UYOBHI 11

₂Le nto ininzi yamazwi ayikuphendulwa na,

Indoda elipholopholo igwetyelwe na?

₃Ukuphololoza kwakho kuya kubetha athi tu na amadoda,

Ukuba ugculele, kungabikho ukuhlazayo?

₄Ùthi, Iqaqambile imfundiso yam,

Ndinyulu emehlweni akho.

₅Kodwa akaba uThixo ubethetha,

Avule umlomo wakhe kuwe;

₆Akuxelele iimfihlakalo zobulumko,

Ukuba buphindeke kabini, bayinto ezimasekileyo;

Ùbuya kwazi ke ukuba uThixo wenzé ukuba ubulibale ubugwenxa bakho.

₇Ùnokufikelela na ezingontsingontsini zikaThixo?

Unokufikelela na ekufezekeni kukaSomandla?

₈Kuphakame ngokwamazulu; ùnokwenza ntoni na?

Kunzulu kunelabafileyo; ùnokwazi ntoni na?

₉Kukude kunehlabathi ukulinganiswa kwako,

Kubanzi kunolwandle.

₁₀Ukuba úthe phe yena, wavingcela,

Wamemela ematyaleni, ngubani na onokumnqanda?

₁₁Kuba yena uyabazi abantu abakhohlakeleyo,

Uyabubona ubutshinga engaqondelanga.

₁₂Nomntu onjengesidenge angaba nokuqonda,

Nethole le-esile lasendle lingaba nokuzalwa lingumntu.

₁₃Ukuba uthe wena wabhekisa intliziyo yakho kuye,

Wazolulela izandla zakho kuye:

₁₄Ukuba kuthe kwakho inkohlakalo esandleni sakho, yise kude,

Ungabuhlalisi ubugqwetha ezintenteni zakho;

₁₅Okunene, ùya kwandula ukubuphakamisa ubuso bakho bungenasisihla,

Uthi bhuxe, ungoyiki.

₁₆Kuba wòkulibala ukwaphuka kwakho,

Ukukhumbule njengamanzi adluleyo;

₁₇Ukudla kwakho ubomi kuvuke, kuqaqambe ngaphezu kwemini enkulu;

Nakuba kusongelwe emnyameni, kokhanya njengokusa.

₁₈Wòkholosa, ngokuba sekukho ithemba,

Uhlole, ulale phantsi enkolosekweni;

₁₉Ubuthume, kungekho wothusayo,

Bakuncekelele abaninzi.

₂₀Ke wona amehlo abangendawo ophelelwa;

Idake kubo indawo yokusabela,

Ithemba labo libe kukuphuma umphefumlo.