngokuba kawazi ukuthi yiyiphi ezomila;

yilena noma yileya,

noma zombili zizoba zinhle ngokufanayo.

₇Ukukhanya kumnandi,

kuthokozisa amehlo ukubuka ilanga.

₈Noma umuntu angaphila iminyaka eminingi,

makathokoze ngayo yonke,

nokho makakhumbule

ukuthi izinsuku zobumnyama zizoba ziningi.

Konke okuzayo kuyize.

₉Jabula nsizwa ebusheni bakho,

inhliziyo yakho ayikujabulise

ezinsukwini zobusha bakho.

Landela izindlela zenhliziyo yakho,

nakho konke okubonwa ngamehlo akho,

kodwa khumbula

ukuthi uNkulunkulu uzokwehlulela

ngazo zonke lezo zinto.

₁₀Susa ukungeneliseki engqondweni yakho,

uxoshe ubuhlungu emzimbeni wakho,

ngokuba ubusha nokuqala kokuphila kuyize.