IZaga 16

₁Amasu enhliziyo angawomuntu,

kepha impendulo yolimi ivela kuSimakade.

₂Zonke izindlela zomuntu zimsulwa emehlweni akhe,

kodwa nguSimakade ohlolisisa izinhloso.

₃Gingqela imisebenzi yakho kuSimakade,

ukuze amasu akho aphumelele.

₄USimakade unenjongo ngakho konke akwenzayo,

yebo, nomubi umenzele usuku lokuhlupheka.

₅Bonke abanhliziyo ezikhukhumezayo

bayisinengiso kuSimakade;

impela akayukuyeka ukubajezisa.

₆Ngomusa neqiniso isiphambeko siyathethelelwa,

ngokwesaba uSimakade ububi buyadeda.

₇Lapho uSimakade ethokozile ngezindlela zomuntu,

wenza izitha zakhe

zihlalisane ngokuthula naye.

₈Okuncane okuhle kanye nokulunga,

kungcono kunenzuzo enkulu

etholakala ngokungalungi.

₉Inhliziyo yomuntu iceba indlela yakhe,

kodwa uSimakade uyaziqondisa izinyathelo.

₁₀Izimpendulo zikaNkulunkulu zisezindebeni zenkosi;

umlomo wayo awuyukuphambuka ekwehluleleni.

₁₁Ukulinganisa okulungileyo nesilinganiso esilungileyo, kungokukaSimakade;

zonke izisindo ezisesikhwameni zingumsebenzi wakhe.

₁₂Ukwenza inkohlakalo kuyisinengiso emakhosini,

kodwa isihlalo sobukhosi simiswa ngokulunga.

₁₃Izindebe ezilungileyo ziyintokozo yamakhosi;

ayabathanda abakhuluma iqiniso.

₁₄Intukuthelo yenkosi ifana nezithunywa zokufa,

kepha umuntu ohlakaniphileyo uyayidambisa.

₁₅Uma inkosi ithokozile kukhona ukuphila,

nesisa sayo sinjengefu lemvula yakamuva.

₁₆Kuhle kangakanani ukuzuza ukuhlakanipha kunegolide,

nokuzuza ukuqonda kunesiliva lekhethelo!

₁₇Umendo wabaqotho ungukudeda ebubini;

oqaphela indlela yakhe

ulondoloza umphefumulo wakhe.

₁₈Ukuzidla kwendulela ukuwa,

nomoya oziqhenyayo wandulela ukubhadazela.

₁₉Kungcono ukuba nomoya othobekileyo

phakathi kwabahluphekayo,

kunokuhlukaniselana impango nabazidlayo.

₂₀Oqaphela akukhulumayo ufumana okuhle,

ubusisiwe owethembela kuSimakade.

₂₁Onengqondo ehlakaniphileyo ubizwa ngokuthi unokuqonda,

nenkulumo emtoti yandisa imfundiso.

₂₂Ukuqonda kungumthombo wokuphila konakho,

kepha ubuwula buyisijeziso seziwula.

₂₃Inhliziyo yohlakaniphileyo

inikeza ukuqonda okujulile kokhulumayo,

yenezele imfundiso ezindebeni zakhe.

₂₄Amazwi amnene anjengamakhekheba oju;

amnandi emphefumulweni,

angukuphila emathanjeni.

₂₅Kukhona indlela ebonakala

sengathi ilungile kumuntu,

kepha ukuphela kwayo kuyindlela yokufa.

₂₆Iphango lesisebenzi liyasisebenzela,

ngokuba siqhutshwa yindlala.

₂₇Isidwanyampuphu siphanda okubi,

nokuphuma ezindebeni zaso

kunjengomlilo weshisandlu.

₂₈Umuntu owonakeleyo udala ingxabano,

nexoki lehlukanisa abangani.

₂₉Umuntu oyisidlova uyenga umakhelwane wakhe,

amholele endleleni embi.

₃₀Ovala amehlo uhlela okuphambeneyo,

noququda imihlathi ufeza okubi.

₃₁Ubumpunga bungumqhele wodumo;

bufunyaniswa endleleni yokulunga.

₃₂Owephuza ukuthukuthela ungcono kuneqhawe,

nobusa umoya wakhe, kunonqoba umuzi.

₃₃Unkatho lwenzelwa emathangeni,

kepha sonke isinqumo salo

sivela kuSimakade.