IINDUMISO 27

₁NguYehova umkhanyiseli wam nomsindisi wam, ndiya koyika bani na?

NguYehova inqaba yobomi bam, ndiya kunkwantya ngabani na?

₂Bakusondela kum abenzi bobubi ukuba badle inyama yam,

Bakuza ababandezeli bam neentshaba zam kum, bákhubeka bawa bona.

₃Bendingafanelana ndirhawulwe ngumkhosi isuka ingoyiki intliziyo yam;

Bendingafanelana ndiphakanyelwe yimfazwe, ndisuka ndithembe noko.

₄Ndicelé nto-nye kuYehova, ndifuna yona:

Ukuba ndihlale endlwini kaYehova yonke imihla yobomi bam,

Ndibòne ubuhle bukaYehova, ndiphicothe etempileni yakhe.

₅Ngokuba úndigusha emnqubeni wakhe ngemini yobubi,

Undisithelisa esitheni lentente yakhe,

Undimisa eweni.

₆Ngoku ke iya kuphakama intloko yam phezu kweentshaba zam ezindijikelezayo,

Ndibingelèle ententeni yakhe imibingelelo yokuduma,

Ndivume, ndibethe uhadi kuYehova.

₇Yiva, Yehova, ndakubiza ngezwi lam;

Ndibabale, undiphendule.

₈Intliziyo yam ithi kuwe, kweli ùthi, Funani ubuso bam,

Ubuso bakho, Yehova, ndiya kubufuna.

₉Musa ukubusithelisa ubuso bakho kum;

Musa ukumgila umkhonzi wakho ngomsindo;

Ùluncedo lwam, musa ukundilahla;

Musa ukundishiya, Thixo ondisindisayo.

₁₀Ngokuba ubawo noma bandishiyile,

Wesuka uYehova wandichola.

₁₁Ndíyalele, Yehova, indlela yakho,

Ndíkhaphe emendweni othe tye, ngenxa yabandilaleleyo.

₁₂Musa ukundinikela elitheni labandibandezelayo,

Ngokuba ndiphakanyelwe ngamangqina axokayo, nabafutha ukugonyamela.

₁₃Ndinge ndiphelelwe, koko bendikholwa kukuba ndokubona ukulunga kukaYehova

Ezweni lobu bomi.

₁₄Thembela kuYehova;

Yomelela, ikhaliphe intliziyo yakho,

Uthembele kuYehova.