IINDUMISO 66

₁Dumani kuThixo, nonke hlabathi,

₂Lubetheleni uhadi uzuko lwegama lakhe,

Mzukiseni, mdumiseni.

₃Yithini kuThixo, Hayi, ukoyikeka kwemisebenzi yakho!

Ngenxa yobuninzi bamandla akho ziya kuhanahanisa kuwe iintshaba zakho.

₄Lonke ihlabathi liya kukunqula,

Bakubethele uhadi;

Balibethele uhadi igama lakho. (Phakamisani.)

₅Yizani, nibone imisebenzi emikhulu kaThixo,

Engowoyikekayo ekwenzeni kwakhe koonyana babantu.

₆Wáluguqula ulwandle lwayinto eyomileyo;

Bawuwela umlambo ngeenyawo;

Apho savuya ngaye.

₇Ulolawula ngobugorha bakhe ngonaphakade;

Amehlo akhe ayabonisela ezintlangeni;

Abaziinjubaqa mabangaziphakamisi. (Phakamisani.)

₈Mbongeni, zizwe, uThixo wethu,

Nivakalise ilizwi lendumiso yakhe.

₉Ulomisa umphefumlo wethu ebomini,

Àkalunikela unyawo lwethu ekutyibilikeni.

₁₀Ngokuba ùsicikidile, Thixo;

Ùsinyibilikisile njengokunyibilikiswa kwesilivere;

₁₁Ùsingenise emboniselweni;

Ùbeke uxinzelelo esinqeni sethu;

₁₂Ùkhwelise abantu entlokweni yethu;

Singéne emlilweni nasemanzini;

Waza wasikhuphela endaweni enendyebo.

₁₃Ndiya kungena endlwini yakho ndinamadini anyukayo;

Ndiya kuzizalisa kuwe izibhambathiso zam,

₁₄Eyazivulelayo imilebe yomlomo wam,

Owazithethayo umlomo wam ekubandezelweni kwam.

₁₅Ndiya kunyusela kuwe amadini anyukayo eemvana ezityebileyo,

Ndawonye nesiqhumiso seenkunzi zeegusha;

Ndiya kwenza aweenkomo ndawonye naweenkunzi zeebhokhwe. (Phakamisani.)

₁₆Yizani, nive, ndinixelele, nonke nina bamoyikayo uThixo,

Oko akwenzele umphefumlo wam.

₁₇Ndadanduluka kuye ngomlomo wam;

Kwaye ukubonga kuphantsi kolwimi lwam.

₁₈Ukuba bendisekeleze ubutshinga ngentliziyo yam,

INkosi yam ibingayi kuphulaphula.

₁₉Hayi ke, uThixo uphulaphule,

Úlibazéle indlebe ilizwi lomthandazo wam.

₂₀Makabongwe uThixo,

Yena ungawugxothanga umthandazo wam,

Nobubele bakhe kum.