IMIZEKELISO 17

₁Iqhekeza elomileyo lesonka, kunye nokuchulumacha, lilungile

Ngaphezu kwendlu ezele yimibingelelo, enembambano.

₂Umkhonzi onengqiqo uya kumlawula unyana owenza okuziintloni,

Ahlule ilifa phakathi kwabazalwana.

₃Ukhamba lolokunyibilikisa isilivere; iziko lelokunyibilikisa igolide;

Umcikidi weentliziyo nguYehova.

₄Onobubi uwubazela indlebe umlomo onenkohliso,

Uphulaphula ubuxoki obuselulwimini olweyeliselayo.

₅Ogculela ihlwempu ungcikiva uMenzi walo;

Ovuyela inkxwaleko akabi msulwa.

₆Isithsaba samadoda amakhulu ngoonyana boonyana;

Isihombo soonyana ngooyise.

₇Ayisifanele isidenge intetho ekhukhumeleyo;

Yobeka phi na ke ukungalifaneli inene intetho ebubuxoki.

₈Sililitye elinqabileyo emehlweni omninilo isicengo,

Apho asukuba ebheka khona, wenza ngengqiqo.

₉Ugubungela isikreqo ofuna uthando;

Ophinda ayithethe into wahlula amakholwane.

₁₀Ukukhalinyelwa kuyangena konengqondo

Ngaphezu kwemivumbo elikhulu kosisinyabi.

₁₁Oneenkani ufuna ububi bodwa;

Ngoko ke uthunyelwa umthunywa osisijorha.

₁₂Kanye qubisana nebhere• ehluthwe amathole ayo,

Ungaqubisani nesinyabi ekumatheni kwaso.

₁₃Obuyekeza okubi esikhundleni sokulungileyo,

Àbuyi kusuka ububi endlwini yakhe.

₁₄Kukuvulela amanzi ukuqala kwengxabano;

Yiyeke imbambano kungekavunganyelwana.

₁₅Omgwebelayo ongendawo, kwanoligwebayo ilungisa,

Bangamasikizi kuYehova bobabini.

₁₆Lelokwenzani na inani elisesandleni sesinyabi, lokurhweba ubulumko,

Singenantliziyo nje?

₁₇Umhlobo uthanda ngamaxesha onke;

Umzalwana uzalelwe imbandezelo.

₁₈Umntu oswele intliziyo ngobambana nomnye ngesandla,

Ngomela umelo phambi kowabo.

₁₉Uthanda ukreqo othanda ukulwa;

Owuphakamisayo umnyango wakhe ufuna ukuqhekeka.

₂₀Ontliziyo ijibilizayo akayi kukufumana okulungileyo;

Ophenduka ngolwimi lwakhe weyela ebubini.

₂₁Ozala isinyabi uzizalela isingqala;

Akanaluvuyo uyise wesidenge.

₂₂Intliziyo evuyileyo iyalungisa, ichachise;

Umoya odakumbileyo uyawomisa amathambo.

₂₃Ongendawo wamkela isicengo esivela esondweni lengubo,

Ukuze agqwethe indlela esesikweni.

₂₄Ubuso bonengqondo bubheke ebulumkweni;

Ke amehlo esinyabi asekupheleni kwehlabathi.

₂₅Úbubuhlungu bukayise unyana osisinyabi;

Úbubukrakra kumzalikazi wakhe.

₂₆Àkulungile ukuhlawulisa nelungisa,

Nokubetha amanene ngenxa yokuthe tye.

_27-28Owanqandayo amazwi akhe unokwazi:

Omoya upholileyo yindoda enengqondo.

Kwanesimathane, ukuba sihleli sathi tu, kuthiwa sisilumko;

Singàwuvingca umlomo waso, kuthiwa sinengqondo.