IMIZEKELISO 11

₁Isikali• esikhohlisayo singamasikizi kuYehova;

Ilitye• elizeleyo lilikholo kuye.

₂Kwafika ukukhukhumala, kofika ukucukucezwa;

Bunabathozamileyo ubulumko.

₃Ingqibelelo yabathe tye iyabakhapha;

Ukuphenula kwamanginingini kuyawabhuqa.

₄Àbunyusi ubuncwane ngemini yokuphuphuma komsindo;

Ubulungisa buyahlangula ekufeni.

₅Ubulungisa bogqibeleleyo bulungelelanisa indlela yakhe;

Ongendawo uwa kwangokungendawo kwakhe.

₆Ubulungisa babathe tye buyabahlangula;

Amanginingini athiwa hlasi kwayimbimbithelo yawo.

₇Ekufeni komntu ongendawo liyaphela ithemba lakhe;

Ukulinda kwabanamandla obudoda kutshabalele.

₈Ilungisa liyahlangulwa embandezelweni,

Kufike ongendawo esikhundleni salo.

₉Intshembenxa iyamonakalisa ummelwane wayo ngomlomo;

Ke ayahlangulwa amalungisa ngokwazi.

₁₀Isixeko siyadlamka ngokuhlala kakuhle kwamalungisa;

Ekutshoneni kwabangendawo kuyamemelelwa.

₁₁Ngentsikelelo yabathe tye síyaphakanyiswa isixeko;

Ngomlomo wabangendawo siyahleleleka.

₁₂Odela ummelwane wakhe uswele intliziyo;

Ke indoda enengqondo ihlala ithi tu.

₁₃Ohamba ehleba uhlakaza ucweyo;

Ke yena omoya unyanisileyo uyayigubungela into.

₁₄Kwakuba kungekho mbonisi, bayawa abantu;

Usindiso lusebuninzini bamaphakathi.

₁₅Kubi kakhulu komele omnye;

Ke yena okuthiyayo ukumela omnye ukholosile.

₁₆Umfazi osimilo silungileyo uzizekela uzuko;

Abanobungqwangangqwili bazizekela ubutyebi.

₁₇Uwuphethe kakuhle umphefumlo wakhe umtu onenceba;

Isijorha siyihlisele ishwangusha inyama yaso.

₁₈Ongendawo usebenzela umvuzo oyinkohliso;

Ke yena ohlwayela ubulungisa unomvuzo oyinyaniso.

₁₉Ubulungisa obububo busingisa ebomini;

Ophuthuma ububi usingisa ekuzibulaleni kwakhe.

₂₀Ngamasikizi kuYehova abantliziyo zijibilizayo;

Ukholwa ngabo bandlela zigqibeleleyo.

₂₁Ukakade onobubi akabi msulwa;

Ke yona imbewu yamalungisa iyasínda.

₂₂Likhonkco legolide ethatheni lehagu

Inzwakazi eswele izimvo.

₂₃Umnqweno wamalungisa yinto elungileyo yodwa;

Ithemba labangendawo kukuphuphuma nje komsindo.

₂₄Kukho ohlakazayo, aye esanda ngokwanda;

Kukho nozinqandayo kokumfaneleyo, oko kube yintswelo yodwa.

₂₅Umphefumlo osikelelayo uyatyetyiswa;

Oseza ahluthise abanye, uyasezwa ahluthe naye.

₂₆Omangala nengqolowa, luyamqalekisa uluntu;

Intsikelelo isentlokweni yothengisa ngayo.

₂₇Ozondelele okulungileyo ufuna okwamkelekileyo;

Ongxamele ububi, buya kumfikela.

₂₈Okholosa ngobutyebi bakhe uya kuwa yena;

Ke amalungisa aya kuhluma njengamagqabi.

₂₉Ogxugxisa indlu yakhe uya kudla ilifa elingumoya;

Isimathane soba ngumkhonzi kontliziyo ilumkileyo.

₃₀Isiqhamo selungisa ngumthi wobomi;

Umbambisi wemiphefumlo sisilumko.

₃₁Yabona, ilungisa liyavuzwa ehlabathini;

Wobeka phi na ke ongendawo nomoni!