IINDUMISO 99

₁UYehova nguKumkani, ziyagungqa izizwe;

Ulohlala ekerubhini,• liyashukuma ihlabathi.

₂UYehova mkhulu eZiyon;

Uphakamile ngaphezu kwezizwe zonke.

₃Baya kulibulela igama lakho elikhulu eloyikekayo;

Ngokuba úngcwele yena.

₄Amandla okumkani athanda okusesikweni;

Ùwazimasile wena ngokuthe tye;

Wenzé okusesikweni nobulungisa kwaYakobi wena.

₅Mphakamiseni uYehova, uThixo wethu,

Niqubude esitulweni seenyawo zakhe;

Ngokuba úngcwele yena.

₆OoMoses noAron phakathi kwababingeleli bakhe,

NoSamuweli phakathi kwabalinqulayo igama lakhe,

Baye bebiza kuYehova, wabaphendula yena.

₇Wathetha kubo esemqulwini welifu;

Bazigcina izingqino zakhe,

Nommiselo awabanika wona.

₈Yehova, Thixo wethu, wabaphendula wena,

Waba nguThixo oxolelayo kubo,

Ongoziphindezelayo iintlondi zabo.

₉Mphakamiseni uYehova, uThixo wethu,

Niqubude entabeni yakhe engcwele;

Ngokuba ungcwele uYehova uThixo wethu.