Tlhahisoleseding e Nngwe

IINDUMISO 67

Kumongameli; eyokubethelwa ngezinto ezineentambo. Umhobe. Ingoma.

₁Ngamana uThixo wasibabala, wasisikelela,

Wabukhanyisa ubuso bakhe kuthi; (Phakamisani.)

₂Ukuze yaziwe ehlabathini indlela yakho,

Usindiso lwakho ezintlangeni zonke.

₃Ngamana zabulela izizwe kuwe, Thixo,

Zabulela izizwe kuwe zonke ziphela;

₄Zavuya zamemelela izizwe:

Ngokuba ùya kugweba phakathi kwezizwe ngokuthe tye,

Uzikhaphe izizwe ehlabathini. (Phakamisani.)

₅Ngamana zabulela izizwe kuwe, Thixo,

Zabulela izizwe kuwe zonke ziphela.

₆Umhlaba uyivelisile indyebo yawo;

Úya kusisikelela uThixo, uThixo wethu;

₇Úya kusisikelela uThixo,

Zimoyike zonke iziphelo zehlabathi.