IINDUMISO 28

₁Ndidanduluka kuwe, Yehova;

Liwa lam, musa ukuzenza isithulu;

Hleze, wakuthi cwaka kum,

Ndifane nabahla baye emhadini.

₂Yiva izwi lokukhunga kwam ekuzibikeni kwam kuwe,

Ekuziphakamiseleni kwam izandla zam kwingcwele kangcwele.

₃Musa ukundiqweqwedisa nabangendawo,

Nabenzi bobutshinga;

Abathetha uxolo kummelwane wabo,

Benobubi ezintliziyweni zabo.

₄Bánike ngokwemisebenzi yabo, ngokobubi beentlondi zabo;

Bánike ngokwezenzo zezandla zabo;

Bábuyisele ngokwempatho yabo.

₅Ekubeni bengayiqondi imisebenzi kaYehova,

Nezenzo zezandla zakhe,

Úya kubagungxula, angàbakhi.

₆Makabongwe uYehova,

Kuba elivile ilizwi lokukhunga kwam.

₇NguYehova amandla am nengweletshetshe yam;

Yakholosa ngaye intliziyo yam, ndancedeka.

Iyadlamka ke intliziyo yam,

Ndiyamdumisa ngengoma yam.

₈UYehova ungamandla kubo;

Uligwiba losindiso kumthanjiswa wakhe yena.

₉Sindisa abantu bakho,

Usikelele ilifa lakho,

Ubaluse, ubathwale kude kuse ephakadeni.