IMIZEKELISO 12

₁Úthanda uqeqesho othanda ukwazi;

Úthiya isohlwayo osisityhakala.

₂Olungileyo uyamkeleka kuYehova;

Indoda enamayelenqe uyifumana inetyala.

₃Akuzimaseki mntu, enokungendawo;

Ke yona ingcambu yamalungisa ayishukunyiswa.

₄Umfazi onesidima usisithsaba endodeni yakhe;

Owenza okuziintloni unjengempehla emathanjeni ayo.

₅Iingcinga zamalungisa zisesikweni;

Amacebo abangendawo yinkohliso.

₆Amazwi abangendawo ngawokulalela igazi;

Umlomo wabathe tye uyabahlangula.

₇Bakuba bebhukuqiwe abangendawo, ababikho;

Indlu yamalungisa iyema.

₈Indoda idunyiswa ngokwengqiqo yayo,

Entliziyo igwenxa iba ngodelekileyo.

₉Ulungile ophantsi enesicaka,

Ngaphezu kozizukisayo eswele ukudla.

₁₀Ilungisa liyawazalelela umphefumlo wenkomo yalo;

Iimfesane zabangendawo zibubujorha.

₁₁Owusebenzayo umhlaba wakhe uhlútha kukudla;

Osukelana nento engento uswele intliziyo.

₁₂Ongendawo ukhanuka okuzingelwa ngabanobubi;

Ingcambu yamalungisa iyanika.

₁₃Ekuphosiseni komlomo kukho isirhintyelo esinobubi;

Ke lona ilungisa liyaphuma embandezelweni.

₁₄Ngesiqhamo somlomo wayo indoda iyahlútha kokulungileyo,

Nempatho yezandla zomntu ibuyela kuye.

₁₅Indlela yesimathane ithe tye kwawaso amehlo;

Ophulaphula ukucetyiswa usisilumko.

₁₆Isimathane sikwazisa kwangaloo mini ukuqumba kwaso;

Ke yena onobuqili uyakugubungela ukucukucezwa.

₁₇Ophefumla inyaniso uxela ubulungisa;

Ingqina elixokayo lixela inkohliso.

₁₈Kukho ophololoza njengokuhlaba kwekrele;

Ke lona ulwimi lwezilumko luyaphilisa.

₁₉Umlomo wenyaniso uzimasekile kwaphela;

Ke lona ulwimi oluxokayo lolwephanyazo.

₂₀Inkohliso isentliziyweni yabayila ububi;

Ke bona abacebi boxolo bayabuyisa.

₂₁Ilungisa aliqubisani nobubi;

Ke bona abangendawo bazele yinkxwaleko.

₂₂Ùngamasikizi kuYehova umlomo oxokayo;

Abenza inyaniso ukholisiwe ngabo.

₂₃Umntu onobuqili uyakugubungela ukwazi;

Intliziyo yesinyabi ivakalisa ukumatha.

₂₄Isandla sabakhutheleyo siyalawula;

Ukudangala kufakwa uviko.

₂₅Isithukuthezi esisentliziyweni yendoda siyenza igobe;

Liyayivuyisa ilizwi elihle.

₂₆Ilungisa lingumkhokeli kuwalo;

Indlela yabangendawo iyabandwendwisa.

₂₇Odangeleyo akayibhulisi inyamakazi yakhe;

Ke ubuncwane obunqabileyo bomntu kukukhuthala.

₂₈Busemendweni wobulungisa ubomi;

Ukuyinyathela indlela yabo kukungafi.