IZaga 15

₁Impendulo ezothile iyaludambisa ulaka,

kodwa izwi elilimazayo libhebhezela intukuthelo.

₂Ulimi lwabahlakaniphileyo lukhombisa ulwazi oluhle,

kodwa umlomo weziwula uphafuza ubuwula.

₃Amehlo kaSimakade asezindaweni zonke,

aqapha abahle nababi.

₄Ulimi oluphilisayo lungumuthi wokuphila,

kepha olobuqili luyawephula umoya.

₅Isiwula siyakwedelela ukuyala kukayise,

kepha onaka ukusolwa uhlakaniphile.

₆Indlu yolungileyo igcwele ingcebo eningi,

kepha enzuzweni yezikhohlakali

kukhona ukuhlupheka.

₇Izindebe zabahlakaniphileyo zisabalalisa ulwazi,

kepha akunjalo enhliziyweni yeziwula.

₈Umhlatshelo wezikhohlakali uyisinengiso kuSimakade,

kodwa umkhuleko wabaqotho

uyintokozo kuye.

₉Indlela yezikhohlakali iyisinengiso kuSimakade,

kepha uyamthanda olandela ukulunga.

₁₀Kunesijeziso esibuhlungu kulowo oshiya indlela;

lowo ozonda ukusolwa uyakufa.

₁₁Indawo yabafileyo nokubhubha kuphambi kukaSimakade;

kakhulu kangakanani izinhliziyo zabantwana babantu na?

₁₂Isedeleli asimfuni ozosisola,

asiyi kwabahlakaniphileyo.

₁₃Inhliziyo ethokozayo yenza ubuso buchachambe,

kodwa ngosizi olusenhliziyweni umoya uyephuka.

₁₄Inhliziyo ecubungulayo ifuna ulwazi,

kodwa umlomo weziwula udla ubuwula.

₁₅Zonke izinsuku zohluphekayo zimbi,

kepha onhliziyo yenamile

uhlala enedili elingapheli.

₁₆Okuncane nje kanye nokumesaba uSimakade,

kungcono kunengcebo eningi

ehambisana nokukhathazeka okuningi.

₁₇Isidlo esinengxenyana yemifino

lapho kukhona uthando khona,

singcono kunesenkabi ekhuluphalisiweyo

lapho kugcwele inzondo khona.

₁₈Umuntu ogcwele ulaka uphehla udweshu,

kodwa owephuzayo ukuthukuthela

udambisa ingxabano.

₁₉Indlela yevila injengothango lwameva,

kodwa umkhondo wabakhutheleyo

unjengomgwaqo ohlelembelekile.

₂₀Indodana ehlakaniphile iyamthokozisa uyise,

kodwa umuntu oyisiwula

uyamedelela unina.

₂₁Ubuwula buyintokozo kongenangqondo,

kepha umuntu onokuqonda

uyakuqondisa ukuhamba kwakhe.

₂₂Lapho kungekho khona ukwelulekana,

amasu ayabhuntsha,

kodwa uma bebaningi abeluleki ayaphumelela.

₂₃Umuntu uyathokoza ngempendulo yakhe,

nezwi elikhulunywa ngesikhathi esifaneleyo

lihle kakhulu.

₂₄Indlela yokuphila

imholela kweliphezulu ohlakaniphileyo,

ukuba angayi endaweni yabafileyo.

₂₅USimakade uyayisiphula indlu yabazidlayo,

kodwa uyayiqinisa indawo yomfelokazi.

₂₆Amacebo omubi ayisinengiso kuSimakade,

kepha amazwi amnene ayamenamisa.

₂₇Othola inzuzo ngokungafanele

uhlupha umndeni wakhe,

kepha ozonda ukufunjathiswa uyophila.

₂₈Inhliziyo yolungileyo iyacabanga ukuphendula,

kepha imilomo yezikhohlakali

iphafuza izinto ezimbi.

₂₉USimakade ukude nezikhohlakali,

kodwa uyayizwa imikhuleko yabalungileyo.

₃₀Ubuso obuchachambileyo buyayithokozisa inhliziyo,

nezindaba ezinhle ziletha impilo emathanjeni.

₃₁Indlebe elalela ukusolwa okuphilisayo

iyakuhlala nabahlakaniphileyo.

₃₂Owenqaba ukuyalwa uzedelela yena,

kepha olalela ukusolwa uzuza ulwazi.

₃₃Ukwesaba uSimakade kungumyalo wokuhlakanipha,

nokuthobeka kwendulela udumo.