IMIZEKELISO 16

₁Zezomntu izicwangciso zentliziyo;

Ke yona impendulo yolwimi ivela kuYehova.

₂Zonke iindlela zendoda ziqaqambile kwawayo amehlo;

Ke yena umlinganisi womoya nguYehova.

₃Qengqela kuYehova izenzo zakho,

Zizimasèke iingcinga zakho.

₄Zonke izinto uYehova uzenzele intsingiselo yakhe,

Kwanongendawo umenzéle imini yobubi.

₅Balisikizi kuYehova bonke abantliziyo izidlayo;

Kakade ke, ababi msulwa.

₆Ngenceba nenyaniso buyacanyagushelwa ubugwenxa;

Ngokoyika uYehova umntu uyatyeka ebubini.

₇Ekukholisweni kukaYehova ziindlela zendoda,

Uyixolelanisa neentshaba zayo nayo.

₈Ilungile intwana encinane enobulungisa,

Ngaphezu kolungiselo oluninzi olukunye nokungesesikweni.

₉Intliziyo yomntu icinga indlela yakhe;

NguYehova oyalela ukunyathelakwakhe.

₁₀Izihlabo zisemilebeni yomlomo wokumkani;

Mawungamenezi esikweni umlomo wakhe.

₁₁Isilinganiso nesikali• esisesikweni sesikaYehova;

Asisenzo sakhe onke amatye• asengxoweni.

₁₂Lisikizi kubo ookumkani ukwenza okungendawo,

Kuba itrone izinziswa bubulungisa.

₁₃Ukumkani uyakholiswa ngumlomo wobulungisa;

Othetha okuthe tye uyathandwa.

₁₄Ubushushu bokumkani buzizithunywa zokufa;

Ke indoda elumkileyo iyamcamagusha.

₁₅Ekukhanyeni kobuso bokumkani bubomi;

Okuthandwa nguye kunjengelifu lemvula yasekwindla.

₁₆Ukurhweba ubulumko kungakanani na ukulunga kwako, ngaphezu kwegolide embiweyo!

Nokurhweba ingqondo kungakanani na ukunyuleka kwako, ngaphezu kwesilivere!

₁₇Umendo wabathe tye kukutyeka ebubini;

Ulondoloza umphefumlo wakhe ogcina indlela yakhe.

₁₈Ikratshi likhokela intshabalalo;

Ukuzidla kukhokela ukukhubeka.

₁₉Kulungile ukuba nomoya othobekileyo phakathi kwabalulamileyo,

Ngaphezu kokwaba amaxhoba nabanekratshi.

₂₀Oliqiqayo ilizwi uya kufumana okulungileyo;

Okholose ngoYehova, hayi, uyolo lwakhe!

₂₁Ontliziyo ilumkileyo kuthiwa unengqondo;

Nobumnandi bomlomo bongeza imfundiso.

₂₂Lithende lobomi ingqiqo kumniniyo;

Ke lona uqeqesho lwezimathane kukumatha kwazo.

₂₃Intliziyo yesilumko iyawuqiqisa umlomo waso,

Yongeze imfundiso emilebeni yomlomo waso.

₂₄Linqatha lobusi amazwi amnandi,

Ayincasa emphefumlweni, ayimpiliso emathanjeni.

₂₅Kukho indlela ethe tye phambi komntu,

Ukanti ukuphela kwayo ziindlela zokufa.

₂₆Ukulamba komxelengi kuyamxelengela,

Ngokuba umlomo wakhe uyamqhuba.

₂₇Umntu olitshijolo umba ububi:

Emlonyeni wakhe ngathi ngumlilo otshisayo.

₂₈Indoda ephendukayo ingenisa ingxabano;

Nentlebi yahlula amakholwane.

₂₉Indoda egonyamelayo ihenda ummelwane wayo,

Imhambise ngendlela engalungileyo.

₃₀Ocima amehlo akhe, kukuba acinge impenduka;

Oluma umlomo wakhe ugqibe ububi.

₃₁Isithsaba sokuhomba zizimvi,

Sifunyanwa endleleni yobulungisa.

₃₂Ozeka kade umsindo ulunge ngaphezu kwegorha;

Okulawulayo ukufutha kwakhe ulunge ngaphezu kothimba umzi.

₃₃Umntu uphosa iqashiso esondweni lengubo,

Ke ukugqitywa kwalo konke kunoYehova.